PJJ GBKP “Pinakit Sosial Mpeturah Mara”

PJJ Tgl 25 – 31 Mei 2014
Ogen : Kej 18 : 20 – 21 ; 19 : 12 – 19
Tema : “Pinakit Sosial Mpeturah Mara”

         Ibas gambaren umum kegeluhen kekristenan sigenduari menurutku maka, enggo enterem kalak kristen si mengabaikan nilai – nilai iman kristen ibas geluhna, ertina kegeluhen sibadia/siberkualitas/berspiritual lanai jadi soal mendasar man bana. Kata Dibata lanai mempengaruhi kegeluhenna janah banci jadi ibas ia ndengkehken kata Dibata sifatna hanya memindahken kata Dibata ku otak emaka konsep kegeluhen kalak kristen man bana labo jelas. Tapi amin bage gia maka arus kange sibereken surprise man enterem kalak kristen sitetap ersura – sura nggeluh ibas kegeluhen sibadia/siberkualitas/berspiritual ras tetap jadi sada perayaken/mendasar man bana, nggeluh la erdosa, tetap menyangkal diri, mengoreksi diri, ertedeh ate nandangi kata Dibata ras meneladani Kristus ibas kegeluhenna. Kata Dibata sialokenna i ingetna sebage kata sipegeluhken dirina ibas Tuhan.

Tema PJJ-nta  “Pinakit Sosial Mpeturah Mara” tentu enggo sieteh kai pinakit sosial ras kai si imaksudken kerna Pinakit Sosial. Lit pinakit sosial si enggo simelanda, khususna kalak kristen karo (jemaat GBKP) piga – piga si banci sidaftarken eme :

1. HIV/AIDS. Media melaporken maka ibas Taneh Karo genduari enggo jadi salah sada pengidap ras penular HIV/AIDS tertinggi di Sumatera Utara lebih kurang lit tercatat 350 kalak sienggo mengidap penakit e ras mungkin saja pe kedepan enda jumlah simengidap penakit enda semakin bertambah. (http://www.harianorbit.com/aids-di-karo-mengkhawatirkan/).
2. Marakna perjudin i Taneh Karo
3. Marakna peredaren ras pemakaian narkoba
4. Munculna ingan – ingan prostitusi si ibungkus alu bentuk cafe – cafe entah oukup – oukup liar.
5. Rusurna ras buena terjadi perbahanen amoral.

           Enda me gambaren secara umum kerna pinakit sosial sienggo engkenai kegeluhen kalak kristen ras masyarakat secara umum. Banci jadi enggo sulit siakap mpekenasa, terlebih – lebih ibas ketidak seriusen pemerintah guna menanggulangi kecibal sibage rupana. Tapi amin bage gia apakah kita putus semangat ? entah la peduli nandangi situsasi sibage rupnan ? tentu lang ! selaku warga gereja kita pe ikut nge bertanggung jawab guna mengatasisa, alu berperan serta la ikut ibas ngelakokenca, ertina kita saja ngelakokenca maka enggo berkurang sada sikena penakit enda.  Sebage kalak kristen, singgeluh ibas Tuhan tetap sigar – gari kata Dibata siman jemakenta, jadi palas/dasar kegeluhenta, simabai kegeluhenta kubas kemulian Dibata. Emaka PJJ-nta sekali enda pe ipersingeti me kita kerna rawa Dibata  nandangi kalak singelakoken perbahanen sila mehuli (Nggeluh ras menjadi pelaku Pinakit Sosial) ras mpebetehken man banta kerna keleng ate Dibata man kalak sila ngelakoken kesalahen ibas geluhna.

