PJJ GBKP. Jeremia 7 : 1 – 7 “Nggeluh I Tengah Jelma Si Enterem”

PJJ GBKP 15 – 21 Juni 2014

Ogen : Jeremia 7 : 1 – 7
Tema : “Nggeluh I Tengah Jelma Si Enterem”

Syalom.

       Kegeluhen kalak kristen ibas nggeluhken panggilenna ibas masyarakat arus tetap nggeluh ibas konsep si sesuai ras ajaren kekristenen ras mempertahanken kinitekenna alu nggeluh ibas kebenaren kristen secara mendasar. Tapi mekatep ibas kinata kegeluhen, enterem kalak kristen la ngasup nggeluh ibas konsep kegeluhen kristen e, lit nge pengakun entah mengakui Tuhan, tapi la nggit teriket kubas ajaren Tuhan dingen riahen iakapna nggeluh alu cara – cara doni.

        Tema PJJ-nta sekali enda “Nggeluh I Tengah Jelama Si Enterem”. Alu tema enda banci turah penungkunenta, uga kin seharusna kita nggeluh itengah – tengah jelma sienterem (bermasyarakat) ? Ibas PJJ-nta sekali enda, aku la njabab kerna persoalen sie, tapi lebih kuarahken kita kubas pengenalen dirinta selaku kalak kristen si enggo itebus Kristus ibas krina dosa – dosanta nari nari. Mari sigar – gari Jeremia 7 : 1 – 7 bahan PJJ-nta sekali enda, ngenen kubas kegeluhen Jeremia, si enggluh badia itengah bangsa si lanai badia, nabi si pang mandang ise saja singelakoken dosa gelah jera ras dingen nggeluh ibas persadaan ras Tuhan.

• Yeremia eme salah sada nabi si jadi arah prakarsa Tuhan, labo atas keinginenna sendiri, tapi sekalak nabi si ipilih Tuhan ope denga pe Jeremia tubuh (Jer 1 : 5). Ibas awalna Jeremia menolak nandangi pendilo ras peneguhen Tuhan alu alasen, ia nguda denga. Sebab ibas paksa sie memang umurna 18 tahun denga ras ibas paksa sie lit sada budaya ibas kalak Yahudi, maka sekalak adi umurna 18 tahun denga, lenga banci ngajar entah pe mereken nasehat sebab ianggap kurang bijaksana, eme maka nina Jeremia “… O Tuhan si erdolat, la ku eteh uga melasken kata, ngudasa denga aku”. Jeremia menolak alu alasen kemanusianna, tapi alasenna e tulak Tuhan ras tetap neguhken Jeremia jadi nabiNa ras Tuhan erpadan man Jeremnia, maka Tuhan tetap nemani Jeremia ibas meritaken kata Dibata ku kerina bangsa – bangsa (Jer 1 : 6 – 8).

• Ibas pelayanenna Jeremia ndatken perlawanen-perlawanen ibas kalak Yehuda erkiteken Jeremia mbukaken kerina dosa kalak Israel si melanggar hukum Tuhan alu ersembah man berhala – berhala ras ngelakoken perbahanen si la ngena ate Tuhan. Lit pe cara kegeluhen kalak Isarel ibas paksa e, eme : tek nandangi ranan kalak penipu, lanai ngelakoken perbahanen sibujur, lanai mperdiateken keadilen, nindas kalak miskin, janda ras anak yatim, ngamburken dareh kalak sila ersalah dingen nembah man dibata – dibata Babel (Jer 7 : 4 – 6).

• Ibas perbahen kalak Isarel si jahat e, Jeremia nehken berita ibas Tuhan nari maka bangsa e arus robah, alu ngubah kerina lagu langkah ras perbahanen bangsa e, sebab adi la jera, maka Tuhan perehken hukumNa man bangsa e tapi adi bangsa e jera, maka Tuhan tetap mereken bangsa e tading ibas taneh perpadanen Tuhan (Jer 7 : 7). Aminna Jeremia enggo mpeseh kata Tuhan, tetap saja bangsa Israel la jera ibas mperobahi kerina lagu langkahna. Emaka kedungenna bangsa e ndatken penghukumen ibas Dibata nari ras i buang ku Babel dekahna 70 thn.

