PA – Mamre “Gereja Eme Nande Man Kalak Si Tek” MZm 131 : 1 – 3

PA – Mamre 29 Juni – 05 Juli 2014

Tema     :  “Gereja Eme Nande Man Kalak Si Tek”

Ogen     :  MZm 131 : 1 – 3

Syalom.

           

Menaken kata ibas PA-Mamreta enda secara singkat kuturiken man banta piga – piga kerna gerejanta GBKP dingen labo ateta ibas membanggaken gerejanta. Secara organisasi gerejanta GBKP menaken ibas zaman Zending nari maka gerejanta GBKP enggo hadir i tengah – tengah kegeluhen masyarakat/jemaat alu maba berita keselamaten ibas Yesus Kristus ras sekaligus maba perubahen nandangi kerina bidang kegeluhenta khususna man masyarakat Karo, umpamana ibas bidang pendidiken, kesehaten ras perekonomian. Ertina melala hal si enggo ilakoken gerejanta guna pembangunen kemanusian, siteridah ibas keberpihakenna nandangi kepentingen masyarakat/jemaat si ilayanina ras seh asa genduari  tetap berusaha jadi pilar pembangunen kemanusian itengah – tengah kegeluhen masyarakat/jemaat silayanina, umpamana arah dahin si ilakoken Parpem GBKP, Alpha Omega, Panti Asuhen Gelora Kasih, YAPOS, Bank BPR, rsd. Bagepe ibas masa sigenduari maka gerejanta tetap jadi nande simehuli man kerina pengungsi Sinabung.

Secara kerohanian, gerejanta pe tetap berusaha menumbuh kembangken kerohanian jemaatna alu pengajaren teologi ras ibadah sibenar, alu pengarapen gelah ngawan niperpulungen la bengket kubas pengajaren sipapak ngidahperkembangen gereja sigenduari ija melala gereja si enggo “macam – macam”, si hanya ndarami keuntungen arah jemaatna guna kepentingen pengurus ntah orang – orang tertentu saja ibas gereja. Ngidah sie kerina kita selaku ngawan bas gerejanta patut kel sikataken bujur man Dibata erkiteken gerejanta GBKP tetap erdalan ibas kebenarenNa sebage gereja. Lit memang piga – piga pelayanen gerejanta sikurang sempurna tapi sie kerina labo ngatakenca gerejanta la berhasil jadi “nande” guna anggota jemaatna, emaka bicara lit berita “simemburukken gereja” alu hasil penelitian ntah kai gia gelarna, maka kerina sikurang sempurna e, mungkin jadi erkiteken kurangna sikap kepeduliannta, keseriusenta nandangi gerejanta. Sebab lit ka nge memang si idah anggota gereja ngeranai ras mandangi ngenca pirasatna, mulai kin arah programna seh kubas sierdahin gereja (Pdt/Pt/Dk/Pengurus PJJ-Kategorial) kerina ipandangina tempa lalit simehulina si ilakoken gereja. Tapi mamang ka ateta, enggo pe la iakapna cocok tapi tetap denga nge je ia lalap pas bagi kambing Kalameka ncedai karang ngenca pengkebetna. Me si mehulina min ndai adi keleng kin atena gerejana me labo min mandangi saja pirasatna, tapi uga ia ikut muat bagin ibas mendukung dahin gereja. Ku singetken enda man banta erkiteken gerejanta GBKP situhuna enggo berhasil ibas ndahiken dahinna sebage gereja, gia lit kurang ntah lebihna  eme siman pekenanta ras – ras kulebe enda selaku kalak singergai ras engkelengi gerejana.

Tema PA ras tujun Mamreta sendah enda ningetken ras sekaligus pengajuk  man banta uga seharusna kita selaku warga gereja (Mamre) gelah lebih ngergai ras ngkelengi  gerejanta GBKP sebab ije kap kita jadi ngawan niperpulungen ni Tuhan Yesus. Guna banci kita lebih ngergai ras engkelengi gerejanta, mari tole erlajar kita arah kesaksian Daud rikutken bahan PA-Mamreta Mzm 131 : 1 – 3

