Pekan Keluarga Wari III. Anak (KA-KR ras PERMATA) Si Erkualitas

Pekan keluarga wari III. 03 Juni 2014.

Introitus : Lukas 2 : 40
Ogen : I Samuel 3 : 1 – 10, 19
Renungen : I Timotius 4 : 12 – 15
Tema : Anak (KA-KR ras PERMATA) Sierkualitas

Syalom.
Ibas wari pekan keluarga si pe 2 ken erbih kita enggo ipersingeti selaku orang tua gelah kita jadi orang tua siberkualitas. Ibas wari si pe 3 ken enda temata eme “Anak (KA – KR ras PERMATA) Si Erkualitas” adi sipersada duana tema enda maka banci siertiken maka adi orang tua enggo berkualitas maka anak – anak pe harus ka berkualitas ibas kerina sisi dampar kegeluhenna subuk ibas ilmu pengetahuan ras ibas spiritualna. Hal sienda perlu kel siperdiateken erkiteken lit si idah genduari kecendrungen maka manusia enggo lebih mementingken rasio emaka IQ (Intelligence Quotient) ipakai sebagai tolak ukur utama kualitas sekalak jelma tanpa ngenehen kegeluhen spiritualna ras pemikiren sibagenda pe enggo engkenai kegeluhen keluarganta siteridah ibas kita erlumba mereken pendidiken si tinggi man anak – anakta, tentu saja ibas kita mereken pendidiken si tinggi man anak – anakta labo salah ras harus memang sibereken ilmu pengetahuan man anak – anakta guna bekalna ibas masa depan, tapi ibas sie mekatep ka pe terjadi pendidikan siberat sebalah antara pendidiken formal ras pendidikan spiritual. Ibas gambaren sideban si idah ka pe genduari melala kegeluhen keluarga sila dame, umpamana rusur terjadi kekerasen ibas rumah tangga baik e secara emoional entah mental, litna rusur tindaken entah perlakuken kurang bijaksana, kurangna kekelengen terutama man anak – anak itengah jabu simengakibatken terjadi pertumbuhen kepribadian sila seimbang antara kognitif, emosi ras spiritualitas anak – anak i tengah jabu.

Sebagai anggota keluarga tentu ateta maka keluargata lit ibas dame, ibas pengarapen sibage, wari si erbih isingetken man banta, kita sebagai orang tua nge sibertanggung jawab guna nehkenca, bagepe ibas pengarapen temanta ibas wari si pe 3 ke enda eme gelah kegeluhen anak – anakna erkualitas. Secara lembaga gereja, gerejanta pe ersura – sura gelah kerina kegeluhen ngawan niperpulungen nggeluh ibas kedamen, erkiteken sie maka gerejanta pe erbahan program guna mencapai kegeluhen si erkualitas e alu erbahan program pelayanen Mamre – Moria – Permata ras KA/KR, alu pengarapen arah program pelayanen lembaga gerejanta e seh kerina sura – sura keluarga ngawan GBKP nggeluh alu dame ibas jabu,ibas sie tentu saja, guna memantapken program e iarapken kerina peran sertanta selaku ngawan guna mewujudkenca ibas kita berperan serta hadir ibas setiap kegiaten lembaga gerenjanta ras mendukungsa secara moril ras materi.

Wari enda enda temata “Anak (KA/KR ras PERMATA) Si Erkualitas” erpalasken I Tim 4 : 12 – 15. Piga – piga poin si banci si idah arah bahan oratenta enda eme :