• Alu bage lit dua hal penting si idah ibas Jer 7 : 1 – 7 enda eme kerna pendahin entah peran khusus Jeremia i tengah – tengah kegeluhen bangsa Israel eme : nehken penghukumen ras mritaken berita Pertobaten man bangsa Dibata. Dingen secara pribadi Jeremia tetap ncidahken kualitasna sebage nabi Tuhan, sebage kalak sibenar itengah kegeluhen si la benar ras sitik pe la nggit terkontaminasi ras erkompromi alu cara – cara kegeluhen bangsa Isarel si erdosa (Jer 1 : 10 ; 7 : 1- 3, 7).

        Ibas kegeluhenta sigenduari, adi siperdiateken kegeluhen kalak Israel ibas zaman nabi Jeremia maka enterem denga ka kalak kristen singgeluh alu cara – cara kegeluhen kalak Israel. Jeremia nehken kata Tuhan gelah bangsa e jera, maka bangsa e labo jera malah semakin mengerasken hati ibas kerina berita pertobaten si ibegina, emaka sejarah mencatat bangsa Isarel piga – piga kali ibuang Dibata jadi tabanen ras ndatken erbage – bage kiniseran. Ibas kegeluhen kekristenen sigenduari banci  jadi cara kegeluhen kalak Israel e siterjadi, alu gambaren buena genduari praktek dosa siterjadi ibas kerina profesi kegeluhenta, sebab banci jadi kita labo sekalak sibujur ibas ndalani kerina kegeluhenta subuk e ibas krina profesi entah pe ibas keluarga ras ibas sie, berita pertobaten si isehken man banta, banci jadi la erbahanca kita jera ras berita pertobaten e sianggap hanya sebagai semboyan entah slogan gereja siarus ibelasken ! Kusingetken salah sada contoh : menurutku penagamatenku maka jemaat genduari lebih senang i hibur asangken i tegur, emaka khotbah – khotbah si mandang dosa genduari kurang i senangi, ras lit pe genduari tuntuten maka pengkhobah hadir min bagi sekalak motivator sidem alu kata – kata bijak ras menginspirasi, ibas sienda banci jadi lanai terbedaken kita antara pelayan Tuhan ras motivator. Bagepe lit genduari fenomena ibas pelayan Tuhan, maka ia lebih senang menghibur asangken menegur, alu alasen “mimbar bukan untuk menegur jemaat tapi menghibur jemaat”. Ibas kemajun sideban Jemaat pe semakin berani ras alu terang – terangen ia ngajari pelayan Tuhan gelah ula rusursa mandang jemaatna, adi ate pelayan e, ia tetap i senangi ras kegeluhenna i perdiateken jemaat. Gambaren sienda ka me genduari melala jadi ibas gereja – gereja ras akibatna enterem kalak kristen la jadi kalak kristen yang sesungguhnya. Ibas sienda ngarap kita gereja-nta tetap benar ibas ndahiken dahinna bagepe perpulungen tetap tutus ras tuhu – tuhu setia nggeluh ibas kebenaren Tuhan.

        Penutup kata ibas PJJ-nta sekali enda kusehkan mna banta : berita Pertobaten si isehken Jeremia man kalak Israel sekaligus jadi persinget banta ras adi lit denga silenga jera ras mengubah kerina lagu langkah bagi singena ate Tuhan, asa kai nari kin dekahna ateta nggeluh ibas dosa, kemunafiken ras memelihara dosa yang siterbuni ? ibas paksa silewat pernah kusingetken arus lit 4 perubahen nandangi kalak si enggo mengalami pertobaten sejati eme : mengalami perubahan pikiren (change of mind), perubahen hati (change of heart), perubahan hidup (change of life) ras perubahan kasih sayang (change of affection). Ertina asakai kalak si enggo jera alu tuhu – tuhu maka lit perubahen diirina sierbahanca ia lebih memikirken hal – hal rohani/sorgawi ketimbang hal – hal si itawarken doni (bdk, II Kor 4 : 18 ; Rom 8 : 5 – 9). Ras kalak kristen si enggo seh kubas perubahen sienda maka pasti ia nggeluh sikap ibas kegeluhenna i tengah – tengah jelma sienterem (masyarakat).

Dage Senina/ Turang ibas keleng ate Kristus :
        Tuhan erngena ate man kalak singakuken dosana dingen jera, jenari nggeluh ngikutken kerina perentahNa. Emaka bagi seruan pertobaten Jeremia man kalak Israel : “Ubahlah lagu langkah ras perbahanendu” siresponlah e bagi sirusur isingetken man banta “ Setiap kali Firman Allah di beritakan maka tiap – tiap pendengar harus merespon firman tersebut” … Uga ninta ?