• Mzm enda eme pertoton Daud man Tuhan ibas ia nggo nggejabken kerna lias ras keleng atae Dibata nandangi kegeluhenna sierbahanca ia jadi sekalak si sukses. Ibas pertotonna e Daud  mindo man Tuhan gelah ula min ia sempat jadi kalak si meganjang rukur entah pe jadi kalak simegombang erkiteken keberhasilenna. Ertina ibas pertotonna e Daud nggejapken maka Tuhan nge simemelihara kegeluhenna si erbahanca ia jadi kalak si sukses (ay. 31)

• Ibas penggejapenna iarak – arak Tuhan Daud pe muji Dibata ibas pertotonna alu ngataken “....enggo puas dingen dame pe kuakap, bali ras sekalak anak, dame iakapna iampun nandena, bageme pusuhku damena”. Daud nggambarken dirina ikawali ras itemani Tuhan bali ras sekalak nande simperdiateken kerina kegeluhen anakna alu keleng ate situhu – tuhu (ay. 32).

• Ibas kerina kiniulin Tuhan si enggo ialamina Daud pe njadiken pengalamen kegeluhenna ras Tuhan e jadi sada  kesaksin ras  sekaligus ngajuk kerina kalak Isarel gelah tetap ernalem ras tetap setia man Tuhan. (ay. 33).

Bageme Daud nggejabken pemeliharan Dibata nandangi geluhna ras naksikenca man Tuhan Dibata engekelengi kalak siernalem man baNa, alu mereken dameNa situhu – tuhu ibas kerina dampar kegeluhen ras naksikenna ibas kerina kegeluhenna. Ibas kegeluhenta pe pengalamen Daud enda banci  jadi ibas kegeluhenta alu ndatken pasu – pasu Tuhan  si simpar, emaka ibas kegeluhenta pe tetaplah kita tek man Tuhan singasup mereken kedamen situhu - tuhu man banta. Jenari ibas engkelengi gereja mari siusih salah sada sifat relegius situhu – tuhu ia ngergai ras engkelengi rumah pertoton sebab rumah pertoton emekap lambang kehadiren Dibata i doni, emaka ibas praktekna erkiteken kelengna ate kalak Jahudi nandangi rumah pertoton emaka kuja pe kalak e lawes tetap ingetna rumah pertotonna dingen ibas tep – tep ertoto maka la ia pernah  lupa notoken rumah pertotonna si enggo menyatu ras jiwana, gambaren penyatuan jiwa e bali ras dua kalak singenan, adi lenga jumpa lenga atena malem, emaka katawari pe lit perasaan tedeh guna jumpa rassa bageme perasaan kalak jahudi nandangi rumah pertoton.  Ibas kegeluhenta selaku Mamre si enggo nggeluh ibas kegeluhen si mbaru  maka sifat kegeluhen religiusta pe enggo melebihi sifat religius kalak Jahudi terlebih – lebih ibas kita ngergai ras engkelengi gerejanta, terlebih – lebih si idah uga gerejanta GBKP tetap jadi nande simehuli man kerina jemaatna/masyarakat, ibas njagai pertendinta gelah tetap ersada ras Dibata bagepe ngelakoken pelayanenna ibas ngelai kegeluhen jemaatna/masyarakat bagi singena ate Tuhan. Emaka mari kerina kita Mamre siergai ras sikelengi gerejanta alu erkarya ibasa seh maka kerina pagi jemaatna/masyarakat ermalem ate ibas kehadiren gerejanta GBKP.

Amin

Rantauprapat 30 Juli 2014. 

Salam

Selamat er PA - Mamre

Salam ras sentabi man banta kerina ibas kurang lebihna tulisen enda. Tulisan enda labo jadi bahan baku Mamreta-nta, tulisen enda hanya bersifat diskusi man banta ibas Blog enda. Bimbingen Mamre sibaku tetap si ipedarat Moderamen GBKP si isikapken Mamre Pusat.
Bjr Tuhan simasu – masu.