           Kej 18 : 20 – 21 ; 19 : 12 – 19 bahan PJJ-nta enda lit 4 (empat) Point sikusehken man banta guna nambahi pengertinta alu pengarapen mabai kegeluhenta  nggeluh badia ibas Tuhan alu nadingken kerina kerina perbahanen sijahat (Pinakit Sosial), lit pe 4 point e eme :

1. Kota Sodom ras Gomora eme dua arah lima kota siterletak i lembah sungai Yordan (Kej 13 : 12), kota enda seturut ibas perkembangenna enggo jadi kota tanpa norma agama, masyarakatna bebas la terkendali khusuna ibas bidang moral alu ngelakoken praktek sex bebas ija kerina penduduk kota erlumba – lumba memuasken hasrat kinidagingenna ras sitik kel pe lanai mbiar nandangi penghukumen Tuhan.
2. Lot erti gelarna ibuniken/gelap. Ia ngikutken Abraham i Ur Kasdim nari erkiteken bapana enggo mate. Ibas kegeluhenna ras Abraham, Lot iperlakuken Abraham bagi anak kandung, tapi Lot la itehna berbalas budi, rubat ia ras Abraham erkiteken taneh ingan ermakan ras nggit sirang ras Abraham. Kenca perubatenna ras Abraham, Lot milih tading i taneh simehumur isebelah Timur sungai Yordan. Amin bage gia ia tetap ikelengi Abraham, hal sie teridah kenca perpisahenna ras Abraham, Lot pe pernah nge iselamatken Abraham ibas tabanen raja Kedorlaomer nari, tupung e raja Kedorlaomer merangi Sodom ras Gomora, Lot ikut tertaban ras kerina keluargana, erkiteken sie Abraham ersekutu ras Melkisedek merangi raja Kedorlaomer. Kemenangen jadi bagin Abraham sebab Tuhan nemani ia bas peperangenna. Kenca Lot iselamatken ia tetap milih tading i Sodom-Gomora. Cataten penting man banta  kerna kegeluhen Lot ibas  Kej 18 : 20 – 21 ; 19 : 12 – 19 enda bandingken pe ras Ibrani 11 : Lot sitading i Sodom-Gomora, ituriken tetap kalak singinget kinitekenna, ia nggeluh sebage kalak sibenar i tengah kota sila benar, ia sekalak simencintai kebenaren, mencintai kesucian, aminna pe ia cinta uang, nggit rubat ras memikirken keuntungen sendiri, tapi paksa tading i Sodom-Gomora ikataken ia tetap memelihara kebadian geluh kerohanianna. Hal sie terbukti ibas paksa Sodom-Gomora i itutung alu api surga nari, maka anakna singuda – nguda tetap perawan, i katakenna man kalak Sodom-Gomora tupung kalak e mindo dua malekat sireh kesilang kurumahna, maka nina ; kubereken man bandu dua anakku singuda – nguda silenga pernah idadap, gelah ola iganggundu dua temueku persuruhen Dibata si reh kurumahku sendah enda. Alu katana e ia ras keluargana la terpengaruh alu situasi si lit. Mungkin kita nungkun engkai maka iberekenna anakna singuda – nguda man kalak Sodom–Gomora ? me e ngatakenca la ikelengina anak jabuna ? jababna : ibas masa sie Lot ibas keadaan sulit, rumahna enggo ikelewari kalak Sodom ras Gomora si ersura – sura erbahan homosexual ras temue sireh kurumahna, emaka Lot harus muat keputusen memproteksi malekat suruhen Tuhan alu mengorbanken keluargana sendiri, jadi tindaken si ibahanna e sebage tanda bukti keleng atena nandangi Tuhan dingen ia rela mengorbanken simehergana bas geluhna guna Tuhan.
3. Abraham, igelari bapa kerina kalak sierkiniteken, dingen melala hal si idah ibas kegeluhenna guna siteladani ; ia berkarakter agung, kalak dem alu kebijaksanaan siteridah paksa lit perubatenna ras Lot, ia nggit mengalah guna alu tujun perdamen, mungkin prinsipna ibas paksa rubat ras Lot “lebih baik kita saling berpisah dan saling mengingat, daripada kita hidup bersama, tetapi saling menggigit”. Tole Abraham encidahken dirina sebage kalak sidem alu kepedulian teridah arah kepedulianna man Lot ras man kota Sodom–Gomora sinandangi ihukum Tuhan. Ibas Kej 18 : 26 – 33 ituriken Abraham bermohon man Tuhan gelah kota e  ula min ikernepken Tuhan, sitawaren ia ras Tuhan mulai arah angka 50, 45, 40, 30, 20, 10, tapi tawarenna la erbahanca surut ukur Tuhan erkiteken kejahaten kalak Sodom-Gomora, ijenda me teridah rasa kepedulian Abraham nandangi jelma sienterem.
4. Malekat Tuhan i Sodom. Maksud kerehenna kurumah Lot eme gelah keluarga Lot iselamatken ibas mara Tuhan nari erkiteken Tuhan ngidah, maka Lot la ngelakoken kesalahen bagi si ilakoken kalak Sodom ras Gomora.

