Suplemen PJJ Tgl 24 – 30 Juli 2016.
“I PERDAMEKEN RAS KRISTUS”
Kolose 1 : 15 – 23.
Ngerana kerna tema PJJ-nta sekali, tentu
la banci kita mekarus guna ncakapkenca sebab tema PJJ-nta sekali enda
sada tema sicukup penting man banta, guna banci lebih simaknai tema
PJJ-nta sekali enda, icubaken kami nuliskenca ibas kesempaten enda asa
kengasupen kami menjelesakenca dingen mbera banci jadi refrensinta guna
si siehken i tengah – tengah perpulungenta.
Ngerana kerna tema PJJ-nta “I Perdameken
ras Kristus” banci jadi tema e peturahken penungkunen man banta : engkai
maka kita arus i perdameken ras Kristus, lit kin kesalahenta maka kita
arus i perdameken ras Kristus ? ise kin Kristus maka kita arus i
perdameken ras Ia ? banci kin kita mperdameken dirinta ras Kristus ? ise
si berinisiatitif ibas perdamen e kita ntah Kristus ? dingen enggo kin
kita i perdameken ras kristus, adi enggo i perdameken ras kristus uga
dage kita ngergaken perdamen si enggo isehken Kristus e ? banci jadi
enda me si jadi penungkunenta.
Piga – piga hal si banci ituriken kami ibas paksa enda rikutken tema PJJ-nta sekali enda erpalasken Kolese 1 : 15 – 23 eme :
- Pustaka Si Badia nuriken maka manusia enggo erdosa erkiteken kinilapatuhenna nandangi perentah si isehken Dibata kempaksa erkiteken sie manusia sirang ras Dibata dingen erbahanca manusia erngena ate nandangi dosa (Kej 3 : 15). Ibas pemahamen si isehken Paulus akibat dosa manusia manusia dungna jadi musuh Dibata (Kol 1 : 21 bd, Rom 5 : 10), dingen erkiteken dosa e manusia kebenen statusna sebage gambar Dibata, kebenen hakna sebage anak dingen kebenen kemulian Dibata ibas dirina (Bd. Kej 1 : 16 ; Roma 3: 10 ; Roma 5 : 1,6).
- Manusia (Adam ras Hawa) si ndabuh kubas dosa, meteh dirina enggo enggo erdosa, ersura – sura nutupi dosa si enggo ibahanna alu menutupi ketelanjangenna tapi usaha si ibahan manusia e la banci nutupi kesalahenna, ertina tupung Adam ras Hawa muat bulung – bulung guna nutupi dirina la ndungi persoalen dosa si enggo ilakokenna, seh maka Dibata sendiri si turun tangan alu nggantiken bulung – bulung sinutupi kula manusia e alu kulit binatang. Alu gambaren si enda jelas man banta manusia lanai banci ndungi kesalahen si enggo ibahanna alu usahana sendiri (Ke 3 : 7 – 21).
- Ibas sejarah kegeluhen manusia, Dibata tetap berkarya arah kegeluhen bangsa Israel (Kesusuren Abraham), Dibata nehken Hukum Taurat arah Musa gelah alu bage manusia meteh kai si isuraken Dibata arah kegeluhen manusia. Tapi kedungenna Taurat pe i salah mengerti imam – imam kalak Jahudi sebage dalan guna ndatken keselamaten padahal taurat hanya erfungsi sebage perentah guna ncidahken kepatuhen manusia nandangi Dibata ras guna ncidahken kerna gambaren kerna dosa si la banci ilakoken kalak si ersembah kempak Dibata (bd. Roma 2 : 17 – 24 ; Galatia 3 : 11).