1. Timotius eme sekalak Yahudi asli ras ndatken pengajaren kerna undang – undang Tuhan menaken ibas ninina Lois ras terus ku nandena Eunike (II Tim 3 : 15). Timotius erkiniteken ibas kitik – kitikna nari ras igelari “anak rohani” ras jadi kebanggan man Paulus ibas ngataken Timotius anakna rohanina (I Tim 1 : 2).
2. Paulus menuntut gelah Timotius encidahken dirina sebage kalak si la banci ianggap enteng, emaka ibas sie Paulus menuntut Timotius gelah tetap jadi usihen man kerina kalak sitek, ibas pengerana, ibas lagu langkah, ibas nehken keleng ate, ibas kiniteken ras ukur si bujur. Lima  karakter sienda me siarapken Paulus  ilakoken ras i praktekken Timotius  i tengah – tengah kegeluhen kalak Efesus si enggo bobrok ibas kerina moral kegeluhen simehuli (ay, 12 ).
3. Paulus tetap mpersingeti Timotius makeken kesempaten silit guna ngoge Pustaka si Badia ras kata e iajarkenna man kerina perpulungen, alu bage kalak sienterem ngidah kemajun Timotius ibas kiniteken ras kerina perbahanenna (Ay, 13 – 15).

Bageme pengajaren/persinget si isehken Paulus man Timotius, sebab Paulus sendiri pe meteh kerna tantangen kegeluhen ihadapi Timotius i Efesus, ras ibas sie  Paulus ermeriah ukur sebab Timotius ngasup nggeluh bagi si iarapken Paulus. Ibas kegeluhenta sigenduari pe tentu melala tantangen si man hadapenta, terlebih – lebih nandangi kegeluhen anak – anakta sigenduari, pengaruh Tekhnologi salah sada sangat mempengaruhi anak – anakta, mekatep pe si idah maka alat – alat tekhnologi enggo jadi teman setia anak – anakta bermain game, FB, Chat OL, rsd. Pustaka si Badia hanya i oge tupung i gereja entah paksa – paksa tertentu. Kita sebagai keluarga pe mekatep melupaken kai siterpenting siateta sisehken man anak – anakta ras bangga kel kita adi si sehken kerina pemindon anak – anakta, emaka sikap pendidikenta pe genduari mendidik tanpa mereken pengertin ras kebijaksanaan, ertina ibas masa sigenduari lit kecendrungenta kita hanya memikirken pertumbuhen jasmani tanpa la kita perduli pertumbuhen rohani anak – anakta.

Arah perenungenta senda enda, kita ngidah kegeluhen Timotius sierkualitas ras peran serta keluargana, emaka marilah silumbaken cara kegeluhen Timotius ras keluargana ibas kegeluhen keluarganta ras sebage orang tua sisehkenlah siterpenting man anak – anakta gelah pagin kegeluhenna tuhu – tuhu erkualitas sierbahanca bangga kita sebagai orang tuana bagepe kegeluhen gerejanta.

Amin
Rantaprapat 03 Juni 2014.

Salam ras sentabi man banta kerina ibas kurang lebihna tulisen enda. Tulisan enda labo bahan baku Pekan Keluarga GBKP. Tulisen enda hanya bersifat diskusi man banta ibas Blog enda. Bimbingen Pekan Keluarga sibaku tetap si ipedarat Moderamen GBKP si isikapken PPWG GBKP.
Bjr Tuhan simasu – masu.

Pekan Keluarga Wari II. Orang Tua Si Erkualitas

Pekan Keluarga Tgl 02 Juni 2014. Wari II.

Introitus : Kuan – kuanen 22 : 6
Ogen : Kuan – kanen 31 : 20 – 31
Renungen : Ulangen 6 : 1 – 9
Tema : “Orang Tua (Bapa-Nande) Si Erkualitas”

Syalom.

