Pekan Keluarga wari V . “Tanggung Jawab Jabu Si Tek Nandangi Gereja Tuhan”

Pekan Keluarga wari V. 05 Juni 2014

Inroitus : I Kor 12 : 25
Ogen : I Kor 16 : 1 – 4
Renungen : Heber 13 : 16 – 21
Tema : “Tanggung Jawab Jabu Si Tek Nandangi Gereja Tuhan”

Syalom.
uga nge seharusna sikapta sebage warga gereja ? seh ngayak ija kita engkelengi gerejanta GBKP ? Kai entah uga nge tanggung jawabta selaku warga gereja nandangi kerina pelayanen si ilakoken gerejanta ? enda me jenis penungkunen si isehken man banta rikutken tema Pekan Keluarganta ibas wari si pe 5 ken enda “Tanggung Jawab Jabu Si Tek Nandangi Gereja”.

Renungenta wari enda menjelasken tugas ras tanggung jawab kalak sitek ibas mereprensentasiken Kristus i doni alu cara nggeluh mehuli ras nggeluh si sampat – sampaten (ay.16). Kepatuhenta man Kristus sicidahken ibas kita banci ipinpin pemimpin simehuli (ay.17) dingen ibas antara tugas ras tanggung jawab ndai, tentu pe tetap nggeluh ibas pengarapen ibas ertoto man Dibata selaku permakan simbelin (ay.18 – 19).

Dirinta kap gereja, bagin ibas kula ni Kristus, emaka la banci lang kita pe ertanggungjawab guna mengembangken kegeluhen gereja, guna sie iperluken kel peran aktifta ibas kerina kegiaten gerejanta ras lanai bo zamanna kita mandangi, mengkritiki hal – hal sikurang sempurna ibas pelayanen gerejanta, adi lit siakap sikurang pas ibas program pelayanen gerejanta entah pendahin serayan ibas ibas gerejanta, radu ras lah kita mpekenasa, ertina ula min buen terbuang waktuta guna mpersoalken sila penting, sebab mbue denga kel dahin siman dahinken dingen mbue denga kel iperluken dukungen daya ras dana si iperluken gerejanta guna banci ndahiken dahinna. Dage sue ras temata ibas Pekan Keluarganta ibas wari si p 5 ken enda : “Tanggung Jawab Jabu Si Tek Nandangi Gereja” mari radu raslah kita muat bagin ibas tanggung jawab e ras sijadiken kerina jabu – jabuta jadi gereja sikitik simaba syalom man kerina manusia.

Ibas penutup kata sendah enda kukutip ucapen Pdt. DR. Andar Ismail ibas kata pengantar bukuna “Selamat Bergereja”, nina :

Gereja mungkin mengecewakan. Gereja mungkin membosankan. Gereja mungkin melakukan kesalahan. Namun seenggan – engganya persaan kita dan sejauh – jauhnya kita pergi, kita pulang kembali ke gereja. Sebab gereja adalah rumah milik Kristus yang tersedia sebagai tempat tinggal kita. Disitu kita tinggal. Disitu kita serumahh dengan Kristus.

Memang gereja bisa mengecewakan, sebab gereja itu adalah komunitas orang lemah, namun disitu kita justru merasakan kemurahan hati Kristus yang kuat. Gereja adalah komunitas orang yang imannya kecil, namun disitu kita terhisab pada Kristus yang anugrahNya besar.

Seburuk – buruknya gereja, itu adalah rumah rohani kita dan tempat tinggal kita sendiri. Oleh sebab itu, kita perlu membetah – betahkan diri, kita perlu belajar menyukai gereja. Pada suatu hari kita akan mengaku, “Tuhan aku cinta pada rumah kediamanMu…” (Mzm 26 : 8).

“Selamat Nehken Tanggung Jawab Jabu Nandangi Gereja”

Amin
Rantauprapat 05 Juni 2014

Salam ras sentabi man banta kerina ibas kurang lebihna tulisen enda. Tulisan enda labo bahan baku Pekan Keluarga GBKP. Tulisen enda hanya bersifat diskusi man banta ibas Blog enda. Bimbingen Pekan Keluarga sibaku tetap si ipedarat Moderamen GBKP si isikapken PPWG GBKP.
Bjr Tuhan simasu – masu.