- Ibas pemahamen umum mekatep pe terjadi salah pengertin, ija kiniteken ianggap sebage dalan guna ndatken keselamaten. Kiniteken manusia ianggap sebage penyebab guna ndatken keselamaten. Pengertin si enda pe tentu harus silurusken ertina labo erkiteken litna kinitekenta maka kita ndatken keterkelinen, sebab adi ikataken erkiteken kiniteken maka tentu e kiniteken e me si ianggap penyebab manusia ndatken keselamaten. Kiniteken tetap hanya sebage sarana, saluran ntah respon si lit ibas manusia nandangi pengorbanen si enggo ilakoken Kristus ras eme si imaksudken martin Luther alu ngataken “Hanya oleh iman”. Alu bage jelas maka keselamaten labo erkiteken usaha si ilakoken manusia (teologia amal, Puasa, ritual – ritual, bagi si lit ibas pemahamen katolik ras Islam) tetapi keselamaten e tetap murni erkiteken perkuah ate (anugrah) Dibata arah perdamen si isehkenNa ibas pengorbanen Kristus i kayu persilang (Bd. Rom 1 : 16 – 17 ; 5 : 2 – 11 ; I Kor 15 : 12 – 20 ; II Kor 5 : 14, 19 – 21 ; Gal 2 : 21).
Guna banci lebih lebih jelasna kerna
oraten PJJ-nta ras tema PJJ-bta sekali enda “I Perdameken Ibas Kristus”
ras sue kerna pemahamen kinitekenta, maka tema ras oraten PJJ-nta sekali
enda cukup penting guna sigar – gari alu mehuli. Maka mari sigar – gari
kerna oraten PJJ-nta sekali Kol 1 : 15 – 23 enda ras piga – piga hal si
banci isingetken kami ijenda :
- Ogen PJJ-nta ningetken man banta kerna kalak Kristen Kolose ibas paksa sie mulai terpengaruh kerna pengajaren Yudaisme ras Gnostisisme. Erkiteken litna pengajaren palsu enda me Paulus nulisken suratna man kalak Kristen Kolose, gelah perpulungen tetap nggeluh ibas persadaan ras Kristus Yesus. Engkai maka Paulus ningetken kerna sie nandangi kalak Kristen Kolose ? erkiteken ibas paksa sie kalak Kristen Kolose memang enggo i pengaruhi pengajaren Yudaisme ras Gnostisme sierbahanca kalak Kristen Kolose mengalami kebimbangngen ras keraguan nandangi pemahamen keselamaten si lit ibas Kristus, seh maka kebimbangen ras keraguan e erbahanca kegeluhen kalak Kristen Kolose ngulihi nggeluh bagi kalak sila nandai Dibata (Kol 2 : 6 – 8, 16 – 23). Baca tentang Yudaisme ibas http://id.wikipedia.org/wiki/Etika_Yudaisme ras Gnostisisme ibas Gnostisismehttp://peterbudi.blogspot.co.id/2013/10/gnostisisme.html.
- Kol 1 : 15 – 23 si jadi bahan oraten PJJ-nta sekali enda sekaligus ncidahken perlawanen Paulus nandangi guru – guru palsu dingen menjelasken kerna keselamaten manusia erkiteken perdamen si isehken Dibata. Ibas paksa Paulus nulisken suratna man kalak Kolose enda maka ibas paksa sie enggo berkembang pengajaren Yudaisme ras Gnostisisme si sangat mempengaruhi kegeluhen perpulungen kalak Kristen ibas paksa sie. Emaka guna menentang pengajaren palsu e, Paulus ngulihi menjelasken alu rinci kerna ise kin Yesus Kristus. Lit pe penjelasen si isehken Paulus eme : alu jelas Paulus menentang kerna pemahamen Yudaisme ras Gnostisisme si menganggap Yesus sebage ciptaan (materi), emaka ibas sie nina Paulus “Dibata la teridah, Kristus nge rupa Dibata si teridah Ia lit ope denga ijadiken kerina sinasa lit”. Alu perkataan enda Palus sekaligus encidahken identitas Yesus identitas Yesus maka Yesus e sendiri kap Dibata si teridah ibas manusia (ay. 15). Penjelasen kerna keilahian Yesus tentu saaj labo terterima kalak si enggo ipengaruhi paham Yudaisme ras Gnostisisme emaka ibas penjelesaen seterusna Paulus nuriken “Sebab arah Ia, Dibata njadiken kerina sinasa lit subuk I surge bagepe i doni, barang si teridah bagepe barang si la teridah ikut pe kerina kesah sierkuasa ras merentah, kerina sinasa lit ijadiken Dibata arah kristus ras guna kristus. Leben nge Kristus lit asangken kerinana, janah ibas persadaan ras Ia, kerina sinsa lit e ndatken inganna si payo” (ay. 16 – 17). Penjelasen Paulus ibas ay. 16 – 17 jelas kel ngataken kerna ise kin Kristus, ija penjelasen menegasken maka Kristus labo ciptaan tapi menjelasken maka Ia me Tuhan sinjadiken kerina sinsa lit (Bd. Yoh 1 : 3).
