Suplemen Pekan Doa 15 Mei 2016 (Wari I). “Aron Dibata Si Ertoto, I Pegegehi Kesah Si Badia Guna Ertoto” Perb 4 : 23 – 31

Suplemen Pekan Doa 15 Mei 2016 (Wari I).

“Aron Dibata Si Ertoto, I Pegegehi Kesah Si Badia Guna Ertoto”

Perb 4 : 23 – 31

La sigejap dingen enggo ka seh paksana kita ngelakoken Pekan Doa i tengah – tengah kegeluhen gerejanta si ilakoken kita sada minggu dekahna tep – tep wari menaken ibas tgl 15 – 21 Mei 2106. Mari si respon Pekan Doa enda alu sikap positif ras mbelin pengarapen gerejanta maka asa bancina kerina kita ngawan itengah – tengah gerejanta banci min ngikuti Pekan Doa enda alu mehuli. La menukah memang ngaturken waktu guna banci tetap setia guna ngikuti Pekan Doa sinilakoken ibas waktu si lit seminggu dekahna, terlebih – lebih ibas buena kesibuken – kesibukenta ibas  jaman enda. Tapi amin bage gia marilah si usahaken guna banci ngikuti Pekan Doa si niaturken gerejanta ibas tahun enda alu mehuli, erkiteken arah Pekan Doa sekali enda kita iajuk guna banci ras – ras ertoto nandangi kiniulin kegeluhenta secara pribadi, kegeluhen jabunta, kegeluhen gereja dingen kegeluhen kerina kalak singgeluh i tengah – tengah doni enda.

La menukah menentuken wari  - wari guna banci erbahanca kita radu ras ertoto ibas persadanta kidekah sada minggu dekahna guna banci ertoto radu ras temanta si sada kiniteken ras sada penggejapen. Sieteh maka waktu guna sie genduari enggo semakin sempit erkiteken kesibukenta masing – masing si tep – tep wari, emaka sekali nari sebage persinget man banta marilah sipergunaken waktu Pekan Doa enda alu mehuli, sebab arah Pekan Doa enda pe ateta tole gelah kita mulih ku gegehta si tuhu – tuhu selaku kalak si erkiniteken eme ertoto, sebab man banta ertoto emekap kegeluhen (Doa Adalah Nafas Kehidupan Kalak Si Tek). Alu bage dage mari ertoto, ertoto alu ras - ras ibas persadanta selaku anak – anak Tuhan, khususna ibas sada minggu enda kita ngelakoken Pekan Doanta.

Tema Pekan Doanta ibas wari si Pemena enda “Aron Dibata Si Ertoto, I Pegegehi Kesah Si Badia Guna Ertoto”, erpalasken oratenta Perb 4 : 23 – 31. Guna banci lebih seh tujun temata ibas berngi si pemena enda mari si gar – gari lebe kai si tersirat ibas bahan renungenta enda :

·         Secara keseluruhen Perb 4 enda nuriken kerna semangat rasul – rasul ibas mbritaken Berita Si Meriah kenca nusurna Kesah Sibadia bagepe litna semangat penolaken nandangi Berita Si Meriah. Emaka ibas semangat penolaken e kegeluhen ajar – ajar pe tentu terancam ibas mbritaken Berita Si meriah. Tapi amin bage gia khusus ibas Perb 4 enda ituriken maka semangat ajar – ajar khususna Petrus ras Johannes la pernah surut ibas mbritaken Berita Si Meriah. Tempa ietehna maka ibas mbritaken Berita Si Meriah e labo mulus saja – mulus saja dingen tempa enggo ietehna erbage – bage me reh tantangen ras kiniseran sibahak reh man bana, tapi tetap saja amin bage gia maka semangat ajar – ajar e surut.

