“TEOLOGI PERSEMBAHEN PERSEPULUHEN”

(Labo Guna I Perdebatken Tapi Guna Ilakoken)

Ngerana kerna persembahen persepuluhen tetap jadi hal simenarik i cakapken terlebih ibas kegeluhen gerejanta. Sebab lit rusur turah penungkunen kerna persembahen Persepuluhen, umpamana : wajip nge igalari persembahen persepuluhen ras adi wajib apakah harus 1/10 si harus si isehken ku gereja ?. Lit ka pe anggapen persepuluhen e sebage perintah si harus igalari, emaka adi lit kalak si la nggalari persepuluhenna ikataken muat bagin sekerajangen Dibata, payo nge pemahamen si bage rupana ?. Ibas pemahamen sideban, lit anggapen maka adi ibereken pe persepuluhen tapi adi la 1/10 asa penghasilen si idat si  ipersembahken, ikataken kalak sibage nipu ia alu persembahenna ntah la jujur man Dibata, rsd. Pengakap ras Pemahamen sienda me si mekatep ikembangken ras ijadiken alasen guna la nehken persembahen persepuluhen, ntah gia mawen sie pe hanya sebage alasen saja.

Ibas kurangna keseragamen pemahamen kerna persepuluhen, lit ka piga – piga gereja erbahan kebijaken mengganti istilah persepuluhen alu gelar “bagin perpuluhen”, tanpa  isadari maka penggantian ras perubahen gelar e situhuna enggo menggser makna ras pengertin persepuluhen e sendiri. Adi si gar – gari mbue denga banci si idah contoh – contoh kasus kerna pemahamen persembahen persepuluhen si kurang pas ibas praktek ras pelaksananna i gereja. Guna banci lebih jelasna man banta kerna pemahamen “Teologi Persembahen Persepuluhen” terlebih gelah banci simaknai alu payo ibas kegeluhenta selaku kalak si erkiniteken. Piga – piga hal si banci isehken man banta guna banci si pahami kerna “Teologi Persembahen Persepuluhen” eme :

• Dunia kuno iluar agama Jahudi ras naduh ope denga kekristenen enggo memahamai litna persembahen persepuluhen si imengerti sebage sepersepuluh (1/10) ibas kerina hasil si idat sekalak jelma, jabu ntah kelompok. Sepersepuluh e i hitung ibas kerina hasil juma, ternak ntah pe keuntungen dagang. Janah umumna ibas dunia kuno, sepersepuluh arah hasil juma, ternak ntah keuntungen dagang, ipersembahken man pemerintah duniawi sebage “upeti” ras pe si persembahken guna keagamaan dingen ibas pelaksananna sekalak si atena sinehken persepuluhenna (upeti) arus isehkenna alu sikap simehuli ras teratur.

• Ibas kitab PL pelaksanaan kerna persembahen persepuluhen sipemena isingetken ilakoken Abraham eme tupung Abraham naluken Kedorlaomer ibas atena mulahi Lot ibas tabanen kalak Sodom, dingen kenca kemenangenna, Abraham mereken sepersepuluh ibas hasil kemenangen man Melkisedek (Kej 14 : 17 – 24). Bagepe ituriken enggo ilakoken Jakup, eme tupung ia erpadan man Dibata, maka isehkenna me persembahen persepuluhen ibas kerina hasil si enggo ibereken Dibata man bana (Kej 28 : 22).

• Ibas kegeluhen bangsa Israel penetapen persembahen persepuluhen i lakoken menaken ibas zaman Musa (Bil 18 : 24) dingen persembahen e ibereken secara khusus man kaum Lewi si la ndatken bagin taneh ibas taneh perpadanen Dibata, erkiteken kalak Lewi i khususken guna melayani ibas bidang keagamaan (Ibr 9 : 7).

Umumna kalak Israel patuh kel nandangi hukum persepuluhen, bagepe kerna kualitas persembahen si isehken eme arus simehulina. Engkai maka Israel patuh kel ibas nehken persembahen persepuluhen ? piga – piga hal si mendasari kalak e nehken persembahen eme erkiteken :

• Ibas pemahamen spiritual kalak Israel, nehken persembahen persepuluhen eme hal si wajib ilakoken erkiteken man kalak Israel, persembahen e isehken sebage salah bentuk pengataken bujur man Dibata ras sebage kesaksian pribadi nandangi kalak sideban (Im 27 : 30 ; Mal 3 : 10).