PJJ GBKP. “Erlajar Segedang Nggeluh” Kuan – Kuanen 15 : 31 – 33

PJJ Tgl 29 Juni – 05 Juli 2014

Ogen : Kuan – Kuanen 15 : 31 – 33
Tema : “Erlajar Segedang Nggeluh”

Syalom

Ibas menaken nulisken bahan sermon enda, kusungkun anak kami si sintua Teopilus si naik kelas dua SMP tahun enda. Ningku man bana, bang Teo : apa itu belajar dan apa gunanya kita belajar ? emaka nina njababsa : “belajar adalah sesuatu kegiatan dari tidak tahu menjadi tahu”. Alu jawapenna e maka ia hanya ngangkai erlajar e hanya “dari tidak tahu menjadi tahu”. Emaka ningku sekali nari nungkun man bana : Sampai kapan kita belajar ? nina ka ngaloi penungkunenku : selama hidup pak ! dan tidak cukup hanya sampai S3, kan Samsung sudah S5, sebentar lagi ada S6, S7 dan seterusnya nina sambil erhumor. Ibas jababna e senyum – senyum nari nge aku megi jababna.

Tema PJJ-nta sendah eme “Erlajar Segedang Nggeluh” ertujun guna ningetken man banta kerna pentingna erlajar dingen gelah kita la ermedu – medu ibas erlajar. Tema ras tujun PJJ-nta enda cocok  sebage salah sada strategi guna menunjang program gerejanta ibas “Peningkatan Kwantitas SDM Yang Berkwalitas”. Ertina alu erlajar iarapken maka reh meningkatna me kualitas jemaatta si semakin cerdas, terampil, kreatif, inovatif dingen nggeluh erkemalangen man Tuhan. Ibas pengarapen sibagenda la banci lang arus maka kita terus erlajar ibas segedang kegeluhenta. Umumna lit dua cara erlajar formal ras informal. Secara formal lit masa ras waktu siarus idalani ibas erlajar dingen ndatken ijajah sebagai tanda enggo tammat erlajar. Secara informal kita erlajar rah kerina si lit ras kai siterjadi ibas kegeluhenta sila i iket masa ntah waktu dingen la lit tammatna erkiteken ibas setiap waktu lit rusur perubahen siterjadi ras simpengaruhi umpamana situasi ras kondisi lingkungenta, kemajuan IPTEK kemajun zaman, rsd, alu bage maka la banci lang kita arus tetap erlajar guna banci meteh kai siterjadi,,mengatasi, beradaptasi, mengolah informasi, rsd.

Secara umum erlajar eme sada proses guna ndatken ketrampilen ibas membangun gagasen/pengangkaan nandangi informasi bagepe pengalamen, alu tujun gelah sekalak si erlajar banci mengubah pandangenna kerna diri, mengkondisiken diri, merekonstruksi mental, rsd. Ibas pengertin sienda me maka kita erlajar segedang nggeluh sebage sada usaha guna mengembangken ras nambahi kualitas diri ibas erbage – bage hal sierguna man dirinta ras man kalak sideban ras adi e terlaksana alu mehuli, emaka enggo sifungsiken dirinta alu mehuli terlebih  kegeluhenta ibas Tuhan.

Rikutken oraten PJJ-nta Kuan – kuanen 15 : 31 – 33, ituriken me man banta kerna ulih erlajar, akibat man si la nggit erlajar ras nuriken palas kerna kepentaren :

• Ibas perulihenna, kalak singgit megiken ajar igelari ntah ndatken identitas kalak pentar. Erkiteken kalak pentar kin ngenca ngasup megiken kata ajar guna mengevaluasi diri alu la menolak/mengabaiken/meremehken pengajaren si isehken man bana (ay. 31).

• Ibas perulihen sidebanna isingetken pe maka kalak pentar e ndatken kehamaten. Kehamaten e idatken erkiteken kepentaren (hikmat) mabai kegeluhen dem alu tindaken – tindaken kebijaksanaan ras tentu saja asakai kalak si dem alu kepentaren (kebijaksanaan) ihamati erkiteken kegeluhenna mereken makna simehuli man kerina manusia (ay. 33b).

• Kenca isingetken dua perulihen kerna kalak si nggit megiken ajar maka penulis pe ningetken akibat man kalak si la nggit megiken ajar eme bana pe la iakapna merga. Ciri kegeluhen kalak sibage biasana, la mpersoalken kerna si benar ntah salah, la nggedang rukur/ertimbang ibas kai si atena ilakokenna ras la memperhitungken akibat ibas kai si ilakokenna (ay. 32a).

