Suplemen PJJ GBKP 14 – 20 Feb 2016. “Undang – Undang Guna Kiniraturen” Ul 6 : 1 – 3 ; I Kor 14 : 33

“Undang – Undang Guna Kiniraturen”
Ulangen 6 : 1 – 3 ; I Kor 14 : 33

Pokok Pikiren :

• Bahan PJJ-nta sekali enda membahas dua konteks si berbeda ras sekaligus jadi perenungenta ibas sura – suranta mplimbarui kegeluhen secara pribadi gelah geluhta lebih tertata alu mehuli dingen banci pe si praktekken ibas kegeluhenta si tep – tep wari ras ibas kegeluhenta selaku warga gereja. Penting ras mbageslah sigar – gari tema ras bahan oraten PJJ-nta sekali enda, erkiteken ibas kinata kegeluhen si genduari enterem kel kalak lanai beluh menata kegeluhenna alu mehuli, hal sie banci si idah ibas praktek kegeluhen sehari – hari, umpamana : lit kalak si lanai ngasup ngatur waktu alu mehuli ibas sie lanai ietehna katawari ia harus tunduh ras katawari ia arus medak – ntah pe katawari erdahin katawari ngadi. Lit ka pe si idah kalak si merincuh melanggar kerina aturen si berlaku dingen peraturenna ngenca iakapna berlaku  contohna : enggo pe ikataken wajib pake helm maka labo i make helm, emaka umumna kalak si bage ibas traffic ligth pe labo i patuhina erkiteken iakapna kin ia beluhen ngaturken keselamatenna asangken peraturen si lit. Lit ka pe si idah kalak si la meteh peraturen (meteh orat) ras biasana kalak si bage labo nggedang kel perukrenna emaka erkai pe ate – ateina saja nge ibahanna kalak sibage umumna per kugerejana pe pasti ate – atena sebab iakapna enggo kin ia ulin ntah beluhen asangken kalak sideban ras melala denga si banci si daftarken kerna kalak si la teratur kegeluhenna ras si la nggit nggeluh ibas peraturen si lit, tapi amin bage gia malem ate maka enterem ka pe si idah kalak si nggit nggeluh alu mehuli ras mematuhi aturen – aturen si lit dingen banci jadi pe itetapkenna aturen si berlaku man dirina secara pribadi si arus i patuhina guna kiniraturen kegeluhenna ras kalak sibage umumna eme kalak displin ras dem alu pengertin ras kebijaksanaan dingen kalak sibage me si katawari paksa pe ertedeh ate nandangi kata Tuhan ras njadiken kata Tuhan jadi ikuten ibas kegeluhenna bagi nina Daud ibas Mazmurna “kataNdu kap tendang man naheku nerangi dalan si kudalani” (Mzm 119 : 105).

• Bahan oratenta Ulangen 6 enda eme pidato Musa man kalak Israel i dataren Moab i seberang sungai Yordan ope denga bangsa Israel bengket ku taneh Kanaan dingen ope denga Musa mate. Ibas Pidatona enda me Musa mengulangi ras meneguhken kerna perpadanen  bangsa Isral dingen mereken perentah guna ndakanken kerina undang – undang (taurat) si arus i patuhi bangsa Israel (bd. Ul 4 : 21 – 22).

• Piga – piga ahli PL pe rusur nggelari kitab enda alu kitab “Naskah Perjanjian” erkiteken isi kitab enda memang ningetken gelah bangsa Israel tuhu – tuhu netapken ukurna“er-komitmen” guna ersembah man Tuhan saja (monoteistis) ras mewujudken keterpilihenna selaku bangsa pilihen Dibata alu ncidahken kepatuhenna ibas ndalanken kerina undang – undang si ipeseh Dibata ope denga bangsa Israel mengketi taneh Kanaan, dingen la banci lang bangsa Israel memang arus tutus ersembah ras ndalanken kerina undang – undang si isehken Dibata man bana erkiteken bangsa Israel memang enggo i iket (ter- iket) kubas perpadanenna ras Dibata menaken ibas nini – nini bangsa e si arah lebe.

