Suplemen PJJ 06 – 12 Sept 2015. “Kiniteken Ras Ilmu Pengetahuan Teknologi” Kej 7 : 1 – 16

Suplemen PJJ 06 – 12 Sept 2015.

Tema : “Kiniteken Ras Ilmu Pengetahuan Teknologi”
Ogen : Kej 7 : 1 – 16

Shalom.

Patut sikataken bujur man Dibata erkiteken kita me puncak penciptaan Dibata sipaling mulia si ikuhiNa alu mereken kesah kegeluhen, akal budi, pikiren ras perasaan. Dingen arah kerina pemere Dibata e me me manusia banci mengembangken dirina alu nambahi pengetahuanna ras menikmati hasil pengetahuanna sebage penunjang kegeluhen manusia i doni. Sebab tujun Dibata ibas mereken ”Ilmu Pengetahuan” man manusia eme gelah manusia banci mengelola ras njagai doni si itepa Dibata sue ras sura – suraNa ras guna kiniulin kegeluhen manusia i doni (Bd. Kej 1 : 28).

Ibas kita memamahami dirinta sebage tinepa Dibata, arus dage siakui maka kerina “Ilmu Pengetahuanta” si dat ibas arah dua sumber nari eme : Dibata sebage sumber utama sebagai pencipta ras ibas diri manusia e sendiri sebage ciptaan si iperlengkapi alu akal budi, pikiren ras perasaan. Tapi amin bage gia, tetap saja “Ilmu Pengetahuan” manusia labo sempurna, erkiteken manusia labo sumber pengetahuan. Dibata nge tetap sebage sumber kerina pengetahuan manusia. Jadi erkiteken sie pengetahuan manusia banci menghasilken pengetahuan si salah, erkiteken sie me raja Salomo ngataken “ … bena – benana kepentaren eme erkemalangen man Dibata” (bd. Kuan – kuanen 1 : 7).

Ibas jamanta sigenduari perkembangen “Ilmu Pengetahuan ras Teknologi” semakin hari semakin berkembang dingen e merupaken sada keriahen man manusia ras rikutken oraten PJJ – nta sendah isingetken maka “Ilmu Pengetahuan ras Teknologi” sebage salah sada cara Dibata erdahin guna kiniulin kegeluhen manusia (bd. Rom 8 ; 28). Dingen pembuktian e salah sada teridah arah kegeluhen Nuah. Jadi alu bage maka “Ilmu Pengetahuan ras Teknologi” si ibereken Dibata man manusia banci ipergunaken guna menunjang kegeluhen manusia ku arah si lebih baik.

Kej 7 : 1 – 16, memang nuriken man banta kerna kejahaten manusia ibas jamanna, ija manusia erlagu – langgkah la mehuli ras tuhu – tuhu encedai ukur Dibata. Tapi ituriken pe ibas paksa sie lit nge kalak sibujur eme Nuah, si la ndabuh kubas cara – cara kegeluhen manusia si jahat ras erkiteken kegeluhenna tetap lit ibas mehuli, Dibata mereken man Nuah keselamaten alu nuruh Nuah erbahan sada kapal. Nuah iselamatken Dibata, alu nuruh Nuah erbahan kapal si mbelin. Dingen banci sikataken kapal Nuah e enggo berteknologi canggih ibas jamanna. Sebage bukti kecanggihenna, maka kenca doni keleng – lengen, kapal si erteknologi canggih e menyelamatken kerina keluarga Nuah ras kerina jenis tinepa Dibata. Jadi banci si simpulken arah ogen PJJ – nta sekali enda maka : “Ilmu Pengetahuan ras Teknologi” eme pemere Dibata, janah arah e pe Dibata pe erdahin guna kiniulin kegeluhen manusia. Alu bage dage, labo lit si salah kerna teknologi ras labo man salahenken “Ilmu Pengetahuan ras Teknologi”, ise dage si salah adi ateta ndarami kesalahen ? si salah eme manusia sendiri ibas makeken “Ilmu Pengetahuan ras Teknnologi” si ibereken Dibata alu la ertanggung – jawab.

Uga ninta ibas jamanta sigenduari ?

La banci sipungkiri kemajuan “Ilmu Pengetahuan Ras Teknologi” ibas kegeluhenta enggo semakin maju ras situhuna patut manusia ngataken bujur man Dibata sebab mbelin kel “anugrah” Dibata man manusia arah “Ilmu Pengetahuan ras Teknologi”, dingen erkiteken sie me manusia mengalami kemajuan ibas erbage – bage hal. Memang la ka pe banci si pungkiri, ibas realita kemajuan “Ilmu Pengetahuan Ras Teknologi” melala hal – hal negatif si jadi akibat kemajuan “Ilmu Pengetahuan Ras Teknologi” e, umpamana : terjadi perubahen kebudayaan manusia si semakin komsumtif ras penyalah gunaan nandangi “Ilmu Pengetahuan Ras Teknologi” e.