Pekan Keluarga wari IV. “Keluarga Si Erkoinonia, Erdiakonia Ras Ermarturia”

Pekan Keluarga wari IV. 04 Juni 2014

Introitus : Jop 1 : 5
Ogen : Kolose 3:12 - 17
Khotbah : Masmur 112: 1 - 6.
Thema : “Keluarga Si Erkoinonia, Erdiakonia Ras Ermarturia”

Syalom.
Koinonia, Diakonia ras Diakonia igelari alu tritugas gereja. Ibas tritugas pokok enda pelayanen gereja ilakoken secara holistik (menjawab aspek rohani ras jasmani) emaka teluna dahin enda la banci ipisahken. ibas Pekan Keluraganta wari si pe IV ken enda, kerna telu dahin enda me si ilumbaken man banta, alu pengarapen arah keluarganta ermulia Dibata ibas keluarganta jadi pasu – pasu man enterem jelma. Ibas sienda, tentu keluarganta pe ertedeh ate guna ipake Tuhan jadi alatNa ibas nehken kerina sura – suraNa, guna sie mari dage sirenungken bahan Pekan Keluarganta ibas wari enda, gelah alu bage banci tersehi tujun temata ibas wari si pe IV ken “Keluarga Si Erkoinonia, Erdiakonia Ras Ermarturia” ibas keluarganta nari :

• Intoriusta ndai ningetken man banta kerna Job sekalak sierkiniteken man Tuhan, bapa bapa rohani ras teladan man kerina anggota keluargana (Job 1 : 4 – 5), erkiteken sie ia ndatken pengakun ibas Dibata nari selaku kalak si tutus, patuh ras kalak mehuli kel (Job 1 : 8). Enda me frofil singkat Job, sekalak bapa i tengah jabu si ertanggung jawab penuh nandangi keluargana ibas kerina hal ras njadiken dirina teladan ibas kerina dampar kegeluhenna.

• Ibas ogenta si pemena Kolose 3 : 12 – 17 ningetken kerna gambaren kegeluhen simbaru ibas Kristus sebab simale enggo lepas, emaka ibas biak kegeluhen si mbaru e nina Paulus maka kai pe si ilakoken kalak kristen arus erpalasken Kristus Jesus.

• Mzm 112 : 1 – 6 bahan renungenta ngatakenca maka sekalak sitek man Tuhan la hanya cukup, ibas ia ngelakoken ibadah saja man Tuhan, tapi kalak si tek e pe arus mempraktekken kerina hasil hubungenna ras Tuhan ibas kegeluhenna si tep – tep wari. Emaka alu jelas Mzm enda nuruiken maka lit me ulih man isi jabu ibas kerina peribadahen si lakoken ras Tuhan (ay, 1 – 2), jenari ulih ibas kerina pasu – pasu Tuhan e labo ipakeken sendiri tapi arus pe i pergunaken ibas kiniulin kegeluhen kerina manusia sebagae praktek ibadah e, lit pe siarus ilakoken ibas kegeluhen si tep – tep wari eme alu ngelakoken perbahanen – perbahanen simehuli, bersikap bujur, adil, perkuah, perkeleng, melumbar pepinjamken, bujur ibas kerna urusen (ay, 3 – 5) , sebab kerina kerina perbahanen simehuli e pasti jadi kesaksin man kerina jelma ras kerina perbahanen simehuli pasti tetap lit si ngingetsa rasa lalap (ay, 6 ).

Arah telu poin idatas tentu enggo sieteh uga arusna kita selaku kalak kristen kristen nggeluh ibas persadaan ras Tuhan. Emaka silumbakenlah dage biak – biak kegeluhen sibage ibas kegeluhen keluarganta. Ibas Pustakanta melala contoh – contoh jabu si enggo ipake Tuhan jadi alatNa, umpamana : keluarga Nuh, Abraham, Zhakaria, Jusuf, Persila ras Akuila. I jenda singkat saja situriken salah sada ibas keluarga e kerina eme keluarga Persila ras Akuila. Keluarga enda kenca itandaina Kristus, maka keluarga e nggeluh ibas kinitekenna ras mpraktekkenca ibas ibas kegeluhenna sitep – tep wari, aminna keluarga enda labo kalak bayak tapi icidahkenna buah kinitekenna alu nampati kalak simembutuhken penampatna, ras alu la erleja – leja pe iberitakenna man kerina jelma kerna kinitekena (Perb 18 : 18 ; I Kor 16 : 19).