Amin.
Rantauprapat 09 Juni 2014.

Salam ras sentabi man banta kerina ibas kurang lebihna tulisen enda. Tulisan enda labo bahan baku PJJ GBKP. Tulisen enda hanya bersifat diskusi man banta ibas Blog enda. Bimbingen PJJ GBKP sibaku tetap si ipedarat Moderamen GBKP si isikapken PPWG GBKP.
Bujur Tuhan simasu – masu.

Pekan Keluarga Wari VII. “Keluarga GBKP E Me Bagin Ibas Bangsa Ras Negara”

Pekan Keluarga Wari VII. 07 Juni 2014

Introitus : Kel 23 : 8
Ogen : Mat 5 : 13 – 16
Khotbah : Mzm 127 : 1 ; Jer 29 : 7
Tema : “Keluarga GBKP E Me Bagin Ibas Bangsa Ras Negara”

Syalom.

Negaraku, negara Indonesia ……
Bangsaku, bangsa Indonesia ……..
Garuda di dadaku ……
I love Indonesia ………
Indonesiaku hebat …….

Bageme sebagian ungkapen rakyat Indonesia ngataken kebanggan ras kecintanna nandangi bangsa ras negarana, tapi sebagian ibas rakyat Indonesia lit ka pe simerasaken maka ia labo milik Indonesia, lanai ia bangga menjadi bagin ibas Indonesia akibat i perlakuken sebagai warga kelas dua. Ibas hal sideban banci pe sikataken negaranta genduari enda megalami keadaan “kristis” akibat hancurna mental bangsata, hal sienda teridah ibas piga – piga hal, umpamana : Kasus – kasus korupsi si kerap menghiasi layar TV ras halamen Koran tempa – tempa hal sie enggo biasa ras akibatna bicara lit pe pegawai pemerintah si la korupsi entah lenga terdat pe enggo iakap korupsi ras hadirna kelompok – kelompok “pembela” simenghanacurken kerukunen umat beragama ras internalna sendiri, Rsd.

Amin bage gia, kita la banci berputus asa ras patut kita tetap berbangga hati erkiteken enterem denga nge kalak sipeduli nandangi bangsa ras negaranta, simemperjuangken keutuhen bangsa ras negara, memperjuangken keadilen ras kesejahtran Indonesia. Ibas enterem denga si peduli nandangi bangsa ras negaranta, tentu kita pe sebage bagin ibas bangsa ras negara maka muat bagin mpekena – kena bangsa ras negaranta. Penungkunenna ija posisinta ? kai peran sibanci silakoken ibas sie ?

Bahan Pekan Keluarganta ibas wari si pe VII ken enda memperjelas posisi ras kai siarus silakoken guna mpekena – kena bangsa ras negaranta. Emaka guna lebih jelasna mari si orati bahan bahan Pekan Keluarganta ibas wari enda, erpalasken Mzm 127 : 1 ras Jer 29 : 7 sijadi bahan oratenta ibas Pekan Keluarga wari si terakhir enda.

Pembuangen Isarel ku Babel si ituriken ibas kitab Jeremia enda erkiteken bangsa e lanai ngikutken hukum – hukum Tuhan, erkiteken sie Tuhan ernembeh ate man bangsa e ras sebage akibatna maka bangsa e mengalami masa pembuangen dekahna 70 tahun (Jer 29 : 10). Masa pembuangen e erbahanca bangsa Isarel ngenanami kiniseran, erkiteken sie turah ukur erbahan pemberontaken guna membebasken diri, tapi tentu saja bangsa si tertaban la ngasup ia mulahi bana erkiteken gegeh si lanai lit. Ibas sura – sura bangsa e mbebasken dirina ibas kerina kiniseranna nari, bangsa e lupa maka Tuhan kap simereken penghukumen ras kiniseran sireh man bana alu pengarapen gelah bangsa e jera ibas kerina kesalahen si enggo ibahanna. Tuhan Dibata Isarel, Tuhan si erkeleng ate kap, emaka gia bangsaNa enggo salah, Ia tetap engkelengi bangsa e arah nuruh nabiNa Jeremia, gelah bangsa Isarel i Babel tetap erpengarapen man Tuhan. Lit pe cara entah tindaken Dibata guna mereken keselamaten man bangsa e, eme bagi si ipeseh Jeremia ibas Jer 29 : 7 enda “Erdahinlah guna kiniulin kuta – kuta ija kuja kam enggo kubuang jadi tabanen. Ertotolah guna keperlun kuta e sebab adi sikap ia kam pe ikut sikap” (Jer 29 : 7). Cara enda me si ilakoken Dibata guna engkelengi ras njagai bangsaNa, ibas sie lit dua hal si arus ilakoken bangsa e, eme : “erdahin” ras “ertoto” guna kiniulin bangsa sinaban ia ras dua aktivitas e arus ialoken sekaligus eme lit tindaken sinyata ras erpengarapen ibas pertoton gelah ipasu – pasu Tuhan (bdk. Mzm 127 : 1).