• Sebage kalak si ersembah kempak Dibata. Maka adi lit kalak Israel si la nehken persembahen persepuluhen, maka kalak e ianggap sebage kalak si la meteh ngataken bujur kempak Dibata. Ertina secara secara spiritual kalak Israel tuhu enggejapken, adi Dibata enggo mereken pasu – pasuNa, maka sie arus ijawab alu nehken pengataken bujur (Bd. Im. 27 : 30 – 34 ; Ul 8 : 10 – 20 ; Mal 3 : 8 – 10. Am 3 : 8 – 10 ; bd.Mat 23 : 23 ; Rom 4 : 12 ; Ibr 7 : 6 – 10 ; I Kor 9 : 7 – 14 ; I Tim 6 : 17 – 18).

• Lit pe penggunaan persembahen persepuluhen ibas kegeluhen kalak Israel eme i pakeken guna kepentingen : kalak Lewi (Bil 18 : 21 – 24, 26 ; Neh 10 : 37 ; 12 : 44), guna nampati kegeluhen kalak musil, kalak pertandang, janda – janda ras anak yatim bagepe guna pendanaan rumah pertoton (Ul 14 : 21 – 27 ; Mal 3 : 10).

• Persembahen si isehken pe arus memenuhi kwalitas (simehulina) sebab arah kwalitas persembahen e teridah me sikap pusuh si nehken persembahen e. Ertina lit penggejapen ibas kalak Israel Dibata pe memang ngenehen sikap pusuh kalak sinehken persembahenna (Bdk. Persembahen Kain ras habil ; persembahen Kain i tolak Dibata erkiteken sikap pusuhna ibas nehken persembahen e la mehuli tapi persembahen Habil ialkoken Dibata erkiteken sikap pusuhna memang kin tuhu – tuhu mehuli ibas ia nehken persembahenna. Kej 4 : 3 – 10).

• Alu bage maka nehken persembahen persepuluhen merupaken hukum kegeluhen agama kalak Israel si arus ilakoken alu dem kiniteken ras sebage lambang kepatuhen nandangi kerina perentah – perentah Tuhan (bd. Mat 23 : 23, 10 : 10 ; Luk 11 : 42. 16 : 16 ; Mat 5 : 20 ; Luk 18 : 11 – 12).

Gerejanta GBKP ibas Sidang Sinode si pe 33 tgl 10 – 17 April 2005 i Suka Makmur, enggo memutusken persembahen persepuluhen merupaken salah sada kekuaten utama ibas ngelitken sumber dana gerejanta, ertina ; keputusen guna mengembangken persembahen persepuluhen e, labo hanya sekedar gelah erkiteken ikut – ikuten ngidah keberhasilen gereja – gereja sideban, tapi keputusen e ibahan erkiteken gerejanta pe memahami, nehken persembahen persepuluhen merupaken sada bentuk persembahen si sangat Alkitabiah dingen la menyalahi secara teologis, sebab adi si nen pe kubas kontek kegeluhen Yesus, maka Yesus ras ajar – ajarNa pe nggalari persembahen persepuluhenna bagi umumna kalak Jahudi nehken persepuluhenna ku rumah pertoton. Bagepe ibas zaman kekristenen mula – mula, nehken persepuluhen  jadi tradisi ibas kegeluhen kekristenen (I Kor 9 : 7 – 14 ; II Kor 8 : 1 – 15 ; Gal 6 : 6 ; I Tim 5 : 17 – 1 : 8 ; Ibr 7). Memang Yesus pernah mandang kalak Farisi sinehken persembahen persepuluhenna erkiteken tupung e kakak Farisi nehken persembahenna alu kemunafiken, lebih mementingken aturen persembahen persepuluhen tapi mengesampingken kegeluhen ibas ndalanken keadilen ras kebujuren, alu la mpraktekken kegeluhen erkeleng ate (bd. Luk 11 : 24 ; 18 : 12).