Ibas kerina kesaksin Pustaka si Badia si seh man banta ibas Pekan Keluarga sekali enda njemba kita guna banci mabai keluarganta guna nehi tugas panggilenna sebage keluarga si erKoinonia, erDiakonia ras erMarturia, subuk e ibas kegeluhen keluarga, gereja ras masyarakat ras si ingetlah mbelang denga kel siman peranin ras melala denga kel siman sampaten, mari saksiken dage maka Keluarganta tuhu – tuhu erkualitas ibas kai pe emaka ibas sie siingetlah bagi nina Paulus  “Dage ntah kai gia ibahandu, subuk ibas ngerana ntah ibas perbahanen, bahanlah e ibas gelar Tuhan Jesus, janah ngataken bujur man Dibata Bapa arah Ia.” (Kol 3 : 17)

Amin.
Rantauprapat 04 Juni 2014

Salam ras sentabi man banta kerina ibas kurang lebihna tulisen enda. Tulisan enda labo bahan baku Pekan Keluarga GBKP tulisen enda hanya bersifat diskusi man banta ibas Blog enda. Bimbingen Pekan Keluarga sibaku tetap si ipedarat Moderamen GBKP si isikapken PPWG GBKP.
Bjr Tuhan simasu – masu.

Pekan Keluarga Wari III. Anak (KA-KR ras PERMATA) Si Erkualitas

Pekan keluarga wari III. 03 Juni 2014.

Introitus : Lukas 2 : 40
Ogen : I Samuel 3 : 1 – 10, 19
Renungen : I Timotius 4 : 12 – 15
Tema : Anak (KA-KR ras PERMATA) Sierkualitas

Syalom.
Ibas wari pekan keluarga si pe 2 ken erbih kita enggo ipersingeti selaku orang tua gelah kita jadi orang tua siberkualitas. Ibas wari si pe 3 ken enda temata eme “Anak (KA – KR ras PERMATA) Si Erkualitas” adi sipersada duana tema enda maka banci siertiken maka adi orang tua enggo berkualitas maka anak – anak pe harus ka berkualitas ibas kerina sisi dampar kegeluhenna subuk ibas ilmu pengetahuan ras ibas spiritualna. Hal sienda perlu kel siperdiateken erkiteken lit si idah genduari kecendrungen maka manusia enggo lebih mementingken rasio emaka IQ (Intelligence Quotient) ipakai sebagai tolak ukur utama kualitas sekalak jelma tanpa ngenehen kegeluhen spiritualna ras pemikiren sibagenda pe enggo engkenai kegeluhen keluarganta siteridah ibas kita erlumba mereken pendidiken si tinggi man anak – anakta, tentu saja ibas kita mereken pendidiken si tinggi man anak – anakta labo salah ras harus memang sibereken ilmu pengetahuan man anak – anakta guna bekalna ibas masa depan, tapi ibas sie mekatep ka pe terjadi pendidikan siberat sebalah antara pendidiken formal ras pendidikan spiritual. Ibas gambaren sideban si idah ka pe genduari melala kegeluhen keluarga sila dame, umpamana rusur terjadi kekerasen ibas rumah tangga baik e secara emoional entah mental, litna rusur tindaken entah perlakuken kurang bijaksana, kurangna kekelengen terutama man anak – anak itengah jabu simengakibatken terjadi pertumbuhen kepribadian sila seimbang antara kognitif, emosi ras spiritualitas anak – anak i tengah jabu.