       Ibas jamanta sigenduari melala kel perubahen siterjadi ibas kegeluhen keluarga umpamana : lit orang tua silanai ia erkeleng ate nandangi anakna, bagepe ka pe sebalikna ras enggo semal pe anak alu terang – terangen pang ia ngelawan orang tuana, ras adi enda me siterjadi, banci nge sisalahken orang tua adi anak la ngikutken ajar orang tuana ? Entah si salahken nge anak adi anak la megiken ajar orang tuana ? penungkunen sienda mekatep turang ibas kegeluhenta dikune anak itengah jabu enggo mesangat pergutulna entah adi anak tuhu – tuhu enggo ceda. Ibas sienda kita orang tua lit rusur alasen klasik si ipedarat adi kegeluhen anak lanai bagi ukur, biasana ninta : “Kata enggo me ajarken adi la begikenna me ia nge pagi mabasa” entah ninta rusur : “Iak …ah, lanai bo kita matah ajar, uga ban adi la terajarken, mbera robah pagi ia, adi e pe lang uga nge ban” bageme ninta rusur sebage orang tua adi kita enggo kewalehen ibas ngajarken anak – anakta. Emaka guna banci lebih mehuli, sendah enda ilumbaken man banta ibas Pekan keluarganta ibas wari sipeduaken enda tema “Orang Tua (Bapa-Nande) Si Erkualitas” alu pengarapen reh belinna kualitasta ibas memainken peran sebagai orang tua, sebagai pendidik ras teladan man kerina anak – anakta, dingen alu pengarapen anak – anak i tengah jabunta pe banci enghamati ras patuh ia man orang tuana.

       Ulangen 6 : 1- 9 renungenta wari sipeduaken enda eme perentah si isehken Musa man kalak Israel, siningetken gelah kerina kalak Israel mematuhi hukum Tuhan ibas ia bengket ku Taneh Kanaan. Ulangen 6 enda cukup terkenal ibas kalak Israel ras kalak kristen, lit dua hal si penting si idah ibas renungenta ibas pekan keluarga wari sipeduaken enda eme :

• Ul 6 : 1 – 9 enda ikenal alu pengakuan iman kalak Israel. “Shema” ibas bahasa Ibrani iertiken “begikenlah/dengarlah” alu pengertin, labo hanya ibegiken saja tapi pe megiken ras menaatisa alu tutus/sunguh – sungguh. “Shema” ibelasken kalak Yahudi dua kali tiap tiap wari (pagi ras karaben) ibas kebaktin i Sinagoge. “Shema” enda eme pernyataan kerna monotheis Dibata si ngingetken gelah kalak Israel ula lupa man Dibata ras kerina perbahanen keleng ate Dibata simaba bangsa e ndarat i Mesir nari ras isusul alu perintah rangkap maka kalak Israel arus engkelengi Tuhan asa ukur, tendi ras gegehna lit (ayat 1 – 3). Cataten tambahen : Seh ngayak genduari kalak Israel (siberagama Yahudi) tetap taat ndalanken sienda sebab man kalak Israel pendidikan rohani memang merupaken bagin integral ibas perpadanen Dibata ras umatNa, tentu mehuli kel adi bage ka jadi ibas kegeluhen keluarganta ibas masa sigenduari.

• Pengajaren si isehken ibas Ul 6 : 1 – 9 enda eme guna mempersiapken generasi baru si ipersiapken menuju taneh perpadanen, ibas sie Musa ngajarken/menuntut/menantang gelah kerina kalak Israel mentaati syarat – syarat perpadanen i Sinai sebagai syarat ngikutken Tuhan, erkiteken sie Musa menuntut gelah kerina orang tua kalak Israel gelah ngajarken kerina si hukum Dibata man anak – anakna, ibas paksa sanga kam irumah, ibas perdalinen, sanga ngadi ngadi, ngiketken ibas pergelangen tan, makeken ibas perdempaken, nuratken ibas binangun pintun, alu tujun gelah kerina kegeluhen kalak Israel badia ras ndatken pasu – pasu ibas Tuhan nari (ay. 4 – 9). Alu bage si idah pe maka Musa sangat menekanken pentingna orang tua sebagai penanggung jawab utama ras tugas mendasar ibas mereken pendidikan kerohanian anak – anak ras pendidiken isehken arus erkaiten kubas kiniteken (kerohanian), ertanggung jawab, serius ras i ulihi ibas setiap lit kesempaten alu tujun gelah i inget, ipahami ras gelah ipraktekken ibas kegeluhen sitep –tep wari.

