Suplemen PJJ GBKP 03 – 09 Juli 2016.
RUTANG SI MEGEGEH NAMPATI SI LA MEGEGEH
II Kor 8 : 13 – 15.
II Kor 8 : 13 – 15.
“Rutang Si Megegeh Nampati Si La Megegeh”
tema PJJ – nta sekali enda banci si kataken sebage salah sada jargon
gerejanta GBKP ras jadi metode si i pake gerejanta ibas nampati. Tema
enda pe enggo rusur icakapken nai nari ibas tema – tema perayaan
gerejawinta.
Paksa PJJ – nta sekali enda tetap
isingetken mulihi man banta tema enda “Rutang Si Megegeh Nampati Si La
Megegeh” gelah banci reh ulina kita ndalankenca ibas kegeluhenta secara
pribadi ras kegeluhen gerejanta, sebab tentu la ateta tema PJJ – nta
sekali enda hanya sebage jargon tanpa isi, tapi tema enda PJJ – nta
sekali enda jadi sada keharusen si harus si lakoken ibas kekristenenta.
Penungkunenna, banci kin tema enda ter –
relaisasi alu mehuli ? guna banci reh ulina pengangkanta kerna tema
enda, mari sigar – gari bahan PJJ – nta gelah alu bage tema enda memang
tuhu jadi “Jargon” ibas kegeluhen kinitekenta.
Enggo sieteh surat Korintus eme surat si
itulis Paulus guna nehken pengajaren ras kritikenna nandangi kegeluhen
perpulungen kalak kristen i Korintus. Dingen tuhu – tuhu Paulus sangat
kritis nandangi cara nggeluh kalak Kristen ibas paksa sie. Salah sada
pengajaren ras kritik si isehken Paulus e eme bahan oraten PJJ – nta
sekali enda, lit pe si banci si idah pengajaren ras kritiken si isehken
Paulus ibas oraten PJJ – nta sekali enda eme :
- Ibas II Kor 8 enda lit 3 kelompok perpulungen si isingetken Paulus, eme perpulungen kalak Makedonia, perpulungen kalak Yerusalem ras perpulungen kalak Korintus sendiri. Paulus menjelasken maka kalak Makedonia eme kalak singgeluh ibas kemiskinen, menderita. Tapi aminna gia lit ibas keadaan miskin ras mederita la erbahanca kalak e surut nehken keleng ate (ay. 1 – 5). Nandangi kalak Korintus sendiri Paulus mujiken perpulungen sebage perpulungen dem alu kiniteken ras kebayaken tapi sulit guna mpraktekken kerna perbahanen erkeleng ate. Nandangi kalak Yerusalem Paulus nuriken maka perpulungen paksana ngenanami kiniseran kesusahen simembutuhken penampat ibas teman – temanna nari (ay.7).
- Ibas pengajaren ras kritik si isehken Paulus man perpulungen kalak Korintus eme gelah kalak Korintus ngusih perbahanen kalak Makedonia, si ncidahken ras ngelakoken perbahanen keleng atena alu mendukung dana perpulungen kalak Kristen Yerusalem si paksana lit ibas kesusahen (ay. 1 – 5 bd, I Tes 2 : 14). Alu ncidahken gambaren kerna perpulungen Makedonia Paulus pe erpengarapen gelah kalak kristen Korintus termotivasi guna banci mendukung ras nampati kalak Kristen Yerusalem terlebih – lebih kalak Korintus sendiri enggo ngenanami keleng ate Tuhan si simpar ibas kegeluhenna (ay, 7 – 9). Alu bage si idah i jenda pengajaren Paulus man kalak Korintus eme gelah nyata min buah kiniteken ibas perbahanen dingen gia sekali lit ibas kemiskinen la jadi alasen guna la nehken keleng ate nandangi kalak si deban bagi si enggo ilakoken kalak Makedonia si nehken keleng atena melebihi asa kengasupenna (Bd ; Rom. 15 : 25 – 27 ; I Kor 16 : 1 – 4 ; Gal 2 : 10).
