PJJ GBKP. “Bukalah Perukurenndu” (Berwawasan Luas) Kuan – kuanen 8 : 1 – 12

PJJ. Tgl 22 – 28 Juni 2013

Ogen : Kuan – kuanen 8 : 1 – 12
Tema : “Bukalah Perukurenndu” (Berwawasan Luas)

Syalom.

      “La kin nggedang perukurenna ntah gendek kel perukurenna” Kata enda me ibelasken nandangi kalak sikurang bijaksana ibas erbahan sada keputusen ntah ibas ngelakoken sada tindaken simerugiken dirina sendiri ntah kalak sideban. Kebaliken ibas sie ibelasken pujin man kalak singasup erbahan keputusen ras tindaken sitepat ibas situasi si sulit alu ngataken : “mbages tuhu carana rukur ntah nggedang tuhu perukurenna”. Alu dua contoh enda maka “Perukuren” ndatken peranan si penting ibas kegeluhen ibas muat pertimbangen – pertimbangen simehuli.

      Tema PJJ-nta sekali enda “Bukalah Perukurenndu” (Berwawasan Luas) erpalasken Kuan – kuanen 8 : 1 – 12. Perukuren ibas temata enda iertiken kubas berwawasen luas alu makna ngasup rukur secara simbages entah secara komprehensif. Guna lebih jelasna mari sigar – gari tema ras oraten PJJ-nta sekali enda ras epengarapen kita maka banci ertambah – tambah kualitas kegeluhenta ibas ertambahna wawasennta ras teraplikasiken ibas kegeluhenta si tep – tep wari.

• Kitab Kuan - kuanen enda mbelin kel pengaruhna ras terkenal ibas ibas kalak Israel sebab pengajaren si isehken ibas kitab enda erisisken “hikmat” (hokhmah) singajarken kerna kegeluhen eragama, cara kegeluhen si payo, kata ajar ras cara makeken kepentaren sirehna ibas Dibata nari alu nggeluh erkemalangen ras mehamat man Tuhan.

• Secara umum “hikmat” iertiken kubas kemampuan, keterampilen, pemikiren intelektual si ibutuhken sekalak manusia sebagai petunjuk (penuntun) ibas kegeluhen si tep – tep wari guna banci ngaturken kegeluhenna alu mehuli. Tapi pengertin “hikmat” ibas kitab Kuan – kuanen la hanya terjeng kubas pengertin kemampuan keterampilen, pemikiren “intelektual” ntah sekedar tahu. Tapi mereken pengertin si lebih mbages, “hikmat” eme kecerdasen simelebihi kemampuan, keterampilan ras pemikiren “intelektual” manusia, si ibereken Dibata alu tujun gelah manusia banci ndalani kegeluhenna sue ras peraten Dibata ibas erti kata berpikir ras bertindak bagi peraten Dibata..

• Kuan – kuanen 8 : 1 – 12 enda mpetandaken “hikmat” (kepentaren) bagi sekalak si erlebuh ras erdilo, idatas uruk itepi dalan, iserpang – serpang, i pintu gerbang kuta, man kalak si kurang dewasa ras kalak lenge. Ijenda penulis ngataken bage me pentingna ras ergana kepentaren ibas kerina kegeluhen si itujuken man kerina jelma ras secara personal gelah manusia banci ertanggung jawab nandangi kegeluhenna selaku anak Tuhan (ay,1 – 5). Jenari penulis nuriken kerna sifat “hikmat” (Kepentaren) sendiri, si la erngena ate nandangi kata guak simabai kalak papak (ay. 6 – 9) ertina penulis nggambarken lit dua macam prilaku kegeluhen manusia singgeluh ibas “hikmat” ras sila nggeluh ibas “hikmat. Ibas penjelasen akhir penulis ngataken kerna erga “hikmat” e simelebihi kerina asangken si idarami manusia alu mbandingkenca ras perak, emas murni entah permata (ay. 10 – 12).