            Temanta “Pinakit Sosial Mpeturah Mara” adi kinitekenta lah simenjawab tema enda, tentu lit kebiarenta ngelakoken nandangi kerina perbahanen – perbahanen sijahat sila ngena ate Tuhan sebab mbiar kita mara si reh ibas Tuhan nari. Ibas zamanta sigenduari melala kel genduari pinakit sosial si enggo membudaya ibas kegeluhen kalak kristen/masyarakatta ras keadaan sie idukung alu benena budaya malu. Enterem kalak memang lanai iakapna mela adi idah kalak pe ia ngelakoken siman kemelanken, tempa – tempa enggo biasa iakapna, entisik nge ngenca i inget kalak, pagi lanai bo lit singingetsa, bagem nina ibas ukurna.  Enterem jelma pe lanai peduli nandangi kai sijadi “Bukan urusamu dan bukan urusanku”, “Mau – mau guelah masalah buat elo (Masbulo)”, “emang gue pikirin (EGP)” rsd, enda me istilah si enggo biasa sibegi. Sijadi penungkunen man banta, la lah ndia kita pe enggo ilangketi cara nggeluh sibage rupana ? entah kita pe jadi pelaku pinakit sosial ibas arena kegeluhenta ?. Ingetlah maka lalit sada pe perbahanen sijahat singena Tuhan, adi jahat kita ras silakoken perbahanen sila mehuli maka iblis nge ngenca rate ngena banta.  Perdiatekenlah persinget tema PJJ-nta sendah enda, tema enda ngerana kerna mara sirehna ibas Tuhan nari, labo hukumen negara entah penghukumen sosial. Emaka megermetlah kita ibas ngertiken bahan PJJ-nta sekali enda ras marilah erlajar arah kegeluhen Abraham ras Lot si isingetken ibas bahan oratenta eme kalak sila kena pengaruh lingkungen sosialna sienggo ceda, catatanku kerna kalak enda :

• Abraham tetap icidahkenna dirina sebage kalak si mbiar man Dibata ras pantang kel man bana ngelakoken perbahanen sila mehuli ras tetap jadi teladan ibas kerina dampar kegeluhenna. Abraham la nggit berkompromi  ibas sienda ia berbeda ras Lot si nggit berkompromi sierbahanca kegeluhenna bengket kubas bahaya sierbahanca ia arus menyelamatken diri akibat sikap kompromi si ilakokenna.
• Memang kita kurang setuju nandangi cara kegeluhen Lot sila maba perubahen i Sodom-Gomora, sikehilangen kewibawanna subuk e man calon kelana ras kerina kalak Sodom-Gomora. Tapi nehenlah kehebaten Lot ras keluargana, i tengah – tengah kegeluhen kalak si enggo ngelakoken perbahanen sijahat, ia tetap bersih ibas kerina prilaku simenjijiken, ertina ia berani tampil beda ibas situasi si sulit aminna gia isekelilingna lanai mehuli. Lot la nggit ngelakoken dosa yang berjama’ah bagi kalak Sodom-Gomora.