Alu bage !

Ibas PJJ – nta enda me kesempatenta erlajar ntah isingetken mulihi man banta selaku kalak si erkiniteken, uga kita nggeluh ibas makeken ntah memfungsiken “Ilmu Pengetahuan Ras Teknologi” si sentudu ras sue bage peraten Dibata. Piga – piga hal sibanci jadi persinget man banta eme :

• Ibas kita makeken “Ilmu Pengetahuan Ras Teknologi” pake lah e sebage salah sada “ibadah” ibas kegeluhenta sebage kalak sierkiniteken.

• “Manusia irancang Dibata guna bertumbuh ras berkembang” eme maka Dibata mereken man manusia, akal budi, pikiren, cipta, karya ras rasa. Ibas sie “Ilmu Pengetahuan Ras Teknologi” me sebagai salah sada cara si ibereken Dibata manusia ibas mengelola dirina guna banci bertumbuh ras berkembang sue ras peraten Dibata.

• Kemajuan “Ilmu Pengetahuan Ras Teknologi” encidahken sada pembuktian maka manusia semakin mampu mengusahai, mengelola ras njagai doni si ibereken Dibata ras sie tentu sada kemajuan si luar biasa ibas kegeluhen manusia.

• Nuah ibas oraten PJJ – nta ndai encidahken maka Nuah la ndabuh kubas dosa dingen menikmati hasil ibas “Ilmu Pengetahuan Ras Teknologi” si itemuken manusia ibas jamanna. Tapi makeken teknologi si itemukenna sebage karya penunjang kegeluhen manusia ras ciptaan Dibata. Eme maka ninta penemuan teknologi e sama sekali salah ! sebab sieteh sendiri melala kel alat – alat teknologi si ipake sebage karya guna menunjang kegeluhen manusia kuarah silebih mehuli, tapi dikune lit kesalahen ibas makeken ras memfungsiken “Ilmu Pengetahuan Ras Teknologi” ndai, ibas sie kita nge ngelupaken Dibata sebagai pencipta ras la menempatken dirinta ibas panggilenta sebage kalak sierkiniteken i tengah – tengah doni enda.

Albert Einstein pernah ngatakenca nina : “Religion without scienceis blind, and science without religion is lame” (agama tanpa pengetahuan adalah buta dan pengetahuan tanpa agama adalah pincang). Payo me kai si ikataken Albert Einstein enda erkiteken la mungkin kita nandai Tuhan tanpa pengetahuan ras uga ninta nggeluh tanpa pengetatuan.

Dage, labo banci kita menghindar ibas kemajuan “Ilmu Pengetahuan Ras Teknologi” erkiteken “Ilmu Pengetahuan ras Teknologi” pasti erdalan sesuai ras kemajuan jaman. Puji Tuhan, enggo sinikmati kerina hasil “Ilmu Pengetahuan Ras Teknologi” e ibas paksa enda, dikune lit pe dampak negatifna, e lah si ukurken uga cara mencegah ntah mengurangi dampak si ihasilkenna, subuk e man dirinta secara pribadi, keluarga ras kegeluhen masyarakat. Pemerintah pe berperan aktif nge ibas mengurangi, mencegah ras dampak si ihasilken “Ilmu Pengetahuan Ras Teknologi” umpamana, alu erbahan undang – undang ITE ras sidebanna. Tapi ibas sie kerina ; tentu kita sebage mahluk sirukur ras kalak sierkiniteken arus lebih beluh ras ngasup menguasai dirinta, bagi isenggo icidahken Nuah ibas kegeluhenna. Kerina kalak ndabuh kubas perlakukan kegeluhen si erdosa tapi erkiteken persadanna Nuah ras Tuhan dingen kepatuhenna nandangi undang – undang Tuhan, Nuah la ndabuh kubas perlakukan kegeluhen sierdosa. Jadi banci si simpulken maka manusia sierkiniteken ngasup nge ia la ndabuh kubas kegeluhen si erdosa gia uga sekali majuna “Ilmu Pengetahuan Ras Teknologi” ras si itawarkenna. Dage labo lit salahna makeken “Ilmu Pengetahuan Ras Teknologi” saja si pergunakenlah guna menunjang kegeluhenta alu mehuli ras nikmatilah sie kerina sebage hasil karya si ibereken Dibata man banta alu ngataken bujur man bana sumber kerina “Ilmu Pengetahuan Ras Teknologi”

Amin.
Pekanbaru 07 – 09 – 2015.