- Situhuna kalak Korintus enggo erpadan/erkomitemen guna nampati kalak Yersusalem tapi ibas kai si enggo ipadankenna la ilakoken perpulungen e (ay. 10 – 11). Erkiteken sie Paulus ngulihi ningetken kerna dasar kiniteken kegeluhen kalak Kristen man kalak Korintus alu ningetken : Kalak Kristen la banci lang nggejapken ras erpengue maka kai si it ibas ia eme pemere Tuhan. Emaka ibas penggejapen Dibata nge simasu – masu kerina kegeluhen, maka sekalak Kristen la banci lang nampati kalak sideban ibas kerina kinilitenna, dingen ibas nampati la banci ilakoken erkiteken keterpaksaan, tapi ilakoken erkiteken kesadaren diri nandangi keleng ate Tuhan ras dorongen keleng ate si lit ibas sekalak Kristen bagi jiwa keleng ate Kristus ( ay. 9 – 12). I jenda Paulus ngajarken hal sicukup penting maka nampati labo erkiteken dasar “kasihan” nandangi kalak sideban tapi memang arus ilakoken murni erkiteken sekalak kristen memiliki jiwa Kristus ibas dirina dingen njadiken keteladanen Kristus jadi ciri khas kegeluhenna.
- Ibas ay 13 – 15 si jadi bahan oratenta Paulus tole ningetken pengajarenna nandangi kalak Korintus nina “labo ateku mpenahangi kalak sideban alu nambahi babanndu tapi gelah ola situalen. Kelebihen si lit ibas kam genduari ras kekurangen si lit ibas kalak e genduari. Kune denggo kelebihen ka kalak e, ia ka denggo encukupi kekurangenndu. Alu bage lanai situalen. Bagi lit tersurat ibas Pustaka Si Badia, kalak s imbue ipepulungna la ia kelebihen, janah kalak si sitik i pepulungna la ia kekurangen”. Si imaksudken Paulus ibas kata enda eme labo guna erbahan sekalak melepasken tanggungjawabna nandangi situasi kegeluhenna, tapi ibas paksa sie memang kin ia lit ibas keadaan susah, emaka ibas paksa kesusahenna e me kita ertanggung jawab alu penggejapen aku kap kam janah kam kap aku. Ibas pengertin si deban sie Paulus pe ningetken maka nampati kalak sideban eme sura – sura ntah perentah si isehken Tuhan (Bd. II Kor 9 : 11 – 13 ; Luk 2 : 37 ; Mat 25 : 44 – 45 ). Bage pe Paulus tole nuriken maka ibas si sampat – sampaten ilakoken min erkiteken kesadaren diri maka ibas paksana banci hal si terjadi terbalik ija sinampati ibas sada paksa banci ka me ia si man sampaten. Dingen engkai maka alu gamblang Paulus ningetken pengajarenna enda nandangi kalak Kristen i Korintus erkiteken memang kin situhuna cara nggeluh si sampat – sampaten enggo menjadi sikap ntah tradisi kegeluhen kalak Yahudi emaka banci jadi kata enda secara khusus pe isehken Paulus man kalak kristen Yahudi i Korintus maka situhuna ibas nampati kalak sideban situhuna labo hal si mberat nandangi kalak Kristen Yahudi sebab sie enggo kin jadi budaya man bana (bd. Ul 24 : 10 – 22 ; Mzm 10 : 2 ; 12 : 5 ; 16 : 6 ; Yes 3 : 14 – 15 ; 10 : 1 – 2 ; 58 : 6 – 7 ; Perb 2 : 42).
Tema PJJ – nta “Rutang Si Megegeh Nampati
Si la Megegeh”. Bagi enggo i singetken idatas tema enda enggo jadi
salah sada “Jargon” si ipake gerejanta ibas nggeluh si sampat – sampaten
emaka guna banci njemba dirinta guna ngelakoken “jargon” nta enda subuk
secara pribadi bagepe ibas kegeluhen gerejanta. Piga – piga hal si
banci isingetken kami eme :
- “Rutang Si Megegeh Nampati Si la Megegeh” menam seri maknana ras pribahasa umum rusur si begi “Berat Sama Di Pikul Ringan Sama Di Junjung” ija ibas pengertinna, pribahasa enda ngajuk kita nggeluh guna saling melengkapi sada ras sidebanna. Ibas pemamahamenna memang harus si sadari labo pagi lit manusia si la ndatken perbeben ntah sada – sada masalah ibas kegeluhenna kerina kita ibas sada paksa pagi pasti ndatken perbeben ntah masalah erkiteken kita tading denga i doni. Erkiteken sie arus si sadari maka la banci sekalak manusia sombong, alu merasa dirina enggo aman ibas posisi kegeluhenna sigenduari sebab kerina sie lenga tentu berubah. Ibas kenyataan sibage rupana maka kerina kita harus sadar diri sebab ibas paksana pagi kita pasti membutuhken pertolongen kalak sideban. Tapi amin bage gia, maka labo sie jadi kebiarenta di kune reh persoalen ntah perbeben snderpa kegeluhenta tek kita maka Tuhan pasti nampati kita sebab ia dem alu keleng ate singasup mulahi kerina kiniseran si reh nderpa kegeluhen anak – anakNa. Alu bage kai dage si penting ? mari sidalanken saja kai si iperentahken Tuhan nggeluh si keleng – keleng, si sampat – sampaten ibas maba baban nggeluh enda janah menyadari memang kin keberadannta i doni enda i rancang Dibata guna saling memperlengkapi sada ras sidebanna bagi si isingetken Paulus ibas II Kor 8 : 7 nina “Kam sampur kap ibas kai pe : ibas kiniteken, ibas ngerana, ibas pemeteh, ibas ketutusen ibas kai – kai pe, bagepe ibas keleng atendu nandangi kami, emaka sampur ka lah min kami bas dahin keleng ate end aka pe”. Janah la lit kebiarenta guna nehken keleng ate nandangi kalak sideban erkiteken kalak si nampati kalak sideban pasti tetap i pasu – pasu Dibata.