• Ibas nuriken palas kerina kepentaren, penulis Kuan – kuanen tetap menekanken, erkemalangen man Tuhan nge palas kerina persekolahen. Alu pengertin maka ibas erkemalangen e lit rasa hormat ras ketaaten si situhu – tuhu ibas megiken, ngergai ras ndalanken kerina perentah Tuhan sebage syarat utama guna ndatken kepentaren (ay. 33).

Bageme oraten PJJ-nta sekali enda nuriken man banta kerna uga kita sebage sekalak “Pembelajar” siarus erlajar segedang nggeluh, emaka mari dage erlajar kita ibas segedang geluhta, erlajar ibas erbage – bage hal guna ndatken makna kegeluhen si tuhu – tuhu alu pengajaren Tuhan. Ibas kai kita perlu erlajar ? ku kutip piga – piga ungkapen Andar Ismail nina : erlajarlah tahu diri ras mengenal diri alu nandai kelebihen ras kekurangenta, erlajarlah nandai kalak sideban ras ngaloken kalak sideban uga litna, erlajarlah ngataken bujur ibas kerina hal, erlajarlah menghadapi kesuliten kegeluhen sebab la selamanya kegeluhenta enda erdalan alu mulus, erlajarlah jujur ibas kerina hal, erlajarlah jadi kalak bijak, ngatur waktu, njaga kesehaten ras ertanggungjawab, erlajarlah sabar, mengalah, memaafkan, erlajarlah ibas menerima keadaan, erlajarlah menyuruh diri sendiri ras melarang diri sendiri, erlajarlah memanfaatken kesempaten entah menciptaken kesempaten, erlajarlah hemat, rajin, ulet, tangguh, gigih, erlajarlah berjiwa besar, mengahargai perbedaan, mengagumi kalak siberhasil, erlajar memuji kalak siberprestasi, ras erlajarlah menghitung hari bagi nina pe Mzm “Dage ajari kami ngertiken uga gendekna umur geluh kami, gelah kami jadi kalak pentar” (Mzm 90 : 12) alu menyadari maka geluh enda kentisik kap ngenca, ras alu pertoton man Tuhan ninta “Tuhan ajarilah aku …” (Mzm 119).

“Selamat Menjadi Seorang Pembelajar”

Amin.
Rantauprapat 28 Juni 2014

Selamat PJJ.
Salam ras sentabi man banta kerina ibas kurang lebihna tulisen enda. Tulisan enda labo jadi bahan baku PJJ-nta, tulisen enda hanya bersifat diskusi man banta ibas kita Group enda. Bimbingen PJJ sibaku tetap si ipedarat Moderamen GBKP si isikapken PPWG GBKP.
Bjr Tuhan simasu – masu.

PJJ GBKP. “Bukalah Perukurenndu” (Berwawasan Luas) Kuan – kuanen 8 : 1 – 12

PJJ. Tgl 22 – 28 Juni 2013

Ogen : Kuan – kuanen 8 : 1 – 12
Tema : “Bukalah Perukurenndu” (Berwawasan Luas)

Syalom.

      “La kin nggedang perukurenna ntah gendek kel perukurenna” Kata enda me ibelasken nandangi kalak sikurang bijaksana ibas erbahan sada keputusen ntah ibas ngelakoken sada tindaken simerugiken dirina sendiri ntah kalak sideban. Kebaliken ibas sie ibelasken pujin man kalak singasup erbahan keputusen ras tindaken sitepat ibas situasi si sulit alu ngataken : “mbages tuhu carana rukur ntah nggedang tuhu perukurenna”. Alu dua contoh enda maka “Perukuren” ndatken peranan si penting ibas kegeluhen ibas muat pertimbangen – pertimbangen simehuli.

      Tema PJJ-nta sekali enda “Bukalah Perukurenndu” (Berwawasan Luas) erpalasken Kuan – kuanen 8 : 1 – 12. Perukuren ibas temata enda iertiken kubas berwawasen luas alu makna ngasup rukur secara simbages entah secara komprehensif. Guna lebih jelasna mari sigar – gari tema ras oraten PJJ-nta sekali enda ras epengarapen kita maka banci ertambah – tambah kualitas kegeluhenta ibas ertambahna wawasennta ras teraplikasiken ibas kegeluhenta si tep – tep wari.