Ibas panggilen sie me, kita (keluarganta) idilo Tuhan, eme guna ndahiken dahin simehuli (bdk, Ef : 2 : 10). Emaka enggo saatna kita ngelakoken karya nyata guna kiniulin kuta ija inganta tading, sebab adi mehuli kuta e maka tentu kit pe ikut ngenanamisa. Tema Pekan Keluarganta wari enda eme “Keluarga GBKP E Me Bagin Ibas Bangsa Ras Negara” si ningetken maka, ersada kap kita ibas bagin bangsa ras negaranta, erkiteken sie, sebage warga negara simehuli maka kita pe ertanggung jawab ibas porsinta masing – masing guna ikut ertanggung jawab ras erdahin guna kegeluhen bangsa ras negaranta. Matius 5 : 13 – 16 ningetken peran si banci silakoken eme nggeluh bagi sira ras terang simereken perubahen simehuli ibas setiap kehadirenta sebage warga negara dingen e jadi tanggung jawab moralta sebage warga negara. Ibas tindaken sideban selaku kalak sitek, ertoto pe kita man pemerentah ras patuh kempaksa sebab kerina pemerentah Tuhan kap sinentukenca (Jer 29 : 7 ; I Tim 2 : 1 – 3 ; Rom 13 : 1Rom 13 : 7 ; I Ptr 11 – 17).

Sebage penutup kusingetken sitik kerna tanggung jawab politikta ibas wari enda, sebab lanai ndekahsa bengket me kita kubas pesta demokrasi negaranta ibas milih Presiden tgl 09 Juli 2014. Sebage warga negara simehuli, kerina min kita turut serta muat bagin, ula golput pakekenlah hak suaranta alu mehuli ras adi lit kalak si golput banci jadi la iakapna ia bagin ibas bangsa ras Negara enda.

“Selamat Menjadi Warga Negara Yang Baik”
“Keluarga GBKP eme bagin ibas bangsa ras negara Indonesia”

Amin.
Rantauprapat 07 Juni 2014

Salam ras sentabi man banta kerina ibas kurang lebihna tulisen enda. Tulisan enda labo bahan baku Pekan Keluarga GBKP. Tulisen enda hanya bersifat diskusi man banta ibas Blog enda. Bimbingen Pekan Keluarga sibaku tetap si ipedarat Moderamen GBKP si isikapken PPWG GBKP.
Bjr Tuhan simasu – masu.

Pekan Keluarga Wari VI. “Tanggung Jawab Keluarga GBKP Ibas Kategorial Ras Unit Pelayanan”

Pekan Keluarga Wari VI. 06 Juni 2014

Intoitus : II Tim 2 : 22b
Ogen : Plp 2 : 1 – 4
Renungen : Ef 4 : 11 – 16
Tema : “Tanggung Jawab Keluarga GBKP Ibas Kategorial Ras Unit Pelayanan”

Syalom.
     GBKP enggo nggeluhken pelayanenna kubas pendilona selaku gereja alu ndalanken “Tri Tugas Gereja” eme : Koinonia (persadan), Marturia (ersaksi), Diakonia (ngelai). Ibas perdalinenna maka gerejanta mengembangken “Tri Tugas Gereja” e, gelah “mendarat” ibas konteksna ras tepat guna dingen menuju sasarenna, sebab ibas paksa kondisi kegeluhen genduari enda, gereja tuhu – tuhu iarapken ngasup njabab erbage-bage persoalen – persoalen kegeluhen siturah itengah – tengah kegeluhen ergereja ntah pe ibas masyarakat.