        Doni (iblis) memang menawarken man banta kepuasen doni arah kerina bentuk, ibas sie tentu selaku kalak kristen, enggo lit senjatanta guna melawanca alu makeken senjata sibereken Dibata man banta. Emaka gelah lit pe ulihna kita er-PJJ sendah enda mari dage sicidahkenlah, kita memang berbeda ras doni ras asalta pe labo ibas doni enda, kita warga kinirajan surga kap, tugasta kap nerangi doni enda ibas kerina -perbahanen sigelap ras ula kel sempat ndabuh kubas kerina perbahanen sila mehuli, sebab adi kita kalak kristen pe terjebak ngelakoken pinakit sosial emaka juru kel me Dibatanta siban, nembehkel ate Dibata man anak- anakNa singelakoken sijahat emaka man kalak singelaokenca mara Tuhan pasti reh. Dage ingetlah sendah enda isingetken man banta maka ; Sodom ras Gomora hanya salah sada kesaksian siencidahken murka Dibata nandangi kalak singelakoken dosa, erkiteken sie silahilah kerina perbahen sila mehuli gelah dame ras senang kegeluhenta.

Amin.
23 Mei 2014. Sermon GBKP. Rantauprapat.

Selamat PJJ.

Salam ras sentabi man banta kerina ibas kurang lebihna tulisen enda. Tulisan enda labo jadi bahan baku PJJ-nta, tulisen enda hanya bersifat diskusi man banta bas Blog enda. Bimbingen PJJ sibaku tetap si ipedarat Moderamen GBKP si isikapken PPWG GBKP.
Bjr Tuhan simasu – masu.

Tagged Kej 18 : 20 – 21 ; 19 : 12 – 19, PJJ GBKP

Sada Aron Makeken Talenta

PA MORIA TGL 18 – 24 MEI 2014

SADA ARON MAKEKEN TALENTA

ROMA 16 : 1 – 16

Pokok Pikiren :

Adi kita ngerana kerna talenta maka talenta pe arus ibarengi pribadi/karakter simehuli, sebab pribadi/karakter simehuli e erbahanca talenta silit ibas kita e jadi pasu – pasu (berkat) man  enterem jelma, ertina sekalak jelma labo hanya icintai erkiteken talenta silit ibas ia tapi pe erkiteken pribadi ras karakterna simehuli janah berbahaya kel adi talenta tanpa pribadi/Karakter simehuli subuk e man diri sendiri entah pe man kalak sideban.

Rom 16 : 1- 16 nuratken sapaan Paulus man  kerina  kerina teman – temanna sada dahin ibas meritaken berita si meriah si encidahken maka lit keakrapen sierat entah relasi simehuli antara ia ras kerina teman – temanna, alu kata sideban ijenda  Paulus encidahken hubungenna ras kerina teman - temanna la hanya bersahabat ibas dahin pelayanen tapi ia pe memiliki hubungan si erat baik secara peribadi ras spiritual. Hal sienda banji jadi agak berbeda adi sibandingken ibas kegeluhen bergerejanta genduari sebab banci jadi hubungenta hanya terjalin ibas pertemuan – pertemuan gereja entah ibas kegiaten gereja selebihna banci jadi, kita la memiliki iketeten spiritual antara sada ras sidebanna

“Sada Aron Makeken Talenta” mengandung unsur saling pengertian, saling menghargai, alu kesadaran mencapai kemauan dan tujuan bersama, tanpa mengharapkan imbalan jasa, si i wujudken tindaken ras perbuaten nyata siselaras ras talentata/keterampilenta masing – masing. Alu  bage sada aron makeken talenta menentang pengertin kelompok – kelompok i doni enda si hanya membangun hubungenna komunitasna alu tujun saling menguntungken (Mutual relathionship), menumpuk jasa, membangun reputasi diri, rsd.         