         Enggo si idah tekanen penting ibas Ul 6 : 1 – 9 sijadi bahan renungenta ibas wari enda, tentu ibas wari enda ijembaken ka man banta uga kita nggeluh selaku kalak sierkinteken hanya nembah man sada Tuhan saja ras orang tua sebagai penanggung jawab penuh kerina kerohanian keluarga dingen mpersiapken anak – anakta gelah nggeluh alu erkemalangen man Tuhan. Tuntuten si enda me si isehken man banta ibas wari peduaken Pekan keluarganta sendah enda alu tema “Orang Tua (Bapa-Nande) Si Erkualitas” tema enda siaplikasikenlah ibas kegeluhenta sebagai orangtua alu nggeluh ibas keteladen ibas kata ras perbahanen sebab keteladanen eme salah sada pendidikan terbaik guna menciptaken generasi penerus simehuli ibas keluarganta.

Amin.
Rantauprapat 02 Juni 2014.

Salam ras sentabi man banta kerina ibas kurang lebihna tulisen enda. Tulisan enda labo bahan baku Pekan Keluarga GBKP. Tulisen enda hanya bersifat diskusi man banta ibas Blog enda. Bimbingen Pekan Keluarga sibaku tetap si ipedarat Moderamen GBKP si isikapken PPWG GBKP.
Bjr Tuhan simasu – masu.

Pekan Keluarga Wari I. “Ngelumbaken Keluarga Si Erkualitas”

Pekan Keluarga 01 Juni 2014,  Wari I.

Introitus : Kej 2 : 7
Ogen : Kej 1 : 27 – 28
Renungen : I Kor 11 : 3, I Tim 3 : 4
Tema : “Ngelumbaken Keluarga Si Erkualitas”

Syalom !

      Negaranta Indonesia mendedikasiken sada wari khusus man keluarga alu gelar Hari Keluarga Nasional (Harganas) adi dunia barat nggelarisa alu gelar Family Day, tujun wari – wari e gelah keluarga – keluarga nggeluh harmonis. Gerejanta GBKP pe erbahan program pelayanan khusus guna keluarga eme Pekan Keluarga alu tujun gelah keluarga ngawan GBKP tetap nggeluh erkemalangen man Tuhan. Tahun enda enggo ka seh paksana kita ngelakoken Pekan Keluarga alu tema umum “Kesah Si Badia Njemba Keluarga GBKP Si Erkualitas” (I Kor 2 : 10 – 12), tentu alu pengarapen arah Pekan Keluarga sekali enda keluarga ngawan – ngawan ni GBKP khususna lebih berkualitas ras jadi usihen man kerina keluarga – keluarga sideban.

     Tema Pekan Keluraga ibas wari pemena enda eme “Ngelumbaken Keluarga Si Erkualitas” tema enda njemba keluarganta gelah lebih mehuli sebage keluarga siarapken Dibata si Ia sendiri netapkenca ras adi lit denga keluargata si lenga bagi ikataken tema enda labo dalih, adi tutuslah ateta ngikuti Pekan Keluarga sada minggu enda, tek kita maka keluargata pasti erkualitas sebab keluarga si erkualitas hanya banci idat ibas persadan ras Dibata.