Sebagai anggota keluarga tentu ateta maka keluargata lit ibas dame, ibas pengarapen sibage, wari si erbih isingetken man banta, kita sebagai orang tua nge sibertanggung jawab guna nehkenca, bagepe ibas pengarapen temanta ibas wari si pe 3 ke enda eme gelah kegeluhen anak – anakna erkualitas. Secara lembaga gereja, gerejanta pe ersura – sura gelah kerina kegeluhen ngawan niperpulungen nggeluh ibas kedamen, erkiteken sie maka gerejanta pe erbahan program guna mencapai kegeluhen si erkualitas e alu erbahan program pelayanen Mamre – Moria – Permata ras KA/KR, alu pengarapen arah program pelayanen lembaga gerejanta e seh kerina sura – sura keluarga ngawan GBKP nggeluh alu dame ibas jabu,ibas sie tentu saja, guna memantapken program e iarapken kerina peran sertanta selaku ngawan guna mewujudkenca ibas kita berperan serta hadir ibas setiap kegiaten lembaga gerenjanta ras mendukungsa secara moril ras materi.

Wari enda enda temata “Anak (KA/KR ras PERMATA) Si Erkualitas” erpalasken I Tim 4 : 12 – 15. Piga – piga poin si banci si idah arah bahan oratenta enda eme :

1. Timotius eme sekalak Yahudi asli ras ndatken pengajaren kerna undang – undang Tuhan menaken ibas ninina Lois ras terus ku nandena Eunike (II Tim 3 : 15). Timotius erkiniteken ibas kitik – kitikna nari ras igelari “anak rohani” ras jadi kebanggan man Paulus ibas ngataken Timotius anakna rohanina (I Tim 1 : 2).
2. Paulus menuntut gelah Timotius encidahken dirina sebage kalak si la banci ianggap enteng, emaka ibas sie Paulus menuntut Timotius gelah tetap jadi usihen man kerina kalak sitek, ibas pengerana, ibas lagu langkah, ibas nehken keleng ate, ibas kiniteken ras ukur si bujur. Lima  karakter sienda me siarapken Paulus  ilakoken ras i praktekken Timotius  i tengah – tengah kegeluhen kalak Efesus si enggo bobrok ibas kerina moral kegeluhen simehuli (ay, 12 ).
3. Paulus tetap mpersingeti Timotius makeken kesempaten silit guna ngoge Pustaka si Badia ras kata e iajarkenna man kerina perpulungen, alu bage kalak sienterem ngidah kemajun Timotius ibas kiniteken ras kerina perbahanenna (Ay, 13 – 15).

Bageme pengajaren/persinget si isehken Paulus man Timotius, sebab Paulus sendiri pe meteh kerna tantangen kegeluhen ihadapi Timotius i Efesus, ras ibas sie  Paulus ermeriah ukur sebab Timotius ngasup nggeluh bagi si iarapken Paulus. Ibas kegeluhenta sigenduari pe tentu melala tantangen si man hadapenta, terlebih – lebih nandangi kegeluhen anak – anakta sigenduari, pengaruh Tekhnologi salah sada sangat mempengaruhi anak – anakta, mekatep pe si idah maka alat – alat tekhnologi enggo jadi teman setia anak – anakta bermain game, FB, Chat OL, rsd. Pustaka si Badia hanya i oge tupung i gereja entah paksa – paksa tertentu. Kita sebagai keluarga pe mekatep melupaken kai siterpenting siateta sisehken man anak – anakta ras bangga kel kita adi si sehken kerina pemindon anak – anakta, emaka sikap pendidikenta pe genduari mendidik tanpa mereken pengertin ras kebijaksanaan, ertina ibas masa sigenduari lit kecendrungenta kita hanya memikirken pertumbuhen jasmani tanpa la kita perduli pertumbuhen rohani anak – anakta.

Arah perenungenta senda enda, kita ngidah kegeluhen Timotius sierkualitas ras peran serta keluargana, emaka marilah silumbaken cara kegeluhen Timotius ras keluargana ibas kegeluhen keluarganta ras sebage orang tua sisehkenlah siterpenting man anak – anakta gelah pagin kegeluhenna tuhu – tuhu erkualitas sierbahanca bangga kita sebagai orang tuana bagepe kegeluhen gerejanta.

Amin
Rantaprapat 03 Juni 2014.

Salam ras sentabi man banta kerina ibas kurang lebihna tulisen enda. Tulisan enda labo bahan baku Pekan Keluarga GBKP. Tulisen enda hanya bersifat diskusi man banta ibas Blog enda. Bimbingen Pekan Keluarga sibaku tetap si ipedarat Moderamen GBKP si isikapken PPWG GBKP.
Bjr Tuhan simasu – masu.