·         Ibas Perb 4 enda ituriken Petrus ras Johanes enggo i tangkap ras ibaba ku pengadilen agama erkiteken nembeh ate kalak si enterem nandangi kesetian ras semangatna ibas nuriken Yesus Kristus me Tuhan si enggo keke ibas simate nari dingen Yesus me ngenca dalan keselamaten. Petrus ras Johannes i tangkap jenari i baba ku pengadilen agama guna i adili, alu sura – sura gelah ula nari  reh mbarna Berita si Meriah si iberitaken ajar – ajar e. Ibas Pengadilen e ituriken pe hadir kalak si erate nembeh man Yesus ras ajar – ajar eme imam si mbelin Annas ras Kayapas, Johannes, Alexander dingen piga – piga kalak ibas kesusuren imam si mbelin nari, guna mereken pengadilen ras memutusken maka ajar – ajar lanai banci erberita kerna kerna Yesus me Tuhan si enggo keke ibas si mate nari dingen Yesus me ngenca Tuhan dalan kempak kinirajan surga.  

·         Bageme ituriken Petrus rs Johannes ndatken tantangen si mberat ibas mbritaken Berita Si Meriah, tapi amin bage gia  rasul  e  duana la pernah gentar dingen mbiar, tempa lit motto ibas kalak e “Setia Sampai Mati” bagi kesetian si icidahken Sadarakh, Mesakh, Abbednego ibas menolak ersembah nandangi patung si ibahan raja Nebukadnezer, bageme Petrus ras Johannes la nggit sinik ibas mbritaken Berita Si Meriah gia sekali lit ancamen nyawa sebage taruhenna.

·         Umumna kalak si kebiaren pasti panik dingen ndarami perlindungen adi melala reh tekanen ras ancamen. Tapi ibas kesaksin Perb 4 enda ituriken Petrus ras Yohenes la melariken diri dingen ndarami perlindungen tapi tetap yakin maka kai si ilakokenna e, e me bekas persuruhen Dibata, emaka ibas penggejapen si bage rupana duana rasul e la sitik pe gentar ibas mbritaken Berita Si meriah sebab duana rasul labo mengandalken gegehna tapi tetap mengandalken gegeh si rehna ibas Dibata sebage gegeh situhu - tuhu ibas ndahiken – dahin Tuhan.

·         Lebih asangken kiniteken rasul rasul e duana, maka kepeken perpulungen si enggo tek nandangi Berita Si meriah pe tetap mendukung rasul – rasul ibas pertotonna. Dukungen e teridah  ibas kenca Petrus ras Yohanes mereken kesaksinna tupung i tangkap ras kenca  ibebasken maka kerina teman – teman Petrus ras Johannes ertoto ras – ras mindo man Dibata gelah Dibata tetap simereken gegeh man kerinana ibas meritaken Berita Si Meriah (Perb 4 : 23 – 31).  

Temata “Aron Dibata Si Ertoto, I Pegegehi Kesah Si Badia Guna Ertoto” ncidahken maka kita sebage sada aron (Hidup Di Dalam Persekutuan) erkiteken sie maka la banci lang kita ngelakoken bagi kai si jadi ibas perpulungen si pemena. Telu hal sibanci isehken kami ijenda guna banci si prakteken ibas kegeluhen persadaanta eme :

1.      Pertoton si ilakoken radu ras teman si sada kiniteken tuhu penting sebab si ibelasken ras – ras e erbahanca gegeh toto e lebih megegeh, sebab pertoton e sendiri sifatna ibas kinitekenta eme  sebage salah sada gegeh ras senjata rohani man kalak si tek guna melawan musuh – musuhna (Ef 6 : 10 – 18).

2.      Pertoton si ilakoken perpulungen si pemena alu ertoto ras – ras merupaken sada bentuk rasa tanggungjawab bersama bagepe sekaligus mereken dukungen nandangi teman – temanna erkiteken ieteh perpulungen maka perlawanen si ialami Petrus ras Johanes labo perlawanen pribadi. Tentu hal sie pe banci silakoken ibas kegeluhenta sigenduari. Si eteh maka erbage – bage denga nge tantangen sir eh nandangi dirinta ras gereja ibas mbritaken Berita Si Meriah emaka tentu maka la banci lang pe ertoto me kita ras – ras guna mereken semangat ras dukungen man temanta si ngenanami erbage – bage tantangen ibas mbritaken Berita Si Meriah (Bd. Perb 1 14 ; 2 : 46 ; Rom 15 : 6).