      Uga kin ngelumbaken jabu sierkualitas ? ibas renungen Pekan Keluargata sekali enda ningetken man banta ibas piga – piga dampar sicukup penting erpalasken kinitekenta, alu pengarapen geluh keluarga ngawan GBKP semakin ngelumbaken keluarga erkualitas erpalasken I Kor 11 : 3, I Tim 3 : 4, renugenta ibas wari si I enda :

• Perjabun eme sada iketen antara dilaki ras diberu si ipasu – pasu Dibata guna jadi sada pasangen sipermanen ertina dilaki ras diberu si enggo ipasu – pasu Dibata nggeluh setia man pasangenna (Kej 1 : 27 – 28. ayat enda ngataken hanya sada diberu si itepa man dilaki bagepe sebalikna, emaka ise si dua ndeharana entah dua dilakina situhuna ia enggo melawan rencana penciptaan Dibata. ibas sienda Gus Dur pernah ngatakenca, maka kalak singelakoken poligamy situhuna kalak sibage la memahami ajaren agamana). Ibas kinata kegeluhen ibas zamanta sigenduari melala tuhu tantangen siman hadapen ibas jabu/keluarga, salah sada penyebab utama biasana eme perselingkuhen (ketidak-setiaan) seh berakhir kubas perceraian. Ibas sienda perlu kel kita hati – hati sebab perselingkuhan tidak mengenal status sosial, tingkat pendidikan, jabatan, bidang profesi, domisili ras situasi. Lit ibas kalangen tertentu perselingkuhen enggo merupaken gaya hidup baru ras lanai iakapna mela pe ngelakokenca umpamana, tinggal seatap tanpa iketen perjabun/kumpul kebo. Hal sienda pantang kel man banta selaku kalak kristen sebab kerina e dosa simelanggar hukum Dibata. Kerna hal sie jelas kel ituriken adi sinen konsep PL ras PB si sangat menolak kebebasen sexual, inget bahan PJJ-nta ibas minggu si enggo lepas kerna dosa Sodom ras Gomora si ikernepken Dibata erkiteken kebebasen sexual bagepe pedah si pe 7 ken ibas Hukum Taurat si ningetken “la banci erlua – lua”.

• Trend kawin cerai pe genduari enggo mewarnai kegeluhen ibas jamnta sigenduari ras la banci sipungkiri trend kawin cerai janah ibas sienda melala si idah sikap gereja sienggo melemah kerna aturan perceraian enda. tapi labo ateta nggargari kelemahen geraja ibas paksa sendah enda, tapi marilah sirenungken ulihi kerna makna perjabun ibas kalak kristen terutama man banta selaku jabu siekemalangen man Tuhan gelah ndigan pe ula jadi sie. Ibas pustakanta isingetken Yesus sangat menentang perceraian alu sie Yesus ngatakenca maka kesetian ibas perjabun mutlak la banci itawar (Mat 19 : 6 Mat. 5:32, 19:9, Mrk. 10:11, Luk. 16:18). Sebab perjabun igambarken hubungen antara Dibata ras manusia sebab perjabun labo rancangen manusia tapi ketetapen Dibata kap, dingen hal sie me siakui gerejanta GBKP si ituangken ibas Konfesi GBKP Pasal 8 kerna Perjabun . Melala memang genduari alasen perceraian mulai arah masalah ekonomi, lalit anak ipupus, masalah psikis, komunikasi sila mejile, ingan tading sindauhen erkiteken pendahin, perbedaan persepsi, idealisme, jenuh, rsd, kerina alasen enda me mawen – mawen maka perceraian ndatken “restu” tapi man banta sendah enda isingetken la banci lit perceraian kai pe alasenna, emaka guna menjaga keutuhen keluarga tetaplah tutus ibas kiniteken ras berusaha membangun keluarga si harmonis alu nggeluh ibas persadan ras Tuhan Yesus, ras bicara lit pe sekali tantangen ibas perjabun/keluarga hadapi ras dungilah alu kerohanianta ibas pengajaren Kesah Si Badia.