      Efesus 4 : 11 – 16 renungenta wari enda enda ngerana kerna gereja si arus terus bertumbuh majekken kula ni Kristus. Emaka guna menunjang pertumbuhen e, lit 5 gelar/jabaten si isehken Paulus guna ndahin ibas oratenta enda, eme : rasul, nabi, perberita si meriah, simpermakani perpulungen ras jadi guru – guru. Gelar/Jabaten ertujun guna menjelasken pembagin tugas sesekalak si idilo Tuhan guna jadi alatNa ibas majekken kula ni Kristus. Ibas pegertin sideban, maka lit pe 5 gelar/jabaten hanya ertujun memperlengkapi sada ras sidebanna, saling memberdayaken, erbagi potensi ras saling menopang ibas ndahiken dahin pelayanen gelah tepat sasaren erkiteken sekalak – sekalak makeken peran strategisna alu pas (ay. 11 – 12).

      Lit pe sasaren pertumbuhen e isingetken Paulus eme gelah kerina kalak kristen ersada ibas kiniteken, memiliki kedewasaan Kristus, lanai bali ras anak – anak si banci iombang – ambingken entah i jolah – joleken kujah – kuje alu angin pengajaren penipu ras penebu – nebu kata siperguak. Ertina, Paulus erpengarapen gelah kalak sitek meteh kerna pengajaren situhu – tuhu ibas kesempurnanna Kristus dingen mengaplikasikenca gelah lit pe gunana man kerina manusia (13 – 16).

    Ibas pengertin sienda me genduari gerejanta ndahiken – dahin pelayanenna ras terus mengembangken kualitas program pelayanenna, alu ngelitken erbage – bage wadah pelayanen kategorial ras unit – unit penunjang pelayanen, antara lain : PPWG, Retreat Center, Diakonia, Panti Asuhan GBKP, YKPC Alpha Omega, PPOS (Panti pelayanan orangtua sejahtera). Yayasan ate keleng, badan pelayanan kesehatan GBKP, KomisiHIV/AIDS dan NAPZA. Program komisi penanggulangan bencana. Bidang dana dan usaha : PPWG, RC Sukamakmur, asrama pemuda maranatha, Warta. Gereja Maranatha, Juma lingga, PT jasa nioga, PT namo tiara, KWK berastagi, took buku Abdi karya. Bidang personalia/SDM : biro Theologi. Bidang keuangan, rsd). Ibas pengarapen, alu litna kerina wadah pelayanen enda, maka pelayanen man anggota ngawan niperpulungen banci isentuh ibas kerina dampar kegeluhenna.

      Malem pe ateta, erkiteken kidekah enda enggo erdalan program – program pelayanen gerejanta alu berkualitas ras enggo teruji keberhasilenna. Tapi amin bage gia, maka lenga bo kita banci berbangga hati entah berpuas diri, sebab enterem denga nge warga jemaatta si kurang perhatinna nandangi dahin – dahin gerejanta dingen lenga bo iakapna jadi tanggung jawabna guna mensukseskenca, emaka banci jadi lit program pelayanen e la erdalan alu mehuli bagi siarapken subuk e ibas tingkat runggun entah sinode. Erkiteken sie, ibas Pekan Keluarga si pe 6 ken enda, tetap denga ilumbaken man banta kerna tanggung jawab keluarganta ibas menunjang kerina dahin pelayanen gerejanta, alu pengarapen maka kerina kita meteh tanggung jawabta ibas mendukung ras mensuksesken kerina pelayaen si lit ibas gerejanta.

       Dage si responlah temanta sendah enda “Tanggung Jawab Keluarga GBKP Ibas Kategorial Ras Unit Pelayanan” alu netapken tanggung jawabta ibas sada – sada dahin pelayanen gerejanta. Melala pilihen adi ateta muat bagin ertanggung jawab ibas ndahiken pelayanen gerejanta, banci jadi pengurus Kategorial, organist/song leader, sukarelawan, penyandang dana, rsd.
Penungkunenna ibas siapai kita muat tanggung jawabta …. tentuken pilihenta ?

Amin
Rantauprapat 07 Juni 2014

Salam ras sentabi man banta kerina ibas kurang lebihna tulisen enda. Tulisan enda labo bahan baku Pekan Keluarga GBKP. Tulisen enda hanya bersifat diskusi man banta ibas Blog enda. Bimbingen Pekan Keluarga sibaku tetap si ipedarat Moderamen GBKP si isikapken PPWG GBKP.
Bjr Tuhan simasu – masu.