• Piga – piga hal si banci si idah arah Ulangen 6 : 1 – 3 si jadi oraten PJJ-nta sekali enda eme :

1. Musa ndilo kerina kalak Israel guna megiken ngulihi undang – undang (taurat) si menjadi dasar kegeluhen kalak Israel, ningetken mulihi kerna karya keselamaten si enggo isehken Dibata bangsa e ras sekaligus jadi perentah si arus i dalanken ibas kerina dampar kegeluhen bangsa Israel. Undang – undang ras perentah si imaksudken Musa i jenda eme maka kerina undang – undang ras perentah e jadi sada ketetapen si itetapken Dibata ras jadi aturen dasar si la banci lang i ikutken bangsa Israel sebab perentah e labo ibas Musa nari ntah keinginen Musa sebage pemimpin bangsa Israel. Sifat pidato Musa enda pe sebage peneguhen mulihi kerna hubungen bangsa Israel ras Dibata sebab ibas undang – undang e sendiri ibassa lit padan ras pasu – pasu Dibata adi i ikutken bangsa Israel alu mehuli (ay 1 ; “Enda me kerina undang – undang si ierentahken Tuhan Dibatandu man bangku, gelah kuajarken man bandu. Ikutkenlah kerina undang – undang e, ibas negeri si nandangi i inganindu”).
2. Sifat undang – undang eme perentah si arus ilakoken bangsa Israel dingen berlaku seumur hidup ertina peraturen e la memiliki batas waktu dingen wajip pe iterusken ras iajarken man kerina kesusuren kalak Israel (ay. 2 “Kidekah geluhndu arus maka kam ras sinusurndu erkemalangen man Tuhan Dibatandu, dingen ngikutken undang undangNa si kubereken man bandu gelah gedang umurndu ibas negeri e” bd. Ul 6 : 7 “Ajarkenlah e man anak – anakndu, persingetilah rusur, subuk sanga kam i rumah, ntah sanga kam ibas perdalanen, subuk sanga kam ngadi – ngadi ntah pe sanga kam erdahin”).
3. Lit pe tujun utama undang – undang si jadi perentah si arus i ikutken bangsa Israel eme gelah bangsa e memiliki ciri khas sebage bangsa si itandai erkemalangen man Tuhan Dibata (JHWH) dingen ncidahken kemulian Tuhan man kerina bangsa – bangsa eme arah kegeluhen si badia ras dem alu kiniraturen (bd. Ul 4 : 1 – 10 ; 5 : 31).
4. Ibas ayat 3 Musa ningetken man bangsa Israel alu ngataken “O bangsa Israel , begiken ras ikutkenlah undang – undang e ! adi bage mejuah – juah ras jadi bangsa si mbelin me kam, janah ngiani taneh si mehumur e, sue ras si enggo i padanken Tuhan Dibata nu nini – ninita”. Perkatan Musa enda ncidahken maka Dibata tuhu erkeleng ate man bangsa Israel  dingen tetap nginget perpadanenNa menaken Dibata ngiket diriNa ras nini – nini kalak Israel (bd. Kej 17 : 7).
5. Enda me aturen dasar (undang – undang) si isehken Musa si arus i patuhi ras ilakoken bangsa Israel dingen arah kepatuhen ngikutken kerina undang – undang e me maka Bangsa Israel banci ngenanami kegeluhen si mehuli alu ndatken pasu – pasu ibas Dibata nari.