     Bageme kitab kuan – kuanen enda ngerana kerna pentingna ras perluna “hikmat” (kepentaren) ibas geluhta, sebab“hikmat” (kepentaren) si rehna ibas Dibata nari mabai manusia nggeluh alu mehuli ibas perubahen cara pandang ras cara rukur ibas alam kerohanian, siwujudnyatana teridah ibas kita ngasup erbahan pertimbangen – pertimbangen si mehuli, ngasup erbahan keputusen si tepat ibas keadaan si sulit, ngasup mengendaliken diri, ngergai kalak sideban, nandai dirina sendiri, cermat, arif, tenggang rasa, rsd. Dage rikutken temanta sendah “Bukalah Perukurenndu” (Berwawasan Luas), tentu eme ateta jadi ibas geluhta emaka gelah banci kita seh kubas pengarapen tema PJJ-nta sekali enda, sipemenana si arus tetap silakoken selaku kalak si tek eme tetap nggeluh erkemalangen man Tuhan, sebab Dibata sendiri kap sumber “hikmat” situhu – tuhu (Kuan –kuanen 1 : 7a), jenari maka siperlengkapi dirinta alu nambahi pemeteh, erlajar arah pengalamen ras nambahi pengertin kerna kearifen nggeluh sebage faktor pendukung si memperlengkapi dirinta ibas mbuka perukurenta (wawasenta) sebage kalak  simbages perukurenna .
“wisdom is not knowledge and knowledge is not wisdom”

Amin.
Rantauprarapat 20 Juni 2014

Salam ras sentabi man banta kerina ibas kurang lebihna tulisen enda. Tulisan enda labo bahan baku PJJ GBKP. Tulisen enda hanya bersifat diskusi man banta ibas Blog enda. Bimbingen PJJ GBKP si baku tetap si ipedarat Moderamen GBKP si isikapken PPWG GBKP.
Bujur Tuhan simasu – masu.

PA – Mamre : “Pebadiakenlah Wari Sabat” Kel 20 : 8 – 10.

PA – Mamre Tgl 15 – 21 Juni 2014

Ogen : Kel 20 : 8 – 10
Tema : “Pebadiakenlah Wari Sabat”

Syalom.
Umumna genduari wari “sabat” (minggu) imaknai sebage alu erbage – bage makna, mekatep sibegi ntah ibelasken ibas status media soaial FB, Tweet, BBM, rsd, eme “HAPPY SUNDAY”, banci jadi sulit kita memahami kai situhuna makna ungkapen e, sebab ungkapen banci imaknai alu pengertin sebage seruan : wari enda wari Tuhan, ungkapen selamat beribadah ras banci jadi hanya mengungkapken selamat hari minggu alu makna hari libur.

Tema PA- Mamreta ibas minggu enda “Pebadiakenlah Wari “Sabat” sebage wari si labanci lang si ergaken ibas kegeluhenta selaku kalak kristen, sebab e pedah si ipeseh Dibata ibas pedah si pe 4 ken ibas pedah 10. Guna lebih jelasna mari sigargari – gari kai si imaksudken Dibata mereken pedah enda man kalak Israel ras uga kalak Israel memaknai pedah e ras mbera banci si aplikasiken ibas kegeluhenta sigenduari, terlebih kita selaku Mamre Imam i tengah – tengah jabunta si arus jadi teladan ibas kerina kegeluhen kiniteken.