• Kitab Kuan - kuanen enda mbelin kel pengaruhna ras terkenal ibas ibas kalak Israel sebab pengajaren si isehken ibas kitab enda erisisken “hikmat” (hokhmah) singajarken kerna kegeluhen eragama, cara kegeluhen si payo, kata ajar ras cara makeken kepentaren sirehna ibas Dibata nari alu nggeluh erkemalangen ras mehamat man Tuhan.

• Secara umum “hikmat” iertiken kubas kemampuan, keterampilen, pemikiren intelektual si ibutuhken sekalak manusia sebagai petunjuk (penuntun) ibas kegeluhen si tep – tep wari guna banci ngaturken kegeluhenna alu mehuli. Tapi pengertin “hikmat” ibas kitab Kuan – kuanen la hanya terjeng kubas pengertin kemampuan keterampilen, pemikiren “intelektual” ntah sekedar tahu. Tapi mereken pengertin si lebih mbages, “hikmat” eme kecerdasen simelebihi kemampuan, keterampilan ras pemikiren “intelektual” manusia, si ibereken Dibata alu tujun gelah manusia banci ndalani kegeluhenna sue ras peraten Dibata ibas erti kata berpikir ras bertindak bagi peraten Dibata..

• Kuan – kuanen 8 : 1 – 12 enda mpetandaken “hikmat” (kepentaren) bagi sekalak si erlebuh ras erdilo, idatas uruk itepi dalan, iserpang – serpang, i pintu gerbang kuta, man kalak si kurang dewasa ras kalak lenge. Ijenda penulis ngataken bage me pentingna ras ergana kepentaren ibas kerina kegeluhen si itujuken man kerina jelma ras secara personal gelah manusia banci ertanggung jawab nandangi kegeluhenna selaku anak Tuhan (ay,1 – 5). Jenari penulis nuriken kerna sifat “hikmat” (Kepentaren) sendiri, si la erngena ate nandangi kata guak simabai kalak papak (ay. 6 – 9) ertina penulis nggambarken lit dua macam prilaku kegeluhen manusia singgeluh ibas “hikmat” ras sila nggeluh ibas “hikmat. Ibas penjelasen akhir penulis ngataken kerna erga “hikmat” e simelebihi kerina asangken si idarami manusia alu mbandingkenca ras perak, emas murni entah permata (ay. 10 – 12).

     Bageme kitab kuan – kuanen enda ngerana kerna pentingna ras perluna “hikmat” (kepentaren) ibas geluhta, sebab“hikmat” (kepentaren) si rehna ibas Dibata nari mabai manusia nggeluh alu mehuli ibas perubahen cara pandang ras cara rukur ibas alam kerohanian, siwujudnyatana teridah ibas kita ngasup erbahan pertimbangen – pertimbangen si mehuli, ngasup erbahan keputusen si tepat ibas keadaan si sulit, ngasup mengendaliken diri, ngergai kalak sideban, nandai dirina sendiri, cermat, arif, tenggang rasa, rsd. Dage rikutken temanta sendah “Bukalah Perukurenndu” (Berwawasan Luas), tentu eme ateta jadi ibas geluhta emaka gelah banci kita seh kubas pengarapen tema PJJ-nta sekali enda, sipemenana si arus tetap silakoken selaku kalak si tek eme tetap nggeluh erkemalangen man Tuhan, sebab Dibata sendiri kap sumber “hikmat” situhu – tuhu (Kuan –kuanen 1 : 7a), jenari maka siperlengkapi dirinta alu nambahi pemeteh, erlajar arah pengalamen ras nambahi pengertin kerna kearifen nggeluh sebage faktor pendukung si memperlengkapi dirinta ibas mbuka perukurenta (wawasenta) sebage kalak  simbages perukurenna .
“wisdom is not knowledge and knowledge is not wisdom”

Amin.
Rantauprarapat 20 Juni 2014

Salam ras sentabi man banta kerina ibas kurang lebihna tulisen enda. Tulisan enda labo bahan baku PJJ GBKP. Tulisen enda hanya bersifat diskusi man banta ibas Blog enda. Bimbingen PJJ GBKP si baku tetap si ipedarat Moderamen GBKP si isikapken PPWG GBKP.
Bujur Tuhan simasu – masu.