• Adi ibas Ulangen 6 : 1 – 3 isiingetken kerna kegeluhen bangsa Israel iarus ngikutken kerina undang – undang si isehken Dibata guna kiniraturen kegeluhen bangsa e selaku bangsa pilihen Tuhan maka ibas konteks kegeluhen perpulungen Korintus  isingetken kerna situasi kegeluhen perpulungen Korintus si lit ibas keadaan “kacau” (kekacaun ibas kegeluhen peribadahen man Tuhan). Sumber kekacauan e erkiteken lit persoalen pemahamen si salah kerna cakap kesah (bahasa roh) ibas perpulungen, si erbahanca perpulungen e lanai siangkaan ija lit kalak si erpengakap ia paling rohani, merasa diri paling benar, menilai kesalahen kalak alu ukuren si lit ibas ia, saling menghakimi, saling bersaing ras lit pe kalak si nggeluh alu erate – ate (I Kor 14 : 1 – 40). Emaka guna kiniraturen kegeluhen perpulungen e Paulus ningetken aturen – aturen si banci jadi pedoman guna banci perdalanen kegeluhen perpulungen e lebih mehuli alu ngataken “Sebab Dibata labo Dibata kinilaraturen, tapi Dibata kiniraturen, bali ras ibas kerina – perpulungen si enggo i khususken jadi sikerajangen Dibata” (I Kor 14 : 33).

• Tema PJJ-nta “Undang – Undang Guna Kiniraturen”. Bagi si isingetken idatas erpalasken Ul 6 : 1 – 3 maka kerina undang – undang ras perentah si isehken Dibata man bangsa Israel gunana eme gelah bangsa Israel tetap njagai hubungenna alu mehuli ras Dibata sebage tanda bangsa e memiliki hubungen si khusus ras Dibata dingen erkiteken hubungen si khusus e me maka ibas kegeluhen bangsa Israel arus lit aturen sikhusus (taurat) si erbahanca hubungen bangsa Israel ras Dibata tetap mehuli. Tapi kedungenna sejarah Alkitab mencatat kedungenna kalak Israel njadiken undang – undang e jadi sada aturen si mengikat praktek ras memberatken kegeluhen kalak Israel alu njadiken undang – undang e jadi dasar hukum guna menghakimi kesalahen. Kerna kesalahen pemahamen kalak Israel e me maka Yesus ngerana kerna undang – undang taurat alu ngataken “Ia labo reh guna ncedai undang – undang si ibereken Musa ras si iajarken nabi – nabi. Aku reh labo ncedai, tapi nehken si enggo isuratkenna” (Mat 5 : 7). Sedalanen ras kai si imaksudken Yesus, rasul Paulus pe ngataken maka kerina undng – undang taurat enggo jadi sada baban si mberat ibas kegeluhen ergama ras adi undang – undang taurat kin ijadiken sebage dasar guna ngerembakken diri kempak Dibata maka kalak sibage mpesirangken bana ras lias ate Krsitus. Ertina paulus ngataken maka undang – undang taurat si lit  hanyalah sebage undang – undang siningetken kerna  aturen kegeluhen kalak si ersada Tuhan ras guna ndatken keselamaten tetap erkiteken arah lias ate Tuhan Yesus Kristus (Bd. Gal 5 : 1 – 15).

• Ibas kegeluhenta secara pribadi bagepe ibas kegeluhen gereja, mekatep lit jadi kinilaraturen erkiteken kesalah pahamen nandangi kata Dibata ras undang – undang si itetapken gereja guna mengatur/menata kegeluhen gereja gelah mehuli. Ertina banci jadi memang lit terjadi bagi praktek ahli taurat si memberlakuken undang – undang sebagai hukum si harus i patuhi secara baku ras mengikat alu la ngenehen esensi undang – undang e arah maksud ras tujuanna guna kegeluhen si lebih mehuli ras kiniulin kegeluhen pelayanen gereja bagi si terjadi ibas kegeluhen kalak Korintus ija perpulungen saling menonjolken kehebaten masing – masing seh maka terjadi kekacauan si ncedai kegeluhen kebersamaan perpulungen e ibas Tuhan.