•  Kalak Israel ibas keagamanna memaknai “sabat” sebage wari Tuhan erpalasken pedah si pe 4 ken ibas 10 pedah Dibata : “Inget wari sabat maka pebadiaken kam e. Enem wari banci kam erdahin, maka idungi kam siman dahindu kerina, tapi wari sipepituken eme kap sabat ni Yahwe. Dibatandu ; ijem ola dahi siman dahindu, ola kam, ola anakndu dilaki ntah anakndu diberu, ntah asuh – asuhendu, tha kalak pertandang si nibas kerabangenndu pe ola. Sebab ibas enem wari enggo itepa Yahwe langit ras doni, ras lawit ras kasa kai isisna ; jenari ngadi Ia ibas wari pepituken. Emaka i pasu – pasu Yahwe wari sabat, ipebadiakenNa”. Erpalasken pedah enda me wari “sabat” tuhu – tuhu i ergaken ras i pebadiaken kalak Israel. Pemahamen kerna wari Tuhan e pe lebih iergaken sebab kalak Israel memahami maka Tuhan sebage pencipta pe ngadi erdahin kenca Ia dung nepa doni ibas wari pepituken ras mpebadiaken wari si pepituken e (Kej 2 : 2 – 3). Ibas pemahamen sienda maka ibas konteks PL wari “sabat” imaknai waktu guna ersembah man Dibata (Kel 20 : 10 – 11 ; Ul 11: 13 ; 15 : 14 ; Kel 2 : 25).

• Adi si perdiateken isi pedah si pe 4 ken enda, sisi kemanusian pe jadi sada pertimbangen eme gelah manusia banci istirahat kenca 6 wari ia erdahin (Kel. 23:12; Ul. 5:14). Adi sikaitken kubas sejarah kegeluhen kalak Israel maka pemaknaan enda ngidah kegeluhen bangsa Isarel sebage bangsa budak i Mesiar si arus erdahin tep – tep wari alu la erngadi – ngadi lebih kurang 430 thn tanpa istirahat dingen la banci ersembah man Tuhan. Alu bage pedah si bereken man kalak Israel enda sekaligus ngingetken kerna kegeluhen kalak Israel sindatken kiniseran i Mesir (Bd. Kel 20 : 2 ; Ul 5 : 15).

• “Sabat” pe imaknai sebage wari si berbeda ras wari – wari sidebanna, eme sebage wari si khusus gelah banci lebih fokus memusatken diri guna mpemuliaken Tuhan ibas kegeluhen kerohanian (Kel 20 : 9 – 11 ; bd. Kej 2 : 2 – 3 ; Yes 58 : 13 – 14).

• Peribadahen ibas wari “sabat” sekaligus ncidahken kekhususen ntah mpetandaken bangsa Israel sebage bangsa sikerajangen Dibata (Kel 13 : 13).

Bageme gambaren kerna pentingna wari “sabat” ibas kegeluhen kalak Israel, terlepas kedungenna bangsa e memahami kerna wari “sabat” e secara harfiah, tapi arus sinen makna ibas kalak Israel ngergaken wari “sabat” sebage wari Tuhan ras tuhu – tuhu mpebadiaken wari e sebage wari Tuhan. Ibas PB memang si idah Yesus mbebasken kerina pengikutna alu tekanen kerna pearturen wari “sabat’ kalak Jahudi secara harfiah (Mat 12 : 1 – 8, Mrk 2 : 23 – 28, Luk 13 : 10 – 17) tapi perdiatekenlah maka Yesus labo menghilangken makna “sabat” e tapi hanya mengalihkenca kubas aktifitas silebih komprehensif bagi singena ate Tuhan sebab kalak Jahudi enggo salah menggunaken wari “sabat” guna kesombongen rohani.

Alu bage maka prinsip – prinsip “sabat” arus tetap berlaku man kalak kristen sebab e ketetapen Dibata kap (Kej 2 : 3 ; Kel 20 : 11 bd. Mrk 2 : 27) si iitetapken sebage wari si sibadia si iarus iergai kalak Israel (Yeh 20 : 12). Jadi sue ras temata sendah enda “Pebadiakenlah Wari Sabat” rikutken kerina pemahamen si enggo isingetken ndai, maka ibas kegeluhenta sigenduari pe, lalit alasenta guna la mpebadiaken wari “sabat”, labo ibas erti pemahamen harfiah kalak Jahudi tapi lebih memahamisa maka “sabat” si ibereken Dibata man banta eme waktu simeherga kel guna ngingetken man banta maka Dibata enggo mereken wari man banta guna banci ersembah man baNa gelah banci lebih sitandai Dibata simada kerina kegeluhenta. Emaka entah kai gia alasenta sedekah enda sicubakelah merenugkenca ulang. Ula siban alasen la sempat ku gereja entah ngikuti kerina kegiaten gerjeranta hanya alu alasen – alasen praktis ras si ingetlah maka kita enda tinepa Dibata kap, si itepa guna kemulian Tuhan. Erkiteken sie maka kai pe si ilakoken ibas geluhta arus e mpemuliaken Tuhan terlebih beribadah ibas ibas wari “sabat” (Minggu) sebab e memang hukum si arus idalanken.