Talenta ibas setiap pribadi sekalak jelma berbeda – beda emaka la banci sekalak pe simenyombongken diri kerna talenta si lit ibas sebab talenta hanya  sebagai titipen Tuhan man banta guna i pakeken ku kemulianna, erbuena talenta silit ibas sekalak jelma emaka tuntutenna pe semakin mbue, janah adi sitik talentata maka labo ka perlu kita rendah diri ertina setiap talenta adi ipake alu mehuli i pasu – pasu Tuhan. Dage pakeken talenta alu ras – ras guna kemulian Tuhan gelah alu bage banci melala hal banci silakoken.

Salam.

Selamat ber PA – Moria.

PA MAMRE ROMA 12 : 12

PA Mamre Tgl 18 – 24 Mei 2014.   Rg. GBKP. Rantauprapat.

Ogen : Roma 12 : 12

Thema : “Nggeluh ibas pertoton”

Tujun   : Gelah Mamre Jadi Binangun pertoton i tengah jabu

BERDOA ITU TIDAK BOLEH PART TIME

JUGA TIDAK BOLEH SOME TIME

APALAGI NO TIME

BERDOA HARUS FULL TIME

KALAU BISA OVER TIME

Bagenda me rusur ibelasken uga pentingna kerna ertoto sebab ibas kita ertoto sisadari maka Tuhan me sebage sumber kegeluhen, sinatang, simemelihara kegeluhenta, alu kata sideban ibas kita ertoto sicidahken me kita kalak sitek si tuhu – tuhu mutlak bergantung man Tuhan. Memang ibas kinata kegeluhenta  lit si idah kalak si lanai ia ertoto man Dibata dingen tempa – tempa lanai iakapna ia perlu Tuhan,  sienda banci jadi, erkiteken :

• Kerina keperlunna enggo lit ras iakapna enggo idatna alu usahana sendiri.
• Bicara lit pe perbeben entah persoalen ibas kegeluhenna banci iakapna idungina alu kemampuan ras logika silit ibas ia, alu cara erlajar arah pengalamenna entah erlajar arah pengalamen kalak sideban, alu menganalisa arah aspek logis entah la logis, mungkin entah la mungkin.
• Enggo iakapna bias talenta ras pemeteh (Keterampilen) sibanci erbahanca ia sukses ibas kegeluhenna, emaka ertoto man Dibata hanya sebage uruten terakhir entah pelengkap  ibas agenda kegeluhenna.

Bahan PA Mamreta sekalenda, Roma 12 : 12 enda nuriken kerna praktek kegeluhen kalak Kristen ibas kegeluhenna sitep – tep wari sebage wujud persadanna ras Dibata. Paulus sebage penulis surat ibas Roma 12 : 12 ngataken “Meriahlah atendu i bas kam erpengarapen, megenggenglah kam i bas kiniseranndu, janah ertotolah kam man Dibata la erngadi-ngadi”.  Kata enda isehken Paulus erkiteken ia sendiri enggo ngenanami ulih persadaan ras Tuhan, ibas ia ngenanami kiniseran igejapna ka pe ulih gegeh pertotonna man Dibata, sebab Paulus tek maka ia labo nembah man Dibata si hanya lit ibas “Ide” bagi si igambarken ibas agama – agama sideban, tapi ia man Dibata sienggo encidahken diriNa man manusia, sinebusi ras sinampati kerina manusia (Imanuel). Gendekna ibas Roma 12 : 12 enda Paulus ngataken ras menyaksiken “ber–relasi” man Dibata ibas pertoton seh kel pentingna sebagai sumber kekuatan/fondasi utama. 