• Undang – undang ibahan guna kiniraturen bageme ibas praktek kegeluhenta secara pribadi ras kegeluhen gereja, maka kita pasti jumpa ras berhadapen ras peraturen – peraturen si harus sipedomani gelah lit ketertipen. Sebage kalak Kristen tentu kita lebih menyadari maka undang – undang (kata Dibata) erguna kel guna banci ngaturken kegeluhenta gelah lebih ratur. Ibas si enda uga ninta sue ras sura – sura gerejanta maka ku lebe enda kerina ngawan perpulungen GBKP lebih er-komitmen nggeluh ibas Tuhan, enggo nge si bereken dirinta nggeluh iteruh undang – undang Tuhan dingen si jadiken sebage aturen si mengiket kegeluhenta ?, sebage Mamre/Moria enggo nge kita matuhi aturen si lit ibas rumah tanggata seh maka kegeluhen rumah tanggata erdalan alu mehuli bagi si iarapken Tuhan ? ras sebage warga gereja enggo nge si patuhi kerina aturen si lit ibas gerejanta gelah kerina perdalinen kegeluhen pelayanen gerejanta banci erdalan alu mehuli ? kerna sienda kerina mari si renungken sue ras penjelasen oraten PJJ-nta sekali enda.

• Tema PJJ-nta “Undang – Undang Guna Kiniraturen” ertujun ningetken ntah mereken penyadaren man banta selaku anak – anak Tuhan kerna pentingna keteraturen kegeluhen ibas kai pe dingen melala memang aturen harus si dalani ras sipatuhi ibas kegeluhenta subuk e ibas Tuhan nari ntah ibas kegeluhenta ibas doni enda mari si dalani kerina e alu kesadaren si penuh, ula alu pusuh si jungut – jungut ntah pe si terpaksa ntah sebage beban, tapi dalankenlah sue ras biakta selaku mahluk si rukur ras mulia.

 Pekanbaru. 12 Feb 2016. Pdt. Israel HS Milala.

Suplemen PJJ 07 – 13 Feb 2016. “Penandaiku Nandangi Kristus Mplimbarui Geluhku” Filip 3 : 1 – 10.

“Penandaiku Nandangi Kristus Mplimbarui Geluhku”

Filip 3 : 1 – 10.

Pokok Pikiren :

• Sekalak Penulis Amerika Serikat sitergelar Phil Crosby (1926 – 2001) ngataken : “Siapapun yang lambat berubah, biasanya takut menghadapi hal-hal baru”, maksud penulis enda ngataken maka sifat perubahen e membutuhken kesadaren mental ras harus memiliki kemampuan beradaptasi nandangi perubahen e sendiri.

• Gerejanta ibas 5 tahun ku lebe enda mengharapken maka lit perubahen ibas kerina kegeluhen ngawan perpulungenna eme alu nggeluh lebih setia ibas Tuhan, guna sie tentu sangat ibutuhken pembaharuan ibas kerina hal terlebih ibas nggeluh sebage kalak sierkiniteken. Apakah kita nggit mentranformasi kerina kegeluhenta kuarah si lebih baik, tentuna e tergantung kubas dirinta nggit ntah lang guna berubah ras adi nggit berubah maka tentu perubahen e iarapken bersifat langsung dingen mampu beradaptasi nandangi perubahen e gia melala tantangenna.