3.      Perpulungen si pemena itandai alu ciri khas sebage perpulungen si tutus (tekun) ibas ertoto, tentu bage ka me ateta kita nggeluh ras itandai sebage perpulungen/gereja si mengandaken gegeh ertoto sebage tanda kita tetap erpengendes kempak Dibata, dingen gereja/perpulungen si nggeluh eme di kune perpulungenna tutus ertoto ras mengerahken kegeluhen perpulungenna kubas missi Kristus.

Dage, jadilah kita perpulungen si ertoto ras mengandalken gegeh pertoton nandangi Dibata simada kuasa. Dingen tetap malem ateta  ertoto ibas kerina persadanta erkiteken kita sada penggejapen (Kam Kap Aku Ras Aku Kap Kam), dingen sieteh maka tanggungjawabta kap selaku kalak si tek notoken kerina kegeluhen si lit ibas doni enda.  

Amin. PKU 14 Mei 2016.

Pdt. Israel HS Milala. 

KESAH SI IPADANKEN DIBATA Johanes 16 : 12 ; Ef 1 : 13 – 14.

KESAH SI IPADANKEN DIBATA

Johanes 16 : 12 ; Ef 1 : 13 – 14.

Rikutken kelender gerejanta ibas tgl 16 Mei 2016 enda, maka seh me ka kita ku peringetten kerna wari Pentakosta. Piga – piga hal si banci si ertiken kerna Wari Pentakosta e, eme :

• Pentakosta eme wari si ipadanken Yesus kenca Ia nangkih ku surga. Alu bage maka banci si kataken arah penetapen kerna nusurna Kesah Si Badia e, Yesus encidahken maka Ia tetap engkelengi ras setia nemani ajar – ajarNa ibas mbritaken Berita Si Meriah dingen sekaligus peristiwa nusurna Kesah Si Badia e sebage pembuktian lanjuten si ncidahken maka Ia me Tuhan si setia ibas kerina kata ras perbahanenNa (Bd. Yoh 14 : 16 – 17).

• Peristiwa Pentakosta e sendiri pe sebage bukti keleng ate Dibata man manusia, ertina Pentakosta e ningetken maka karya keselamaten si enggo ilakoken Yesus la ngadi kenca Ia nangkih ku Surga. Tapi berita keselamaten e tetap arus iterusken gelah enterem jelma ngaloken keselamaten ibas Tuhan nari (Ef 1 : 13 – 14).

• Kenca nusurna Kesah Si Badia, ajar – ajar nggeluh ibas penemani Kesah Si Badia dingen tuhu – tuhu erkuasa ibas mbritaken Berita Si Meriah. Sie teridah arah enterem kel kalak si tek dingen iperidiken dingen kerina kalak si tek e nggeluh ersada ibas persadaan Kesah Si Badia/Persekutuan Roh Kudus (Bd. Perb 2 : 1 – 16 ; II Kor 13 : 13 ; Flp 2 : 1).

Bageme genduari si pahamai kenca wari Pentakosta, kit ape memahami dingen tek maka  Kesah Sibadia ringan dingen ersada ibas kegeluhenta dingen Kesah Si Badia e ikut ersaksi raduken ras dirinta.

Banci jadi lit turah penungkunenta, uga banci kita ngertikenca maka Kesah Si Badia ikut ersaksi raduken ras dirinta ? Pdt. LZ. Raprap ngatakenca ibas buku kumpulen Khotbahna “Mau Banngkit Tapi Tidak Mau Mati”, ibas penjelasen aplikasina nina “Jikalau seseorang menginginkan Roh Allah bersaksi bersama dengan dirinya, maka roh kita sendiri harus nyambung dengan Roh Allah. Seperti laksana sebuah stasiun televisi yang memancarkan sinyal – sinyal gambar dan suara, tetapi tidak akan tampak di televis kita kalau kita tidak menyetelnya pada gelombang yang sama. Jadi gelombang televisi itu harus nyambung dengan gelombang televisi kita. Demikian pula sat Roh Allah hendak masuk di dalam diri kita, roh kita juga harus juga terarah kepada Dia, jika Roh Allah hendak masuk kedalam roh kita, tetapi roh kita terarah kepada nafsu dunia maka sambungan Roh itu tidak akan terjadi. Jadi roh kita harus terarah kepada Roh Allah agar terjadi koneksi, sehingga kita pun akhirnya menjadi anak yang bersatu dengan Dia di dalam Roh”.