• Ibas I Kor 11 : 3 Paulus nehken pengarapenna man perpulungen Korintus nina “Tapi ateku min gelah iangkandu, maka kerina dilaki, Kristus takalna ; diberu dilaki takalna ; Kristus Dibata kepalaNa” ibas ayat enda Paulus encidahken maka Kristus kap kerina palas ibas kerina kegeluhenta ras ngingetken posisi dilaki ras diberu ibas kegeluhen perjabun. Ibas keluarganta pengertin kerna ayat enda arus jelas. Sitik kusingetken man banta kerna peranan dilaki ras diberu ibas kesempaten enda : ibas zamanta sigenduari melala terjadi perubahen pandangen antara dilaki ras diberu, khususna ibas masyarakat metropolitan, akibat munculna aliren feminisme alu semangat kesetaran gender tapi kedungenna semangat feminisme enda lanai terjeng memperjuangken kesetaran gender saja tapi dungna melahirken sifat kompetitif ibas kerina hal. Ibas sienda mekatep kel kita enggo melupaken kai si imaksudken ibas Kej 1 : 27 – 28 (Ogen) ibas ayat enda memang lit kesetaran antara dilaki ras diberu memang lit kesetaran sebab itepa seri ras gambar Dibata tapi ibas sisi sideban maka lit perbedaan peran, diberu tetap jadi penampat man dilaki dingen dilaki tetap memainken peranna sebagai pemimpin ras enda me si imaksudken Paulus ibas I Kor 11 : 3 alu ngataken “ …………. gelah iangkandu, maka kerina dilaki, Kristus takalna ; diberu dilaki takalna ; Kristus Dibata kepalaNa”, lebih jelasna kerna posisi enda situhuna ijelasken Paulus ibas Efesus 5 : 22 ibas ayat enda Paulus menjelasken maka sekalak diberu harus tunduk ia man perbulangenna (Bdk. I Tim 2 : 11 – 14). Penjelasen enda labo bersifat merendahken diberu, ertina banci saja beremansipasi guna ndatken kesetaran ras dilaki tapi tetaplah pake prinsip Alkitab, maka sekalak diberu la banci melawan kodratna sebage penampat man dilaki entah menyadari porsina sebage diberu si iciptaken Dibata. Alu bage maka sekalak diberu la banci mengambil alih kekuasan dilaki guna ambisi pribadi, tentu ibas persinget sienda kerina, maka sekalak dilaki pe arus menjalanken peranna sebagai pemimpin, ibas erti kata sekalak dilaki arus ipantaskenna dirina guna ipatuhi sebagai kepala/pemimpin ibas keluarga (Ester 1 : 22, Ef 5 : 23, Ul 6 : 7 – 9, Kuan2 1 : 8), gelah alu bage dilaki la kebenen kehormatenna ibas keluargana, sebab citra dilaki/bapa itengah keluarga eme kap citra Dibata ibas doni.

• Ibas kerina hasil akhir Paulus ningetken man kerina keluarga kristen (Pelayan khusus) ibas I Tim 3 : 4 maka kerina anggota keluarga arus makeken peranna alu mehuli ertina sekalak bapa arus ngergai ndeharana ras ndehara ngelakoken tugas panggilenna sebage ndehara dingen anak – anak harus tetap ngergai orang tuana sebab orang tuana enggo ncidahken biak keteladanen siman usihen.

     Enda me si iarapken ibas bahan Pekan Keluarganta ibas wari sendah enda, uga kita banci nggeluh berkualitas, alu njagai kebadian jabunta ras jadi teladan ibas kai pe dingen ngelumbakenca man kerina keluarga – keluarga isekelewetta.

Amin.
RantauPrapat  30 Mei 2014.

Salam ras sentabi man banta kerina ibas kurang lebihna tulisen enda. Tulisan enda labo bahan baku Pekan Keluarga GBKP. Tulisen enda hanya bersifat diskusi man banta ibas Blog enda. Bimbingen Pekan Keluarga sibaku tetap si ipedarat Moderamen GBKP si isikapken PPWG GBKP.
Bjr Tuhan simasu – masu.