- Paham Yudaisme ras Gnostisisme ibas konsep si seri kerna keselamaten memahami maka keselamaten banci idat arah usaha manusia. Pemahamen sie jelas kel ilawan Paulus alu ngataken “Ia me takal kulana, eme kepala gereja. Ia me ulu kegeluhen kulaNa. Ia me si tang – tangna ipekeke Dibata ibas simate nari gelah Ia ngenca banci ngaloken ingan simehergana ibas kai pe. Arah peraten Dibata ibas diri anakNa ringan alu serta si lit ibas diri Dibata. Arah Ia me pe itetapken Dibata ndameken kerina sinasa lit ras diriNa. Dibata mereken perdamen arah kematen anakNa I kayu persilang, gelah kerina sinsa lit, subuk i doni bagepe i surga mulihken man baNa” (ay. 18 – 20). Perkataan Paulus enda cukup penting si pahami maka Paulus menjelasken la lit keselamaten adi la kin arah Yesus Kristus ngenca. Alu bage maka jelas penjelasen Paulus ibas ayat enda Paulus menentang kerna paham keselamaten universalisme ija paham e ngataken maka kerina pagi kalak si idoni enda ndatken keselamaten (bd. Yoh 14 : 16). Pengajaren Paulus arah ayat 18 – 20 enda jelas ngataken maka la lit keselamaten adi la kin arah Yesus Kristus, emaka salah kel adi lit genduari berkembang pengajaren maka ibas setiap agama pe lit keselamaten . Ibas konteks sienda si pahamilah maka labo lit keselamaten ibas agama si deban kecuali agama e mengakui Yesus sebage juru selamat, sebab Yesus memang ngenca si ngasup erbahan perdamen ras si mendameken manusia ras Dibata eme alu kematen Kristus i kayu persilang. Uga dage pagi kalak si la ngakuken Yesus Tuhan ? Paulus pe menjelasken kerina pagi kalak si la ngakuken Yesus jadi Tuhanna la ndatken keselamaten (II Tes 1 : 3 – 12).
- Pembuktian keleng ate Dibata man manusia dingen manusia enggo i perdameken Dibata ras diriNa, icidahken Paulus ibas penjelasenna alu ngataken “ibas sada paksa nai, sirang kam ras Dibata, kam jadi imbangna erkiteken perbahanen ras perukurenndu si jahat. Tapi erkiteken kematen kula anakNa, iperdameken Dibata kam ras anakna, gelah kam badia, bersih dingen la erpandangen iadep – adepenNa” (ay. 21 – 23). Ibas penjelasen enda jelas kel Paulus ngataken maka Dibata nge si erinisiatif guna erbahan perdamen man manusia arah kematen Kristus i kayu persilang.