Si imani pe maka Kesah Si Badia e me sada pemere si khusus si isehken Dibata nandangi kalak si ikelengi ras ipilihNa (Bd. Makna pencurahan Roh Kudus kepada murid – murid yang diberikan secara khusus pada hari Pentakosta (Bd. Perb 2 : 1 – 16 ; Yoh 14 : 16). Alu bage, tetaplah nggeluh ibas penemani Kesah Si Badia  dingen njadiken dirinta ingan Kesah Si Badia ringan alu mpediat Kesah Si Badia erdahin mengubahken dirinta (Bd. I Kor 6 : 2).

Tema PJJ-nta “Kesah Si I Padanken Dibata”, tema enda ngatakenca maka Kesah Dibata e enggo ringan ibas dirinta sue ras si I padankenNa. Tapi tentu labo ateta maka peringetten kerna wari Pentakosta e terjeng peringetten saja, tapi uga kita banci nggejapken maka Kesah Si Badia ringan ibas dirinta si mengubahken dirinta dingen naksikenca man enterem jelma gelah reh teremna jelma ndatken keselamaten (Bd. Gal 5 : 25). Dage, ija ringan Kesah Si Badia maka ije arus lit kalak singaloken kebenaren Dibata ras eme tandana maka Kesah Dibata e enggo ringan ibas dirinta, Uga dage ninta ?

Selamat ibas ngaloken Kesah SI Badia dingen mpringetti wari nusurna Kesah Si Badia dingen mari tetap si cidahken dirinta sebage ingan Kesah Si Badia ringan dingen Kesah Si Badia e rikut ersaksi ras dirinta tandana kita anak – anak Dibata.

Amin. Pekanbaru 10 Mei 2016.

Supelemen PJJ 27 Maret – 02 April 2016.

“Persadaan Ras Kristus Ibas Lakon Persadan Si Badia”

Lukas 22 : 14 – 20

Pokok Pikiren :

• Gerejanta GBKP (Protestan) hanya mengakui dua sakramen eme : Lakon Peridin Si Badia ras Lakon Persadan Si Badia. Pengakunnta kerna duana Sakramen e erkiteken Jesus jine si netapkenca emaka alu bage i luar ibas si dua e lanai lit sakramen ibas gerejanta (Bd. Mat. 28 : 1 – 20 ; 26 : 26 – 29 ; Mrk 14 : 22 – 25 ; 1 Joh 5 : 7, 8 ; Joh. 3 : 5 ; 6 : 54, 55 Luk 22 : 14 – 20 I Kor 11 : 23 – 25). Guna lebih jelasna dingen banci pe mereken pengertin man banta kerna sakramen ras guna memahami Tema PJJ-nta sekali enda “Persadaan Ras Kristus Ibas Lakon Persadaan Si Badia, maka la banci lang si pahami kerna pengertin “Sakramen” sebab “Lakon Persadaan Si Badia” eme salah sada sakramen si lit ibas gerejanta GBKP (Gereja Protestan).

• “Pengertin kerna “Sakramen”. Kata “Sakramen” rehna ibas cakap Latin : “Sacramentum” si iterjemahken ku bas pengertin “Perbahanen Si Badia” (Sacer = Kudus). Istilah “Sakramentum” enda, adi ipake ibas bidang hukum ras pengadilen nuduh kerna barang sikerajangen si ipake guna jadi jaminen, asum dua pihak erbahan perpadanen ras adi dua pihak ersoal, maka barang pihak si talu isita jadi sikerajangen kalak si menang. Ibas pemahamen kebiasan tentera Romawi, kata “Sacramentum” e nuduh kubas pengertin perpadanen/umpah setia asum sesekalak iangkat jadi tentera. Alu latar belakang si enda me dungna gereja mengambil alih istilah “Sacramentum” ras ibere isi/pengertin/pemaknaan si mbaru si iertiken maka “Sakramen” jadi jaminen si ibereken Dibata nandangi kalak si ikelengiNa dingen sekalak si enggo ndatken “Sakaramen” la banci lang nehi perpadanenna ras Dibata, erkiteken arah “Sakramen” si ialokenna, maka ia pe enggo imatreiken (itetapken) guna jadi saksi Kristus ibas kerina kegeluhen (Bd. Rom 6 : 3 ; 14 : 11)