Penutup Ibas PA-nta enda, lit 3 contoh percakapen si kusingetken man banta kerina ras contoh enda situhuna enggo rusur sibegi ibas percakapen sehari – hari kerna wari “Sabat” eme :

Contoh si pemena.
Moukup   :  Uga e Mbergeh ….. kede kuidah kam lalap, la sendah kam ku juma ?
Mbergeh :  Sendah lang nak kop … sabat me, erbih aku Medan nari kerja – kerja ngadi lebe.
Ibas percakapen enda “sabat” lebih iertiken kubas pengertin wari istirahat.

Contoh si peduaken.
Cinur   :  Eta ku gereja Lancip, wari “sabat” sendah!
Lancip :  Aku sendah la ku gereja Cinur, enggo mbuesa “sabat-ku” sada minggu enda
Ibas percakapen enda “sabat” imaknai sebage wari/waktu si enggo terbuang.

Contoh si peteluken.
Longge :  Pagi enggo wari “sabat” me ku gereja kita pagi Pelcik ?
Pelcik    :  E .. ue  Longge, gereja kita pagi, sebab pagi wari ni Dibata !
Ibas percakapen enda “sabat” imaknai sebage wari si badia, wari ersembah man Dibata.

Ibas 3 contoh enda, kenca kita er-PA Mamre sendah ….. siapai pemahamenta ?

Amin.
Rantauprapat 17 Juni 2014.

Salam

Selamat er PA – Mamre

Salam ras sentabi man banta kerina ibas kurang lebihna tulisen enda. Tulisan enda labo jadi bahan baku Mamreta-nta, tulisen enda hanya bersifat diskusi man banta ibas Blog enda. Bimbingen Mamre sibaku tetap si ipedarat Moderamen GBKP si isikapken Mamre Pusat.
Bujur Tuhan simasu – masu.

PJJ GBKP. Jeremia 7 : 1 – 7 “Nggeluh I Tengah Jelma Si Enterem”

PJJ GBKP 15 – 21 Juni 2014

Ogen : Jeremia 7 : 1 – 7
Tema : “Nggeluh I Tengah Jelma Si Enterem”

Syalom.

       Kegeluhen kalak kristen ibas nggeluhken panggilenna ibas masyarakat arus tetap nggeluh ibas konsep si sesuai ras ajaren kekristenen ras mempertahanken kinitekenna alu nggeluh ibas kebenaren kristen secara mendasar. Tapi mekatep ibas kinata kegeluhen, enterem kalak kristen la ngasup nggeluh ibas konsep kegeluhen kristen e, lit nge pengakun entah mengakui Tuhan, tapi la nggit teriket kubas ajaren Tuhan dingen riahen iakapna nggeluh alu cara – cara doni.

        Tema PJJ-nta sekali enda “Nggeluh I Tengah Jelama Si Enterem”. Alu tema enda banci turah penungkunenta, uga kin seharusna kita nggeluh itengah – tengah jelma sienterem (bermasyarakat) ? Ibas PJJ-nta sekali enda, aku la njabab kerna persoalen sie, tapi lebih kuarahken kita kubas pengenalen dirinta selaku kalak kristen si enggo itebus Kristus ibas krina dosa – dosanta nari nari. Mari sigar – gari Jeremia 7 : 1 – 7 bahan PJJ-nta sekali enda, ngenen kubas kegeluhen Jeremia, si enggluh badia itengah bangsa si lanai badia, nabi si pang mandang ise saja singelakoken dosa gelah jera ras dingen nggeluh ibas persadaan ras Tuhan.