• Paulus ibas oraten PJJ-nta sekali enda ngerana kerna dirina, si enggo mengalami perubahen kenca ia nandai Yesus ras memulai hal – hal baru ibas kegeluhenna. Ibas kesempaten enda lit 4 batang belin si banci ituriken kami ijenda kerna perubahen si lit ibas diri Paulus ras tentu si 4 hal sienda kam me si sekaligus jadi perenungenta guna menuju perubahen dirinta, eme :
  1. Paulus mereken pengakunna kenca ndatken kegeluhen simbaru ibas perjumpanna ras Yesus ras pe nuriken visi ras misina kenca ndatken kegeluhen si mbaru eme alu ndalani kegeluhen alu ngusih kerina kegeluhen Kristus. Emaka ibas oratenta enda teridah kel Paulus la erngena ate nandangi kegeluhen si la ibas Kristus. Paulus mereken apologetna dingen membalikken kerina nilai – nilai si iakap kalak Jahudi sebage kebenaren situhu – tuhu bagepe ibas pengakpna ndube ope lenga jumpa ras Yesus, eme kerna meteh kerna undang – undang torat. Paulus nuriken maka cara nggeluh si hanya ndalanken undang – undang e la obahna bagi adat si teridah ngenca erkiteken la seh kubas cara kegeluhen bagi kai siniarapken Tuhan. Ibas sie Paulus ngataken maka cara kegeluhen si bage enggo jadi sada kerugin man bana ras adi mbarenda e iakapna jadi sada kemegahen man bana enggo ianggapna sebage sampah. Alu bage i jenda si idah maka arah pengakun Paulus kerna dirina sie encidahken maka Paulus tuhu – tuhu mengalami perubahen sicukup revolusioner, berubah alu cepat dingen lanai sitik pe mengkoleksi cara – cara kegeluhen si ianggapna ndube jadi kemegahen (ay. 7 – 8).
  2. Paulus meteh maka ibas perubahen kegeluhena, maka ia tetap memiliki tantangen subuk e ibas dirina nari bagepe ibas darat nari terlebih – lebih kalak Jahudi si lanai erngena ate man bana, e me maka nina Paulus perlu tetap metenget. Metenget ibas tantangen si lit si imaksudken Paulus ibas oratenta enda eme nandangi kalak si tetap ndalanken undang – undang sunat ras siernalem nandangi adat – adat siteridah dingen kalak sibage ikataken Paulus ijenda bali ras biang. Ungkapen Paulus alu make kata ‘biang” ijenda, ncidahken maka Paulus tuhu – tuhu enggo ernembeh ate kel nandangi kalak si nggeluh ibas kepalsuan rohani (ay. 2 – 4). Sebage cataten kerna “biang” si imaksudken Paulus ijenda eme nandangi kalak sitetap ersura – sura ncedai kegeluhen kalak si enggo tek man Kristus. Ungkapen Paulus enda situhuna cukup keras man kalak e erkiteken Paulus enggo menyamaken drajat kalak siersura – sura ncedai kegeluhen gereja alu kata “biang” sebab “biang” Ibas kalak Israel memang biang binatang si najis, pangganna bangke (Mzm68 : 24) ras memang ianggap najis rikutken hukum agama kalak Jahudi (Kel 22 : 30 ; bd. Mat 7 : 6 ; Why 22 : 15).
  3. Perubahen ibas diri Paulus tuhu mengubah dirina eme ibas ia ngataken maka ia lanai ermegah nandangi si enggo pernah icapaina ibas kegeluhenna. Paulus meteh ia kalak si mehaga ibas kegeluhenna, sebab ietehna ia keturunen Jahudi, suku Benyamin asli, nggeluh ibas aturen undang – undang kalak Jahudi si isunatken ibas wari si pe waluhken ras meteh kerna undang – undang torat. Tapi sie kerina lanai jadi kemegahen man bana dingen mengkonfrontasi kemegahen e ibas dirina seh maka kerina e iakapna lanai jadi sada kebanggaan ibandingkenna ras keleng ate si enggo ialokenna ibas Kristus nari (ay 4 – 5).
  4. Tentu Perubahen ibas diri Paulus jadi erkiteken ia terus nandai dirina i lebe – lebe Kristus ras eme si imaksudken Paulus alu ngataken sada ngenca sura – surana eme gelah itandaina kristus, nggejapken kuasa kekeken Kristus dingen nggit ikut ngenanami kiniseran si inanami Kristus. Tuhu memang kai si ikataken Paulus ijenda, sebab perubahen labo banci jadi adi sekalak lenga nandai diri alu payo ilebe – lebe Yesus (ay. 10).

• bageme Paulus nuriken dirina ras perubahen si jadi ibas dirina kenca ia tuhu – tuhu menyerahken dirina guna Kristus. Puji Tuhan kita pe genduari anak – anak Tuhan kap dingen ngaku kita maka kita ersada ras ia ibas kerina kegeluhenta ras tambah tole kemalemen ateta sebab seh asa genduari kita pe banci  denga menikmati kegeluhen si ibereken Dibata man banta. Emaka ibas kegeluhen si lit enda, maka ije Dibata mereken kesempaten man dirinta guna mentransformasi diri gelah nggeluh lebih mehuli asangken si enggona. Labo menukah memang adi sekalak ersura – sura mentransformasi diri, sebab pasti erbage – bage me tantangen si man hadapen subuk e ibas dirinta nari bagepe tantangen kesenangen si itawarken doni, tapi amin bage gia maka labo tertutup kemungkinenna maka perubahen e banci jadi ibas dirinta alu sempurna bagi perubahen ibas kegeluhen Paulus.

