PJJ GBKP. “I Pasu – Pasu Guna Jadi Pasu – Pasu” II Raja – raja 4 : 8 – 17

Suplemen PJJ Pekanbaru Tgl 12 – 18 Okt 2014

Ogen : II Raja – raja 4 : 8 – 17
Tema : “I Pasu – Pasu Guna Jadi Pasu – Pasu”

Syalom.
Pokok Pikiren :

• Diberu si tading i Sunem enda labo ikataken ise gelarna saja rusur igelari alu “Perempuan Sunem” keturunen suku Ishakar, sekalak si i hormati masyarakat si enterem ija ituriken diberu enda ras perbulangenna sekalak kalak bayak dingen ndatken kerina kebayakenna arah kerja kerasna alu ndahiken dahin si mehuli, erkiteken daerah Sunem e sendiri merupaken daerah si mehumur. Alu bage banci sikataken maka kerina kebayaken si idatna labo erkiteken warisen ntah pe alu cara sila jujur janah tuhu ia i hamati jelma si enterem pe erkiteken kerina kebayakenna i pakena guna nampati jelma si enterem (Kej 49 : 14 – 15, Jos 19 : 17 – 23).
• “Perempuan Sunem” enda pe ituriken sekalak diberu si tuhu – tuhu enghamati perbulangenna selaku kepala rumah tangga, ija ibas sie teridah ibas ia la nggit muat keputusen si sada – sisada, ertina kai pe si atena si ilakokenna tetap i arihkenna ras perbulangenna gia sekali perbulangenna e enggo metua (II Raja – raja 4 : 9, 22).
• Ia tuhu – tuhu enghamati Dibata, sie teridah arah ia enghamati Elisa sebage nabi Tuhan sibadia dingen e iakukenna ras perbulangenna. Kehamatenna e teridah arah ia nikapken kerina pangan man Elisa di kune Elisa reh ku kutana janah la tanggung – tanggung maka ia pe nikapken ingan ibas rumahna alu erbahan ingan tading si khusus man Elisa (II Raja – raja 4 : 9 – 10).
• Ibas kerina perbahanenna simehuli, maka Dibata ersemulih man bana ija Dibata mereken keleng ateNa man bana, ibas ia lenga natang tuah ibas sie me Dibata mereken tole pasu – pasu man bana alu mereken sada anak dilaki sada pasu – pasu situhu – tuhu meherga kel ibas jabu (II Raja – raja 4 : 18. Bdk, Sara si ipasu – pasu Tuhan ibas, Kej 25 : 1 – 2).
• Elisa ibas oratenta enda eme sekalak nabi Tuhan bekas ajar – ajar Elia. Ia jadi nabi kenca Elia iangkat ku surga janah ibas kidekah ia jadi nabi erkiteken kepatuhenna man Tuhan, maka melala pe mujizat si ilakokenna ibas pemasu – masun Tuhan (bdk. II Raja – raja 4 : 1 – 7).

Point Aplikasi :

• Secara teologis arus si akuken maka Dibata me sebage sumber, pemilik ras pemberi pasu – pasu man banta ras kerina pasu – pasu e isehken Dibata man banta erkiteken Dibata enggo erpadan maka Ia tetap engkelengi manusia (kalak si tek). Ibas pemahamen si enda maka kita sebage penerima pasu – pasu pe la hanya banci terjeng “Penikmat Berkat” tapi uga ka kita banci jadi pasu – pasu man kalak sideban (Bd. Kej 12 : 1, 22 : 18. Luk 12 : 13 – 21, Perb 5 : 1 – 11) ertina tupung Dibata mereken pasu – pasuNa man banta maka Dibata pe menuntut dirita jadi pasu – pasu man kalak sideban.
• Kerina kita tentu erpengarapen nandangi pasu – pasu Tuhan seh man banta ras mungkin kalak sila wars ngenca la erpengarapen nandangi pasu – pasu Tuhan. Tapi si ingetlah maka kalak si enggo i pasu – pasu pe ndatken “Perintah” guna jadi pasu – pasu man kalak sideban janah sekaligus jadi nafas kegeluhennta man banta min selaku pengikut Kristus janah reh ulina adi la terjeng ngenca tupung kita ndatken pasu – pasu saja maka kita jadi pasu – pasu man kalak sideban tapi ibas masa sulit pe kita tetap ka jadi pasu – pasu man kalak sideban, bdk, tupung sekalak diberu – balu – balu mere man nabi Elia (I Raja – raja 17 : 8 – 24).
• Diberu Sunem e makeken kerina kebayekenna guna hal simehuli janah erkiteken kiniulinna e maka ia pe i pasu – pasu Tuhan ka alu mereken anak dilaki kubas jabuna (II Raja – raja 4 : 17, bd, Mat 10 ; 41). Ibas si enda penting ka si perdiateken maka Dibata sendiri si berinisiatif ibas mereken pasu – pasuNa (II Raja – raja 5 : 11- 13).
• Diberu Sunem e pe memiliki hubungen si mehuli ras Elisa, ertina ia tuhu – tuhu enghamati sekalak serayan Tuhan. Janah ibas ia enghamatisa e maka ia sendiri erinisiatif nikapken kai si perlu man nabi Elisa. Tentu hal sienda pe jadi pelajaren penting man banta uga kita pe banci min berinisiatif guna banci mereken simehuli man temanta simembutuhken penampatta ibas erti kata la pedah si timai temanta erkata tapi enggo si lakoken leben (beluh erpengagak).
• Tema PJJ-nta sendah “I Pasu – Pasu Guna Jadi Pasu – Pasu” tema enda eme bentuk “Perintah” emaka tentu la banci lang si ueken me “Perintah” e ras mari si lakoken e ibas setiap tingkaten kegeluhenta gelah alu malem ate Dibata man banta kerina.
• Adi lit sekalak si hanya ngukurken bana situhuna ia la pernah merasaken kerihen kegeluhen situhu – tuhu ras Tuhan. Ibas sejarah kegeluhen Mother Theresia si idah ia nandingken kerina kenyamanen ibas kegeluhenna, nadingken kutana Albania dingen lawes ku ingan paling kumuh i India dingen njadiken dirina jadi pasu – pasu man kalak si musil, si mesera, si sakit, si buta huruf, rsd, dingen sejarah mencatat Mother Theresia i kenala sebage “Berkat Terhadap Semua Orang”.
• Kita enggo ngaloken pasu – pasu emaka mari dage minter si aplikasiken ibas geluhta ibas kita enggo nggejab mbelin kepe pasu – pasu Tuhan man banta, janah adi erpengue kita ? ibas situasi genduari si cukup penting ras jadi perhatinta eme nanadangi kekelengenta si lit i Tanah Karo si paksana ngenanami “Bencana Gunung Sinabung”, tentu enggo enterem senina – turangta singenanami kiniseran ibas pengungsin si tuhu – tuhu membutuhken penampat ibas kita nari, emaka asa banci mari minter sibahan aksinta guna nampati senina – turangta si paksana kena dampak “Bencana Gunung Sinabung” e gelah alu bage kerina kita ras temanta si kesusahen genduari radu ras jadi “Penikmat Berkat.

Amin.
Pekanbaru 10 Okt 2014.

Tulisen enda sifatna hanya Suplemen. Bimbingen PJJ si baku tetap si ipedarat Moderamen GBKP si isikapken PPWG GBKP. Salam, Bujur ras mejuah – juah. Selamat PJJ.