• Lit dua pemahamen/pendapat kerna sakramen si isehken kami ibas paksa enda e me :
  1. Agustinus, ngatakenca : “Sakramen” eme tanda si teridah ibas si la teridah ibas sada hal si badia, ntah wujud si teridah ibas lias ate si la teridah. Sakramen banci ikataken sebage Kata (Ind. “Firman”) si teridah.
  2. Calvin ngumpaken sakramen alu matrei ntah segel, si biasana itamaken ibas sada piagam ntah surat perpadanen guna ngesahken isina. Arah sakramen e Tuhan mpegegehi ras ngesahken perpadanen si enggo ibahanNa ras manusia arah pengorbanen Kristus i Golgota.

• Ibas pengertin bagi isingetken idatas maka sakramen imaknai sebage tanda si teridah si isehken Dibata ibas nehken keleng ateNa si ilakoken gereja dingen sekaligus sebage simbol perpadanen kalak si tek man Dibata. Janah perlu pe siinget maka alat, tanda – tanda ntah simbol-simbol si ipake i bas pelayanen sakramen labo lit daya ntah gegehna si istimewa, ertina skaramen e ermakna adi Kesah Si Badia erdahin i bas pusuh manusia ras eme sebabna maka sakramen arus i lakoken alu dem kiniteken.

• Makna Lakon Persadaan Si Badia. “Lakon Persadan Si Badia” si ilakoken ibas gerejanta erpalaskan “Perjamuan Malam” si ilakoken Tuhan Jesus ras ajar-ajarNa berngi ope denga Tuhan Jesus itangkap jenari i salipken ku kayu persilang. “Perjamuan Malam” e ilakoken Yesus sehubungen ras “Perayaan Paskah” si enggo biasa ilakoken kalak Jahudi guna peringet – ingeten bangsa Israel ndarat i Mesir nari (Kel 12 : 1 – 13). Tapi pemaknaan Paskah kalak Jahudi e lebih imaknai Yesus sanga erbahan “Perjamuan Makan Malam” lebih kubas persadanna ras ajar – jarNa. Makna si mbaru si isehken Yesus ibas persadanNa ras ajar – ajarNa e teridah ibas perkataan Yesus asum nina : “… Enda me kulangKu si ibereken man gunandu. Lakokenlah bage, guna peringet-ingeten nandangi Aku … “Calung enda me iketen padan si mbaru si isahken alu darehKu. Tep – tep kam minem tare calung e, lakokenlah bage, guna peringet-ingeten nandangi Aku” (Luk 22 : 14 – 20 ; Mrk 14 : 22 ; Luk 22 : 14 Bd. I Kor 11 : 23 – 25).

• Tema PJJ-nta sekali enda “Persadan Ras Kristus Ibas Lakon Persadan Si Badia”. Bali ras Lakon Peridin Si Badia, maka ibas “Lakon Persadan Si Badia” asa kai kalak si ikut ibas “Lakon Persadaan Si Badia maka ia enggo “terhisap” ku bas perpadanen si ibahan Kristus eme : Sada i bas kematen ras kekeken Kristus dingen ndatken ras bengket kubas kegeluhen si mbaru (Rom 6 : 3 – 4 ; Kol 2 : 12). Sekalak si ngikuti “Lakon Persadan Si Badia” ndatken pengalemi dosa (Penyucian dan Pembenaran) ras “Pengudusan” arah Kristus(Bd. I Kor 6 : 11 ; Ep 5 : 26). Ibas pengertin si enda me maka labo kerina kalak banci bengket kubas “Lakon Persadaan Si Badia” sebab “Lakon Persadan Si Badia” e sekaligus jadi tanda bengket kubas persadan ras Perpulungen – Gereja sebage kula Kristus dingen eme maka ibas setiap “Lakon Persadan Si Badia” arus lit pengakun kiniteken (kesaksi) maka kita tek man Dibata dingen arah lias ateNa me kita ndatken pengalemi dosa ras keselamaten.