• Tuhan Dibata nepa dirinta sebage mahluk si rukur, erkiteken sie maka lit nge kebeluhenta guna rukur payo ntah lang kegeluhen si enggo si dalani kidekah enda terlebih – lebih ibas persadanta ras Yesus. Dingen tentu saja ibas perukuren si payo ibas pengajaren Kesah Si Badia tentu kita banci mengubah cara kegeluhenta ku silebih ngena tae Tuhanta (bd. Roma 12 : 2).

• Tema PJJ-nta “Penandaiku Nandangi Kristus Mpelimbarui Geluhku” enda ngatakenca kita enggo nandai Kristus dingen enggo nggeluh ibas kegeluhen simbaru, tapi amin bage gia mekatep denga lenga kel bagi siarapken Tuhan perubahen e jadi ibas dirinta. Emaka Sue ras temata ibas PJJ – ta sekali enda mari kita berubah ku si arah lebih mehuli (“metamorfosis – transformasi”) ras sipetugilah komitmenta ras Tuhan maka kita enda tetap setia man baNa alu nggeluh ibas kataNa tep – tep wari dingen perubahen e la banci lang arus jadi ibas kegeluhenta. Selamat berubah ras selamat mplimbarui kegeluhen ibas Tuhan, la perlu mbiar gia melala tantangenna tapi lakokenlah e genduari nari ras selamat beradaptasi nandangi perubahen.

          Pekanbaru 05 Feb 2016.  Pdt. Israel H S Milala.

Suplemen PJJ GBKP 31 Jan – 06 feb 2016. “Ijenda Aku Suruhlah Aku” Jes 6 : 1 – 8

“I Jenda Aku Suruhlah Aku”
Jes 6 : 1 – 8

Pokok Pikiren :

• Bahan PJJ-nta sekali enda banci jadi enggo semal i orati ibas gerejanta. Bagepe sieteh maka Jes 6 : 8 i pake ibas logo GBKP guna menjelasken maka gerejanta GBKP erpengue nandangi pendilo Tuhan ibas ndalanken tugas panggilenna ibas kerina tantangen si lit.

• Piga – piga hal si banci si idah arah pendilo Jesaya rikutken bahan oraten PJJ – nta senda enda eme :

