Suplemen PJJ 20 – 26 Maret 2016.
“Kiniseran, Kematen Ras Kekeken Jesus Palas Kiniteken Ras Pengarapenta”
Lukas 9 : 22
Lukas 9 : 22
Pokok Pikiren :
• Fakta sejarah ngatakenca, Yesus
pernah hadir i tengah – tengah kegeluhen doni enda, jadi seri bali ras manusia
(hidup di dalam daging/firman yang menjadi daging (bd. Yoh 1 : 1 ; Heb 2 : 14).
Rumusen gereja kerna Yesus si menjelma jadi manusia e irumusken alu pergumulen
si ndekah dingen ndatken rumusenna kenca gereja piga – piga kali ngelakoken
persidangenna, lit pe rumusen kerna hakekat Yesus si menjelma jadi manusia e
irumusken ibas persidangen Nicea (325) ras persidangen Konstatinopel (381) eme
; “Allah dari Allah … Allah sejati dari Allah yang sejati … sehakekat dengan
sang bapa … yang telah turun dari sorga untuk kita manusia … dan menjadi daging
… dan menjadi manusia”. Engkai maka isingetken rumusen e erkiteken rumusen enda
sada hal si penting si perlu sieteh ras sebage penjelasen guna ngantusi tema
ras oraten PJJ-nta sekali enda.
• Fakta si la pe banci i
pungkiri manusia ija Dibata memang pernah tuhu – tuhu nggeluh bagi sekalak
manusia ibas diri Yesus Kristus. Tentu lit penungkunenta ibas Jesus nggit jadi
manusia e ? apakah Yesus meteh maka pepagi Ia ngenanami kiniseran ibas
kegeluhenNa doni ? tentu saja, ibas kesaksin Pustaka Si Badia ituriken, Yesus
meteh, maka ia pagi ngenanami kiniseran ras arus pagi ngenanami kematen guna
nebusi manusia si ikelengiNa (Bd. Flp 2 : 1 - 11). Dingen banci pe ikataken
maka, kiniseraan si inanami Yesus e eme kiniseran si ngelebihi kerina kiniseran
si pernah inanami manusia. Piga – piga hal si banci isingetken kami kerna
kiniseran Yesus antara kegeluhen ras kematenNa e me :
Tubuh ikarang asuh – asuhen,
mate jenari ikuburken alu minjam kuburen keluarga Yusuf Arimatea. Pernah melihe
ras muas tuhu – tuhu tupung Ia i cubai Iblis i padang gurun paksa la man dingen
la minem kidekah 40 wari 40 berngi. Yesus ndatken penolaken ntah
terdiskriminasi ibas kutaNa. Yesus la menikmati tading bas sada rumah alu
sikap, seh maka nina Yesus, adi perik – perik lit asarna tapi Anak manusia si
isuruh Dibata ingan ngamparken takalNa pe lalit inganna. Yesus pe labo kalak si
erduit si memiliki tabungen deposito si mbue, sie teridah maka Ia ras ajar –
ajarNa terlambat nggalari perpuluhenNa ku rumah pertoton (ibas kemiskinen Yesus
sekalak ahli pernah ngataken maka Yesus adalah orang yang tanpa koper sebagai
perkata Yesus memang kalak musil).
Yesus pernah ndatken percobaan
pembuhuhen ibas kalak sienterem ersura – sura ngajemken Ia ku embang kenca Ia
dung ngajar i rumah pertoton. Yesus i tangkap aminna la ersalah, iadili tanpa
pengacara, ndatken kekerasen fhisik, i vonis tanpa pernah banci membela diri,
la banci naik banding ku mahkamah agung, keputusen pengadilen Pilatus ras
Herodes tuhu – tuhu la mperdiateken azas praduga tak bersalah nandangi Yesus.
Man baNa i pakeken mahkota duri dingen ndatken hukumen si labo erkiteken lit
kesalahenNa tapi erkiteken cian ate imam – imam Jahudi. Yesus i vonis ersalah
ibas waktu si singkat dingen ndatken hukumen si paling kejam ibas paksa sie eme
alu isalipken i kayu persilang.
Ibas kiniseranNa Yesus erdalan
ku Golgota alu mersan kayu persilang si seh kel beratna, Ia isalipken bali ras
sekalak penjahat, ngamburken dareh, ibereken nginem cuka, i tebak alu lembing
si entelap guna memastiken kematenNa. Tuhu sada kiniseran si seh kel belinna,
janah kerina sie inanami Yesus erkiteken keleng ateNa ras guna nebusi dosa –
dosa manusia gelah kerina manusia si ikelengiNa ndatken keselamaten ibas Dibata
nari. Tuhu mbelin kel pengorbanen si isehken Yesus guna keselamaten manusia
(Bd. Luk 22).