Ibas kedewasaan kinitekenta sebage kalak kristen, tentu kita pe enggo memahami, nehken persembahen persepuluhen enggo jadi sada kearusenta man Dibata alu penggejapen Tuhan enggo masu – masu geluhta. Banci jadi memang lit pergumulenta ibas nehken persembahen persepuluhen e, umpamana :  Katawari nge si isehken persembahen perpuluhen e ? arah setiap hasil penghasilenta nge kerina ?, wajibkah sepersepuluh i persembahken, rsd. Situhuna sie kerina lanai jadi penungkunenta erkiteken kedewasaan kinitekenta. Ibas bentuk ras waktu pe lanai perlu si persoalken. Kalak Israel nehken persembahen persepuluhenna secara tahunen, erkiteken kalak Israel memang mayoritas perjuma ras ndatken penghasilenna secara tahunen ras eme maka persembahen e isehken ibas setiap tahun sebage bukti dirina kalak si erkiniteken man Dibata ras nggejapken kai pe si lit erkiteken pasu – pasu Dibata. Persembahen e sifatna sekaligus jadi kesaksin ibas kegeluhen erkiniteken. Ibas praktek kegeluhen gerejanta genduari persembahen persepuluhen e, i sehken alu bulanen erkiteken memang kin hasil pendapatennta lanai sekali setahun ngenca tapi pe enggo sialoken alu bulanen ntah tiap paksa, emaka labo salah adi persembahen persepuluhenta ibas tiap bulanna ntah setiap minggu ras labo situhuna lit salahna adi kin setahun sekali maka sisehken, saja si pentingna ibas sie kerina sehkenlah alu pusuh si dem pengataken bujur man Dibata alu penggejapen Ia kap simada kerina sinasa lit ras simasu – masu kegeluhenta.

Pekanbaru 08 Maret 2016.

“METERUK UKURLAH” Yoh 13 : 1 – 17.

Suplemen PJJ 13 – 19 Maret 2016.

“METERUK  UKURLAH”

Yoh 13 : 1 – 17.

Pokok Pikiran :

• “Meteruk Ukurlah”, secara garis besarna sasaren tema enda ngajak kita kubas sada perubahen diri (Pembaharuan Diri) dingen njadiken sikap Meteruk Ukur e jadi biak kegeluhen si tep – tep wari, janah adi kita ngerana soal perubahen (Pembaharuan diri), tentu sie terkait kubas kininggiten (Keinginan/kemauan) nandangi perubahen e sendiri dingen malemlah ateta sebab ibas persadaan ras Tuhan kerina perubahen si iarapken e banci jadi terlebih ibas penemani Kesah Si Badia.

• Adi lit kalak si meteruk ukurna, maka tentu lit ka pe kalak si meganjang ukur (sombong/angkuh). Umumna kalak simeganjang ukur (sombong/angkuh) eme sekalak si merasa dirina lebih memiliki nilai asangken kalak sideban, umpamana : lebih mejile ntah ganteng, lebih badia ibas kerohanian, lebih bujur, lebih jago, lebih hebat, lebih pande, lebih berjasa, lebih bayak, ras sidebanna. Kiniganjengen ukur jadi ibas sekalak jelma erkiteken melala memang faktor penyebab umpamana : erkiteken kurang ndatken pengertin ras kebijaksanaan ibas pengalamen kegeluhen, terlebih ibas pengajaren ras pengertin kerna kata Dibata. Ibas hal sideban kebehasilen/kebayaken ibas kegeluhen pe banci erbahanca kalak meganjang rukur terlebih adi sekalak erpengakap maka kerina keberhasilen/kinibayaken kegeluhen idatna arah hasil usaha kerja kerasna. Kalak si meganjang ukur pe umumna kurang ngasup ngergai kalak sideban, bagepe tual ibas pengerana dingen banci jadi cakapna saja atena ibegiken. Tapi amin bage gia secara umum kerna kalak si meganjang ukur, kita la banci lang tetap hati – hati gelah ula ka salah menilai, sebab kalak si enggo berhasil, sukses, bayak, lenga tentu kerina megajang ukur, sebab entrem ka kel nge kalak si berhasil, sukses, bayak ibas kegeluhen tuhu – tuhu nggeluh ibas meteruk ukur dingen ibas kebalikenna kalak si laberhasil ibas kegeluhen pe banci nge mengajang ukur (tual).