1. Pendilo si isehken man Jesaya eme sada pengergan Dibata man manusia, ija Dibata make manusia jadi partnerna guna ikut campur tangan mereken kontribusina ntah berkarya guna mpekena kegeluhen manusia. Ibas pengertin sienda me teolog si tergelar Karl Barth ngataken : “Allah itu mampu melakukan banyak hal, tetapi Ia tidak selalu mau mewujudkannya. Sementara manusia selalu mau melakukan banyak hal tetapi ia tidak mampu melakukannya”
2. Pendilo si isehken Tuhan man Jesaya ertujun gelah Jesaya mabai bangsa Israel nggeluh mulihi ibas dalan Tuhan alu meritaken berita pertobaten erkiteken kejahaten bangsa e.
3. Patut ka pe ibereken jempol man Jesaya erkiteken keberanianna ngaloken pendilo e selaku nabi itengah – tengah kegeluhen bangsa si lanai erngena ate Tuhan. Sebage cataten : Kenca ra ja Uzia igantiken raja Zakaria maka kegeluhen bangsa Isarel memang tuhu – tuhu bobrok kel subuk e ibas segi pemerintahen bagepe ibas bidang agama. Raja zakaria si menggantiken raja Uzia mate ibas thn 740 SM. (2 Raja-raja 15 : 3). Ibas paksa sie raja Zakaria i turiken mate erkiteken ukumen si isehken man bana alu mereken penakit kusta. Sebab ibas kegeluhen beragama raja Zakaria tuhu lanai ngergaken Tuhan janah pang mengambil alih tugas iman i rumah pertoton alu bengket kubas ruang si badia ras ngelakoken persembahen tutungen man Dibata si la banci ia ngelakokenca (Bd. 2 Kronika 26 : 1 – 23).
4. Pendilo e pe iawali alu perjumpan secara khusus antara Jesaya ras Dibata. Ija Dibata ncidahken diriNa man Jesaya. Janah perjumpan e sendiri menghasilken keriahen man Jesaya erkiteken dosana ialemi Dibata kenca pengakunna maka ia sendiri pe kalak si perdosa si nggeluh i tengah – tengah bangsa si erdosa. Kenca pengakunna e me maka Dibata nuruh malekat Serafim engkuitken biber Jesaya alu bara api si ibuatna ibas batar – batar persembahen nari sebage simbol pengalemi dosa Jesaya. Pengalemi dosa e sendiri isehken Dibata erkiteken Jesaya memang enggo i persiapken Dibata ras terpilih guna meritaken berita pertobaten man bangsa Israel si meriah ukur nggeluh ibas erdosa.
5. Pendilo e labo bersifat perintah tapi sada pendilo (ajakan) “Ise ndia Ku suruh”. Ertina Jesaya bebas memilih pendilo (ajakan) Dibata e antara “ue” ras “lang” ras tentu saja bicara Jesaya la nggit ngaloken pendilo e, maka Dibata pe tentu milih kalak si deban si nggit ndahiken – dahinNa. Tapi Jesaya muat sada keputusen sitepat ibas pendilo Tuhan nina “aku suruhlah aku”.
6. Cataten pe man banta, maka tupung Jesaya ngidah kemulian Dibata, nina Jesaya “cilaka aku, lanai lit arapen man bangku, sebab alu matangku enggo kuidah raja, Tuhan simada kuasa, adi tep – tep ranan si mentas arah biberku dosa kerina, janah aku pe ringan itengah – tengah bangsa ija tep – tep kata si ibelaskenna dem alu dosa” (ay. 5). Pengakun Jesaya enda penting si perdiateken sebab Jesaya la nuriken kerina bagin tubuh si lit, tapi ia ngataken “biber” (“najis bibir”) sebage sada bagin si mekelek kel ibas dosa kalak Israel. Kata enda pe tentu ningetken sada pengertin si mbages ras perlu si ukuri alu mbages ibas jamanta si genduari, sebab enterem memang kalak genduari hanya beluh “erbasa – basi” ibas kegeluhenna sebage kalak kristen ntah sebage warga gereja, bandingken kubas pengertin oraten PJJ-nta ibas ibas minggu si enggo lewat 24 – 31 Jan 2016, alu tema “Cidahken Kinitekenndu Arah Perbahanendu”.(https://israelhsmilala.wordpress.com/…/suplemen-pjj-24-30-…/).

• “Aku Suruhlah Aku” nina Jesaya ngaloi pendilo Tuhan, tentu bageme pe kita idilo guna ndahiken dahin pelayanen gerejanta. Enterem senina – turangta si enggo muat bagin ibas dahin pelayanen gerejanta sebage bukti ia kalak si ipilih Tuhan ras enggo nggejapken uga belinna pasu – pasu Tuhan ibas kegeluhenna. Emaka mari sekalak – sekalak kita, sibuatkalah baginta ibas dahin pelayanen e, subuk ibas sebage serayan Tuhan Pdt/Pt/Dk, ke – Pengurus Kategorial ntah pe Ke-Panitian, rsd.

• Sidahiken dahin e alu mehui amin gia mbue tantangenna. Mbelin kel memang tanggungjawab kalak sierdahin ibas Tuhan, si menguras energi, tenaga, pikiren ras materi, waktu guna keluargata, gia bage tetaplah sidahiken – dahin e sebage komitmenta ras Tuhan. Dage nintalah ngaloi pendilo Tuhan e sue ras tema PJJ-nta sekali enda “Ijenda Aku Suruhlah Aku”.

Pekanbaru 29 Feb 2016.
Pdt. Israel HS Milala.