• Fakta ibas sejarah pe tole
ngatakenca, kenca kematenNa, Yesus keke ibas simate nari naluken kuasa kematen
dingen kekekenNa e jadi kesaksian nandangi agama – agama sideban maka Yesus
ngenca keke ibas simate nari. Janah kerina si jadi e sue ras kerna kai si enggo
ikatakan Yesus kerna kematen ras kekekenNa (Bd. Yoh 14 : 1 – 31). Dingen
kekekenNa ibas si mate nari memang tuhu jadi palas kerina kiniteken kerna
kegeluhen si rasa lalap bagi si ikataken Paulus alu ngataken “adi Kristus la i
pekeke ibas si mate nari maka sia – sia me kerina kiniteken si lit man baNa”
(Bd. I Kor 16 : 1 – 58).
• Dage arah kerehen Jesus ku
doni, ngenanami kiniseran, mate i kayu persilang dingen keke ibas simate nari,
erbahanca pe kalak si tek man baNa ndatken kegeluhen si rasa lalap, ertina
kematen ras kekeken Yesus e me jadi jaminen pengarapen kakak si tek ras
sekaligus jadi fakta sinetapken ukur kalak si tek kerna perpadanen si enggo
isehkenYesus kempak manusia, sebab Yesus kin ngenca Tuhan si nggeluh dingen
jadi ulu kerina keselamaten manusia (Bd. Heb 5 : 9).
• Tema PJJ-nta “Kiniseran,
Kematen Ras Kekeken Jesus Palas Kiniteken Ras Pengarapenta”, sada tema sicukup
penting ras arus alu mbages simaknai ibas kegeluhen kinitekenta, erkiteken
kematen ras kekeken Yesus kin ngenca sierbahanca manusia banci ndatken
pengalemi dosa ras keterkelinen. Dage kai si enggo ilakoken Yesus e me jadi
palas kerina kinitekenta, engkai ? erkiteken manusia arus kin i tebus ibas dosa
si enggo ilakonenna kempak Dibata (Bd. Kej 3 : 1 – 22), ras erkiteken dosa e
manusia kebenen kemulian Dibata si lit ibas ia (Bd. Roma 3 : 10 – 23) dingen si
perehken hukumen ibas Dibata nari (Rom 1 : 32 ; 5 : 16 ; 6 : 23 ; Gal 3 : 13 ;
Ef 2 : 1 – 21 ; Kol 2 : 13 ; Ket 2 : 11, 14 ; 21 : 8), tapi erkiteken keleng
ate Dibata, manusia ndatken pengalemi dosa, alu kematen ras kekeken Jesus (Luk
9 : 22 ; Bb. Luk 16 : 27 – 28 ; Mat 25 : 30).
• Ibas keberdosaan manusia,
manusia la ngasup guna nelamatken dirina, arus lit singgancihken manusia ibas
kerina dosa si enggo ilakokena. Bagepe kerina kiniulin si ilakoken manusia,
persembahen si isehkenna pe la banci jadi gancih guna nasapken dosa ras
erkiteken sie me maka Jesus jadi korban pendamaian nandangi manusia (Luk 2 : 22
Bd. Ibr 10 : 1 – 5). Ibas perbahanen keleng ate Dibata e me manusia arus
ngataken bujur kempak Dibata, erkiteken Dibata alu inisiatifNa reh guna jadi
manusia guna mersan kerina dosa manusia gelah manusia e banci ndatken
keterkelinen (Bd. Yoh 3 : 16), Kristus jadi korban pendamaian alu kematenNa i
kayu persilang (Bd. Roma 3 : 25 ; Kol 2 : 14 – 15 ; Heb 10 : 7 ; Mat 20 : 28 ;
II Kor 5 : 21 ; Rom 8 : 36 – 39).
• Bageme rikutken tema PJJ-nta
“Kiniseran, Kematen Ras Kekeken Jesus Palas Kiniteken Ras Pengarapenta”
ningetken mulihi man banta kerna keleng ate Dibata kempak manusia si perdosa.
Janah payo tuhu, erkiteken kematen ras kekeken Jesus, maka kita ndatken
keterkelinen. Dage ibas persinget ras pengajuk e mari dage si ergakenlah
kinitekenta e ibas kerina kegeluhenta, ngikutken kerina perentah – perentahNa,
tetap setia seh pagi paksana kita ngadap kempak Dibata. Dage sekali nari
isingetken me man banta “Kiniseran, Kematen Ras Kekeken Jesus Palas Kiniteken
ras Pengarapenta” janah erkiteken sie dage “Jagailah dage kinitekenta, tetap
setia man baNa sebab memang la lit Dibata si bali ras Ia”.
Pdt. Israel HS Milala. Pekan
baru 20 Maret 2016.