• Uga kin kalak si meteruk rukur ? “Meteruk ukurl, eme sada sikap kegeluhen si teridah arah prilaku kegeluhen, labo arah belas – belas ntah cakap saja, ertina : meteruk rukur labo model kegeluhen sebab adi ikataken model, banci jadi sekalak jelma, modelna ngenca gendek tapi banci jadi ia sekalak si meganjang rukur (tinggi hati/sombong/angkuh). Meteruk ukur pe labo adat (budaya), sebab banci jadi sekalak si nggeluh ngikuti adat/budaya (norma – norma) si ietepaken hanya ncidahken sikap nggeluh ibas pura – pura (kepalsuan), ertina ciri kegeluhen meteruk ukur labo terjeng ncidahken penampilen etika siteridah alu mata. Umpamana : Bicara lit pe si idah kalak si bertutur sapa alu lemah – lembut, lenga tentu kalak e meteruk – rukur erkiteken kata si lemah sembut pe banci saja hanya pemanis bibir. Perdiatekenlah karyawan – karyawan si lit ibas toko- toko, simenyapa kita alu lemah – lembut, sopan ras santun ibas sada toko ntah ingan – ingan si elit, nina karyawanna biasana menyapa konsumenna ; “Selamat pagi/siang/malam, selamat datang, selamat berbelanja, selamat menikmati, rsd”. Bagepe adi muatta mulih ibas ingan kunjungen e nari biasana nina karyawan e man banta ; “Ada lagi yang bisa dibantu bapak/ibu – terimakasih dan selamat datang kembali”. Perkataan silemah – lembut, sopan – santu e lenga tentu si ngatakenca sekalak si meteruk ukur, erkiteken kai si ibelaskenna e banci jadi la ndarat ibas ibas pusuh nari si dem ke iklasen, janah banci jadi kerina belas – belas e hanya sebage tuntuten kerja si wajibken melasken “selamat datang, selamat pagi / siang / malam – terimakasih selamat datang kembali”. Alu bage banci ka si kataken kalak si status sosialna i teruh pe, la jaminen erbahanca kalak nggeluh meteruk ukur, sebab kai si ilakokenna pe erkiteken keterpaksaan ntah kearusen.

• Alu contoh si isingetken i datas maka sulit nge memang kita menentuken ntah ngataken sekalak e meganjang ukur ntah meteruk ukur adi pengidahta hanya sekilas saja. Tapi banci pe sieteh sekalak megajang ukur ntah meteruk ukur erpalasken prilaku kegeluhenna si tep – tep wari. Guna banci lebih tangkas man banta kerna sikap kegeluhen “Meteruk Ukur” mari, erlajar kita arah sikap kegeluhen si icidahken Yesus arah oraten PJJ-nta sekali enda, Yoh 13 : 1 – 7. Lit pe piga – piga hal si banci isingeteken kami i jenda eme :

1) Ibas Yoh 13 enda ituriken Yesus murihi nahe ajar – ajarna sebage sada perbahanen si mpeteruk baNa dingen perbahanen Yesus tentu erbahanca kerina  ajar – ajarNa sengget erkiteken la iakapna mungkin Yesus guruna e murihi kerina nahe aja r – ajar. Yesus tuhu ncidahken sikap kegeluhen kalak si meteruk ukur alu murihi nahe ajar – ajarNa, la ipersoalken Yesus erga diriNa sebage guru ntah tuan si arus i layani, tapi tuhu mpetruk baNa bagi sekalak juak – juak. Sada hal si penting kel si eteh ibas Yesus murihi nahe ajar – ajarNa e ilakokenNa labo erkiteken/sekedar “iseng” saja bagi kalak si pesuang – suangken (njula), tapi tuhu memang ilakoken Yesus erkiteken kiniteruken ukur si lit ibas diriNa.