• Erti Roti ras Anggur si ipake ibas Lakon Persadan Si Badia ? Roti ras anggur si ipake ibas “Lakon Persadan Si Badia” e me Roti ras Anggur biasa. Tapi ibas pemaknanna, Roti ras Anggur e jadi simbol sebage “Kata Dibata si teridah” dingen sebage pengesahen kerna keselamaten si enggo isehken Dibata arah Yesus kristus (Nen : Pemahamen kerna makna Sakramen idatas si isehken bapa gereja Agustinus ras Calvin).

• Ibas “Lakon Persadan Si Badia kita ndatken pasu – pasu ija kita ngenanami persadan ras Kristus ras sekaligus ngaloken diakoni Kristus. Tapi perlu si inget maka gia “Lakon Persadan Si Badia” tanda peringet – ingeten nandangi kematen Kristus tapi “Lakon Persadan Si Badia” labo perjamuan duka, labo perkabungen, tapi “Lakon Persadan Si Badia” e me pengataken bujur erkiteken kematen, kekeken ras kemenangen Kristus ras sekaligus jadi bagin kalak si tek man baNa.

• “Persadaan Lakon Persadan Si Badia” eme sebage tanda kita ndatken “Pemulihen” si ngatakenca kita enggo ersada mulihi ibas persadannta ras Dibata, emaka adi enterem perpulungen si ikut ibas “Lakon Persadan SI Badia” e tandana enggo enterem kalak si enggo ndatken keselamaten janah lebih asangken sie maka “Lakon Persadaan Si Badia” pe sebage tanda kita memulihken hubungenta si enggo ceda sapih temanta manusia mulihi sikap bagi si ngena ate Tuhan (Bd. Perb 2 : 43 – 47).

• Lakon Persadan Si Badia nuduh ku masa si nandangi reh, ku ‘Perjamuan Agung’ si isikapken, kesertan kegeluhen si tuhu-tuhu dingen la erkeri-kerin, si pagin terjadi. Nina Tuhan Jesus: “Kenca wari enda lanai Kuinem lau anggur enda seh warina Aku ras kam nginem lau anggur si mbaru i bas Kinirajan BapangKu” (Mat 26 : 29). Lakon Persadan Si Badia e me “Perjamuan pengharapan”, keriahen Kinirajan Dibata si ibenai i doni enda, janah genduari kita paksana menuju ku kesempurnanna si nandangi reh.

• Bage me Kristus (gereja) mpersadaken kita ibas “Persadan Lakon Persadan Si Badia” erkiteken litna lias ras keleng ateNa e kita ndatken keselamatenerkiteken pengalemi dosa si isehkenNa. Ipebadiaken seh maka kita atan man ras minem semeja ras Tuhan. Ndatken pelayanen diakoni ibas Kristus nari alu mereken daging ras darehNa guna kita sebage tanda pemulihen/perdamen hubungennta antara Bapa ras anak nggeluh ibas kiniersadan alu mehuli.

• Alu bage uga dage ninta ? tep – tep kali dage kita bengket kubas “Persadan Ras Kristus Ibas Lakon Persadan Si Badia” ingetlah keleng ate Kristus man banta : Dosanta enggo ialemi emaka alemi pe salah kalak si ersalah man banta. Kristus enggo mpebadiaken kita ibas kerina kegeluhen si la mehuli, ula nai si ulihi erbahan lagu si la mehuli gelah alu bage “Lakon Persadan Si Badia” si bengketi kita tuhu – tuhu badia. Adi Kritus enggo mereken pemulihen/mperdameken kita ras diriNa maka bengketlah kubas “Lakon persadaan Si Badia” alu enggo erdame ras kerina jelma. Adi Kristus enggo melayani kita ibas mejaNa alu ngatanken kita man ras minem ras Ia maka lakokenlah pe pelayanen si bage rupana tanda kita memang tuhu ajar – ajarNa.

PKU 29 Maret 2016.