• Yeremia eme salah sada nabi si jadi arah prakarsa Tuhan, labo atas keinginenna sendiri, tapi sekalak nabi si ipilih Tuhan ope denga pe Jeremia tubuh (Jer 1 : 5). Ibas awalna Jeremia menolak nandangi pendilo ras peneguhen Tuhan alu alasen, ia nguda denga. Sebab ibas paksa sie memang umurna 18 tahun denga ras ibas paksa sie lit sada budaya ibas kalak Yahudi, maka sekalak adi umurna 18 tahun denga, lenga banci ngajar entah pe mereken nasehat sebab ianggap kurang bijaksana, eme maka nina Jeremia “… O Tuhan si erdolat, la ku eteh uga melasken kata, ngudasa denga aku”. Jeremia menolak alu alasen kemanusianna, tapi alasenna e tulak Tuhan ras tetap neguhken Jeremia jadi nabiNa ras Tuhan erpadan man Jeremnia, maka Tuhan tetap nemani Jeremia ibas meritaken kata Dibata ku kerina bangsa – bangsa (Jer 1 : 6 – 8).

• Ibas pelayanenna Jeremia ndatken perlawanen-perlawanen ibas kalak Yehuda erkiteken Jeremia mbukaken kerina dosa kalak Israel si melanggar hukum Tuhan alu ersembah man berhala – berhala ras ngelakoken perbahanen si la ngena ate Tuhan. Lit pe cara kegeluhen kalak Isarel ibas paksa e, eme : tek nandangi ranan kalak penipu, lanai ngelakoken perbahanen sibujur, lanai mperdiateken keadilen, nindas kalak miskin, janda ras anak yatim, ngamburken dareh kalak sila ersalah dingen nembah man dibata – dibata Babel (Jer 7 : 4 – 6).

• Ibas perbahen kalak Isarel si jahat e, Jeremia nehken berita ibas Tuhan nari maka bangsa e arus robah, alu ngubah kerina lagu langkah ras perbahanen bangsa e, sebab adi la jera, maka Tuhan perehken hukumNa man bangsa e tapi adi bangsa e jera, maka Tuhan tetap mereken bangsa e tading ibas taneh perpadanen Tuhan (Jer 7 : 7). Aminna Jeremia enggo mpeseh kata Tuhan, tetap saja bangsa Israel la jera ibas mperobahi kerina lagu langkahna. Emaka kedungenna bangsa e ndatken penghukumen ibas Dibata nari ras i buang ku Babel dekahna 70 thn.

• Alu bage lit dua hal penting si idah ibas Jer 7 : 1 – 7 enda eme kerna pendahin entah peran khusus Jeremia i tengah – tengah kegeluhen bangsa Israel eme : nehken penghukumen ras mritaken berita Pertobaten man bangsa Dibata. Dingen secara pribadi Jeremia tetap ncidahken kualitasna sebage nabi Tuhan, sebage kalak sibenar itengah kegeluhen si la benar ras sitik pe la nggit terkontaminasi ras erkompromi alu cara – cara kegeluhen bangsa Isarel si erdosa (Jer 1 : 10 ; 7 : 1- 3, 7).