2) Hal menarik sideban si banci si idah ibas peritiwa Yesus murihi nahe ajar – ajarNa e eme, peristiwa e jadi tupung paksa Yesus pulung ibas sada rumah ras ajar – ajarna guna ngerayaken peringeten Paskah kalak Yahudi. Ibas ajar – ajar la ngangkai maka Yesus nandangi i salipken, ajar – ajar tetap rukur guna ndatken “posisi” si terbaik sapih – sapih ia eme alu ngergaken diri sapih – sapih ia seh maka murihi nahe Yesus sebage tuan sada pe la ilakoken ajar –ajar, lit gengsi sapih – sapih ajar – ajar Yesus (ibas tradsis kalak Yahudi umumna sekalak tuan rumah, adi rumahna itandangi sekalak tamu/kalak si mehaga (guru), maka tuan rumah biasana enggo nikapken lau i lebe pintu rumahna si ipake guna murihi nahe tamu, si murihi nahe banci ilakoken simada jabu ntah alu nuruh juak – juakna). Ibas Yesus ngidah ajar – ajarNa e tetap lebih ngergaken dirina/ndarami pengakuan/sapih – sapih ia ajar – ajar me maka dungna Yesus muat lau jenari murihi nahe ajar – ajarNa, sebage bukti kiniterukuen ukur, ncidahken teladan ras bukti kai si pernah ikatakenNa man ajar – ajarNa “ … ise atendu jadi si mbelinna, ia arus ngelai nandangi kam kerina ; janah is atendu jadi pemimpin, ia arus jadi suruh – suruhendu kerina, bagi Anak Manusia si isuruh Dibata, reh labo guna ielai tapi guna ngelai, janah iendeskenNa kesahNa guna nebusi nterem jelma” (Mat 20 : 26 – 28). Alu bage, hal si penting si deban si banci si idah ibas Yesus murihi nahe ajar – ajarNa e, Yesus memutarbalikken konsep si lit ibas diri ajar – ajarNa kerna harga diri/jabaten/kekuasaan/kehormaten si idarami ras si ipersoalken ajar – ajar guna i raihna ibas persadanna ras Yesus. Tetapi ibas Yesus murihi nahe ajar – ajarNa e maka icidahken Yesus me maka diriNa la ndarami ntah mementingken jabaten/gelar/penghargaan ntah pengakuan kerna diriNa tapi lebih ertedeh ate ncidahken perbahanen si mulia ibas kegeluhen.

3) Kenca Yesus murini nahe ajar – ajarNa, ibas ayat 13 – 15 nina Yesus man ajar – ajarna “Ikatakendu Aku Guru bagep Tuhan, payo kap si ikatakenndu en ; sebab tuhu me Aku guru dingen Tuhan. Dage adi Aku Guru dingen Tuhanndu, enggo murihi nahendu, patut pe maka kam siburih – burihen nahe. Enggo kubahan si man usihenndu, gelah banci ibahanndu bagi si nggo kubahan man banndu”. Ibas kai si ikataken Yesus nandangi ajar – ajarNa e, Yesus la terjeng ngerana saja tapi pe ncidahken kai si man bahanen ajar – ajarNa, eme alu ncidahkenkenca ibas praktek si nyata. La terjeng cakap tapi berbuat ibas praktek kerna kai si ibelaskenNa. Alu bage maka bagi si enggo isingetken pemena idatas, Meteruk Rukur” memang labo hanya terjeng ngerana alu sopan – santun, lemah – lemah lembut, tapi lebih kubas praktek ibas perbahanen.

• Tema sekali enda PJJ-nta “Meteruk Rukurlah”. Bagi enggo isingetken kami idatas, sue ras sasaren tema enda kita iajuk kubas sada perubahen ibas pembaharuan diri, alu ncidahken sikap ras prilaku kegeluhen si mehuli eme alu nggeluh “Meteruk Rukur”. Maka mari dage si aplikasiken tema enda ibas kerina kegeluhenta khususna kita selaku warga gereja GBKP. Yesus enggo ncidahken keteladanen kerna sikap ras prilaku kalak si nggeluh meteruk rukur, alu nggit murihi nahe ajar – ajarNa, alu la ngenehen ia sekalak si arusna i hagaken ntah i perlakuken secara terhormat, aminna gia Ia patut ndatken kehagan e, tapi Yesus memilih nggeluh mpeteruk baNa bali ras sekalak juak – juak, erkiteken ietehna maka cara kegeluhen si bage erbahanca malem ate.

• Nggeluhlah dage ibas sikap ras erprilaku alu “Meteruk Ukur” ras si jadiken sikap e jadi biak (life style) ibas kerina kegeluhenta, janah yakinlah maka  kalak si nggeluh alu “Meteruk Rukur” uga pe malem atena erkiteken ertambah – tambah me kebijaksananna ibas ndalani kegeluhen dingen lebih asa sie Tuhan pe erbahanca kalak si “Meteruk Rukur”  ndatken kemalemen ate si tuhu – tuhu, sebab ibas paksana pagi peganjangken Dibata me ia ibas kerina kemulian Dibata (Bd. I Ptr 5 : 6).

Pekanbaru 14 Maret 2016. Pdt. Israel HS Milala.