- Ibas pengertin temanta “Rutang Si Megegeh Nandangi kalak Si Kurang Megegeh” ibas paksa enda eme ngajuk ras njemba kita gelah menumbuhken sikap kepedulian nandangi kegeluhen kalak sideban. Hal sie me si idah ibas diri Paulus ija ia peduli nandangi kegeluhen kalak Kristen i Yerusalem dingen ibas rasa keleng ate ras kepedulianna, maka Paulus menghimpun dana guna ipake nampati perpulungen kalak kristen Yerusalem si memang tuhu lit ibas kesusahen. Alu bage, jelas man banta Paulus la terjeng ngataken ia peduli tapi sekaligus pe ilakokenna praktek guna nampati kalak si idahna lit ibas kesusahen, ertina Paulus la terjeng ncidahken sikap peduli saja tapi pe berpraktek ibas kepedulianna (bd, Perb 11 : 27 – 29 ; Gal 2 : 10 ; Roma 15 : 25 – 29). Tentu bagi sikap kepedulian Paulus enda me ateta si praktekken ibas kegeluhenta sigenduari la terjeng ngerana, peduli, prihatin, tetapi pe langsung berbuat alu tindaken si nyata janah geraken sie banci silakoken alu terprogram ntah pe secara spontanitas rikutken situasi si lit.
- Sadar ras la sadar, maka seh asa genduari inas kinata kegeluhenta lit denga terjadi “Kesenjangan Sosial” janah banci jafi “Kesenjangen Sosial” banci sangta mencolok. Ibas kinata sibage me situhuna kita arus bertindak dingen gereja pe la banci sinik saja tapi arus ngelakoken tindaken si nyata. Emaka khusus dirinta pribadi lepas pribadi bagepe gerejanta arus memang bertindak ras kreatif guna meningkatken kegeluhen ekonomi kegeluhen kalak si it ibas kesusahen dingen pengajaren ras kritiken si isehken Paulus ibas II Kor 8 enda banci min menjadi factor pendorong man banta guna ngelaksanakenca. Paulus ras kalak Kristen Makedonia njadiken dirina solusi nandangi kegeluhen kalak sideban tentu bage ka me dirinta ras kehadiren gerejanta jadi solusi ibas kehadirenna i tengah – tengah doni enda (bd. Rom 15 : 1).
Mari dage sirealisasiken tema PJJ – nta
sekali enda “Rutang Si Megegeh Nandangi Si Kurang Megegeh” alu kesadaren
penuh, labo erkiteken keterpaksaan ntah pe sebage program kerja saja,
tapi lebih asangken sie si lakoken tema enda erkiteken biakta kin
erkeleng ate sebab biak Kristus lit ibas dirinta.
Kita la berespon erkiteken kalak berespon
nandangi keleng ate, tapi tetap erinisiatif erkiteken sikap
kepedulianta si tinggi ras kepatuhenta nadangi perentah – perentah
Dibata ras Dibata gelah simasu – masu kita guna mendemonstrasiken keleng
ate e.
Simulai mpraktekken tema PJJ – nta
“Rutang Si megegeh Nampati Si Kurang Megegeh” menaken ibas kegeluhen
keluarganta, kade – kadenta, anggota gerejanta seh ku kerina manusia si
membutuhken penampat ibas kita nari sebab keleng ate la kap erbatas.
Selamat nampati ibas keleng ate dingen rutanglah siakap katawari paksa pe nampati kalak si kurang megegeh.
Amin.
Pdt. Israel H Sembiring. Pekanbaru 04 July 2016.
Pdt. Israel H Sembiring. Pekanbaru 04 July 2016.