        Ibas kegeluhenta sigenduari, adi siperdiateken kegeluhen kalak Israel ibas zaman nabi Jeremia maka enterem denga ka kalak kristen singgeluh alu cara – cara kegeluhen kalak Israel. Jeremia nehken kata Tuhan gelah bangsa e jera, maka bangsa e labo jera malah semakin mengerasken hati ibas kerina berita pertobaten si ibegina, emaka sejarah mencatat bangsa Isarel piga – piga kali ibuang Dibata jadi tabanen ras ndatken erbage – bage kiniseran. Ibas kegeluhen kekristenen sigenduari banci  jadi cara kegeluhen kalak Israel e siterjadi, alu gambaren buena genduari praktek dosa siterjadi ibas kerina profesi kegeluhenta, sebab banci jadi kita labo sekalak sibujur ibas ndalani kerina kegeluhenta subuk e ibas krina profesi entah pe ibas keluarga ras ibas sie, berita pertobaten si isehken man banta, banci jadi la erbahanca kita jera ras berita pertobaten e sianggap hanya sebagai semboyan entah slogan gereja siarus ibelasken ! Kusingetken salah sada contoh : menurutku penagamatenku maka jemaat genduari lebih senang i hibur asangken i tegur, emaka khotbah – khotbah si mandang dosa genduari kurang i senangi, ras lit pe genduari tuntuten maka pengkhobah hadir min bagi sekalak motivator sidem alu kata – kata bijak ras menginspirasi, ibas sienda banci jadi lanai terbedaken kita antara pelayan Tuhan ras motivator. Bagepe lit genduari fenomena ibas pelayan Tuhan, maka ia lebih senang menghibur asangken menegur, alu alasen “mimbar bukan untuk menegur jemaat tapi menghibur jemaat”. Ibas kemajun sideban Jemaat pe semakin berani ras alu terang – terangen ia ngajari pelayan Tuhan gelah ula rusursa mandang jemaatna, adi ate pelayan e, ia tetap i senangi ras kegeluhenna i perdiateken jemaat. Gambaren sienda ka me genduari melala jadi ibas gereja – gereja ras akibatna enterem kalak kristen la jadi kalak kristen yang sesungguhnya. Ibas sienda ngarap kita gereja-nta tetap benar ibas ndahiken dahinna bagepe perpulungen tetap tutus ras tuhu – tuhu setia nggeluh ibas kebenaren Tuhan.

        Penutup kata ibas PJJ-nta sekali enda kusehkan mna banta : berita Pertobaten si isehken Jeremia man kalak Israel sekaligus jadi persinget banta ras adi lit denga silenga jera ras mengubah kerina lagu langkah bagi singena ate Tuhan, asa kai nari kin dekahna ateta nggeluh ibas dosa, kemunafiken ras memelihara dosa yang siterbuni ? ibas paksa silewat pernah kusingetken arus lit 4 perubahen nandangi kalak si enggo mengalami pertobaten sejati eme : mengalami perubahan pikiren (change of mind), perubahen hati (change of heart), perubahan hidup (change of life) ras perubahan kasih sayang (change of affection). Ertina asakai kalak si enggo jera alu tuhu – tuhu maka lit perubahen diirina sierbahanca ia lebih memikirken hal – hal rohani/sorgawi ketimbang hal – hal si itawarken doni (bdk, II Kor 4 : 18 ; Rom 8 : 5 – 9). Ras kalak kristen si enggo seh kubas perubahen sienda maka pasti ia nggeluh sikap ibas kegeluhenna i tengah – tengah jelma sienterem (masyarakat).

Dage Senina/ Turang ibas keleng ate Kristus :
        Tuhan erngena ate man kalak singakuken dosana dingen jera, jenari nggeluh ngikutken kerina perentahNa. Emaka bagi seruan pertobaten Jeremia man kalak Israel : “Ubahlah lagu langkah ras perbahanendu” siresponlah e bagi sirusur isingetken man banta “ Setiap kali Firman Allah di beritakan maka tiap – tiap pendengar harus merespon firman tersebut” … Uga ninta ?

Amin.
Rantauprapat 09 Juni 2014.

Salam ras sentabi man banta kerina ibas kurang lebihna tulisen enda. Tulisan enda labo bahan baku PJJ GBKP. Tulisen enda hanya bersifat diskusi man banta ibas Blog enda. Bimbingen PJJ GBKP sibaku tetap si ipedarat Moderamen GBKP si isikapken PPWG GBKP.
Bujur Tuhan simasu – masu.