- Dingen kenca Paulus nuriken pengertin kerna keselamaten si enggo isehken Kristus i kayu persilang. Paulus ningeti kalak Kristen Kolose gelah tetap paguh ibas kinitekenna dingen lanai min i jolah – joleken pengajaren kai pe, alu ngataken “Erkiteken sie patut kam tetap patuh ibas pals si nteguh, janah ola pulahi pengarapen si enggo idatndu asum tang – tangna nai ibegindu Berita Si Meriah ibas Dibata nari e. Sebab Berita Si Meriah ibas Dibata nari enggo mbar ku belang – belang doni enda. E me sababna maka aku Paulus enggo jadi sekalak si erdahin” (ay. 22 – 23).
Ibas kerina penjelasen si isehken Paulus
enda, tentu pe mereken pemahamen man banta, maka kita ngidah kerna
kegeluhen masa lalunta sebage manusia perdosa, tapi amin bage gia maka
kit ape enggo ndatken keselamaten arah perdamen si isehken Dibata
erkiteken kematen Kristus I kayu persilang. Dingen erkiteken sie maka
patut kel situhuna kita ngataken bujur kempak Dibata erkiteken kita pe
enggo ndatken mulihi kemulianta selaku anak Dibata (Bd. Ef 2 : 16 ; Rom
5 : 10 ; II Kor 5 : 18 – 20).
Uga dage ninta ibas paksa si genduari
kenca kita nggejapken dirinta enggo iperdameken Dibata ras diriNa ?
tentu kita ngataken bujur kepak Dibatanta ibas kerina penebusen si enggo
ilakokenNa kempak dirinta arah Yesus Kristus, tetaplah nggeluh ibas
kiniteken si paguh man baNa saja, la erdua ukur dingen la terpengaruh
pengajaren – pengajaren si erbahanca kita papak. Jenari tentu pe ulih
perdamen e si cidahken ibas caranta nggeluh si tep – tep wari alu mehuli
eme alu nadingken kerina perbahanen – perbahanen si mabai kita ndabuh
kubas dosa.
Ibas aplikasi kegeluhenta si tep – tep
wari, kita enggo iperdameken Dibata ras diriNa, alu la naktaki dosa –
dosa si enggo sibahan, janah Dibata me si erdahin (erinisiatif) guna
erbahan perdamen e alu mereken diriNa ibas Yesus Kritus jadi tebusen.
Tentu sikap sibage me siarap Dibata lit ibas dirinnta. Kita ngasup
erbahan perdamen, erinisitaif erbahan perdamen, nggit erkorban guna
terjadina perdamen i tengah – tengah kegeluhenta bagi nina Kristus ibas
Mat 5 : 9 nina “Ketuahen kalak si erbahan perdamen ; sebab iakui Dibata
me ia anakNa”. Arah kata Yesus enda perlu si inget maka kalak si la maba
perdamen i tengah – tengah kegeluhenna maka situhuna i ape la ndateken
perdamen ibas Dibata nari. Labo mesera guna erdame ras temanta manusia,
umpamana : bicara lit salahta ntah salah temanta man banta, ertotolah
bagi siajarken Yesus man banta alu memaknai pertoton Tuhan alu tuhu –
tuhu, tupung kita melasken ‘O Bapa kami sini surga, ibas sie gejapkelnah
kita memang tuhu anak Dibata … tupung sibelasken alemi min salah kami
bagi nialemi kami salah kalak kempak kami, maka ingetlah Dibata enggo
ngalemi kerina kesalahenta aminna gia kesalahen e la patut ialemi, tapi
erkiteken keleng ateNa kesalahen e la i perhitung Dibata. Tentu bage ka
me kita memaknai kesalahenta ntah kesalahen temanta, gelah alu bage
perdamen, nggeluh erdame ras dame banci sicidahken ibas kegeluhenta si
tep – tep wari.
Dage mari si ergai perdamen si enggo
isehken Dibata kempak dirinta, lanai nggeluh ibas dosa, pemuliaken
Dibata arah kerina dampar kegeluhenta, janah jadilah si maba dame kubas
tengah – tengah kegeluhen i doni enda sebab kita enggo I perdameken ras
Kristus.
Amin.
Pdt. Israel HS Milala. PKU 26 Juli 2016.