Roma 12 : 12 oratenta sendah enda ilatar belakangi ija Paulus ras kerina kalak kristen ngenanami erbage – bage kiniseran  ibas ngikutken Yesus ras ibas situasi sie me Paulus ngajuk kerina kalak kristen gelah tetap nggeluh ibas keriahen ukur, erpengarapen ras ertoto. Mungkin secara logika nasehatna enda secara manusia la teraloken, la masuk akal, sebab ibas ngenanami kiniseran Paulus tetap ngajuk gelah tetap ermeriah ukur, erpengarapen ras ertoto sebagai la erngadi - ngadi, banci jadi ibas paksa sie kalak Roma simbaca tulisen Paulus enda lucu iakapna entah pe ikatakenna Paulus kalak adon silanai logis cara berpikirna, me seharusna min ndai nina Paulus ; ibas kerina kiniseran sialamindu genduari enda, aku pe turut prihatin ras erceda ate, bagi caranta si enggo biasa sibelasken ibas mpegegehi temannta ibas kiniseranna ? Tapi la e si ibelasken Paulus, ia ngataken hal sikontradiktif ras keadaan, Paulus hadir sebagai motivator guna mereken pergegeh ras penghiburan man ibas kerina kiniseran si i hadapi kalak kristen sebab ia sendiri enggo nggejabken uga kuasa Tuhan nampati ia ibas kerina kiniseranna, mulahi ia ibas penjara nari (Perb 16 : 26).

Itengah – tengah kegeluhenta sigenduari enda pe banci jadi melala kel tantangen kegeluhen siman hadapenta subuk e ibas bidang ekonomi, sosial, politik ras litna persoalen pribadi itengah jabu, sierbahanca semangat kegeluhenta kendor, bene pengarapen ras lanai siakap meriah geluh, tapi ingetlah sendah kai si ikataken Paulus Roma 12 : 12 enda ertoto man Dibata e jadi sumber utama pertolongenta, ermeriah ukur amin susah, erpengarapen ras ertoto alu la erngadi – ngadi. Ibas sienda Martin Luther pernah ngataken maka pertoton  eme  “Nafas Hidup Orang Kristen” emaka nina ; kai pe si irencaken ibas kegeluhenta babalah lebe ibas pertoton sebab eme gegehta guna ndalani kegeluhen i doni enda.

Temanta sendah “Nggeluhlah Ibas Pertoton”,  alu pemahamenku maka tema enda ningetken man banta uga kita banci mengutamaken pentingna pertoton ibas geluhta. Ibas wari – warinta adi litlah waktuta guna erdahin, nonton TV, mbaca Koran, rekreasi, rsd, maka lit ka lah min siban waktuta “ber–relasi” ras Dibata si khusus siniaturken ibas geluhta, alu kata sideban si kurangilah cara ertoto man Dibata ibas waktu  ”terdesak ras tiba – tiba”, sebab pertoton labo hanya guna ndatken ulih ibas pertotonta, tapi lebih asa sie maka pertoton erbahanca lebih sitandai Tuhan si memelihara kegeluhenta ras menyadari ketergantungenta man Dibata (ibas sienda aku rusur ningetken “Kita nge si perlu Tuhan labo Tuhan si perlu kita).

Tentu, ibas kita memahami uga pentingna pertoton ibas kegeluhenta selaku kalak kristen, maka Mamre pe iarapken mampu ndalankenca ibas geluhna bagi teladan Paulus, bagi tujun PA Mamreta sendah enda “Nggeluh ibas pertoton gelah Mamre Jadi Binagun Pertoton ibas Jabu” ibas erti kata Mamre-lah jadi pemimpin ibas kerina simehuli itengah jabunna, memilki kerohanian si mehuli, nggeluh ibas pertoton, me bage nge ninta ..... kita Mamre ?

Amin.

Salam

Selamat er PA - Mamre

Salam ras sentabi man banta kerina ibas kurang lebihna tulisen enda. Tulisan enda labo jadi bahan baku Mamreta-nta, tulisen enda hanya bersifat diskusi man banta ibas Blog enda. Bimbingen Mamre sibaku tetap si ipedarat Moderamen GBKP si isikapken Mamre Pusat.
Bjr Tuhan simasu – masu.